ഇതാണ് സാക്ഷാല്‍ പിണറായി വിജയന്‍. എല്ലാം മൗനമായി കേട്ട് തീരുമാനിച്ചതില്‍ ഉറച്ച് നില്‍ക്കുന്ന കമ്മ്യൂണിസ്റ്റ് ഭരണാധികാരി. രഹന ഫാത്തിമയേയും കൊണ്ട് ശബരിമലയ്ക്ക് പോയ പോലീസുകാര്‍ തോറ്റ് മടങ്ങിയത് തന്ത്രി ശബരിമല നടയടച്ചിടുമെന്ന് പറഞ്ഞതുകൊണ്ടാണ്. എന്നാല്‍ ശബരി മല നട അടയ്ക്കുന്നതു വരെ ഒന്നും മിണ്ടാതിരുന്ന പിണറായി പിന്നെ ആഞ്ഞടിച്ചത് അവിടെ നിന്നാണ്. എല്‍ഡിഎഫ് ജില്ലാ കമ്മിറ്റി ശബരിമല വിഷയത്തില്‍ സംഘടിപ്പിച്ച രാഷ്ട്രീയ വിശദീകരണ യോഗത്തിലാണ് മുഖ്യമന്ത്രി സഖാക്കളെ കോള്‍മയില്‍ കൊള്ളിച്ചത്. 

ശബരിമല തന്ത്രിയുടെ ബ്രഹ്മചര്യം എല്ലാവര്‍ക്കുമറിയാമെന്നു പിണറായി പറഞ്ഞു. നൈഷ്ഠിക ബ്രഹ്മചാരി പ്രതിഷ്ഠയുള്ള ക്ഷേത്രമാണ് ശബരിമലയെന്നും അങ്ങനെയുള്ള ക്ഷേത്രത്തിലെ പൂജാരിയും ബ്രഹ്മചാരി ആയിരിക്കണമെന്നാണ് വ്യവസ്ഥ. എന്നാല്‍ ഇവിടത്തെ തന്ത്രിയുടെ ബ്രഹ്മചര്യം എല്ലാവര്‍ക്കും അറിയാമെന്നു മുഖ്യമന്ത്രി പരിഹസിച്ചു.

തന്ത്രിയെയും ദേവസ്വം ബോര്‍ഡിനെയും രൂക്ഷമായി വിമര്‍ശിച്ച മുഖ്യമന്ത്രി, യുവതീ പ്രവേശന വിധിയില്‍ അപാകതയുണ്ടെന്നു തോന്നുന്നില്ലെന്നും വ്യക്തമാക്കി. സുപ്രീംകോടതി വിധി ദുര്‍ബലപ്പെടുത്തുന്ന ഒരു നടപടിക്കും സന്നദ്ധമല്ലെന്നു സര്‍ക്കാര്‍ വ്യക്തമാക്കിയിട്ടുണ്ട്.

അങ്ങനെ ചെയ്യുന്നത് നിയമവാഴ്ചയെ ദുര്‍ബലപ്പെടുത്തുന്ന നീക്കമാണ് പുനപരിശോധനാ ഹര്‍ജി നല്‍കി ദേവസ്വം ബോര്‍ഡ് വടി കൊടുത്ത് അടി വാങ്ങരുത്. ചിലരുടെ കോപ്രായങ്ങള്‍ കണ്ട് ബോര്‍ഡ് പിന്നാലെ പോകരുത്.
ശബരിമല നടയടയ്ക്കുന്നതും തുറക്കുന്നതും തന്ത്രിയുടെ അവകാശമല്ല. കോന്തലയില്‍ കെട്ടുന്ന താക്കോലിലാണ് അധികാരമെന്ന് കരുതരുതെന്നും മുഖ്യമന്ത്രി പറഞ്ഞു.