പഠനത്തിനിടെ ഉപജീവനത്തിനായി മീന്‍വില്‍പ്പന നടത്തി മലയാളികളുടെ മനസില്‍ ഇടം നേടിയ കോളേജ് വിദ്യാര്‍ത്ഥിനി ഹനാന്‍ അപ്രതീക്ഷിതമായി കടന്നെത്തിയ കാര്‍ അപകടത്തിന് ശേഷം വീണ്ടും മീന്‍വില്‍പ്പനയിലേയ്ക്ക് കടക്കുന്നു.

ആശുപത്രിയില്‍ നിന്ന് ഡിസ്ചാര്‍ജ് ആയതുമുതല്‍ വീണ്ടും മീന്‍ വില്‍പ്പനയിലേക്ക് മടങ്ങിവരുന്നതിനുള്ള നീക്കം ഹനാന്‍ തുടങ്ങിയിരുന്നു. ഇതിനായി തമ്മനത്ത് കട വാടകയ്ക്കെടുത്ത ഹനാന്‍ 'വൈറല്‍ ഫിഷ് മാള്‍' എന്ന പേരിടുന്നതിനും തീരുമാനിച്ചിരുന്നു. പക്ഷേ കടയുടെ ഉടമകള്‍ തമ്മില്‍ തര്‍ക്കമുണ്ടായിരുന്നതിനാല്‍ കാര്യങ്ങള്‍ തകിടം മറിഞ്ഞു. പിന്നീട് ഓണ്‍ലൈനായി മീന്‍ വില്‍പ്പന നടത്തുന്നതിന് ശ്രമിച്ചെങ്കിലും പദ്ധതി സഫലമായില്ല. ഇതേ തുടര്‍ന്ന് വായ്പയെടുത്ത് എയ്‌സെന്ന വാഹനം വാങ്ങി. ഇതാണ് ഹനാന്റെ സഞ്ചരിക്കുന്ന ഫിഷ് മാള്‍.

അതേ സമയം ഹനാന്‍ എന്ന പെണ്‍കുട്ടി ഒരത്ഭുതമാണെന്നും അവളുടേതുപോലുള്ള നിശ്ചയദാര്‍ഢ്യവും മനക്കരത്തും അധികമാളുകളില്‍ കാണില്ല എന്നും വ്യക്തമാക്കി രംഗത്തെത്തിയിരിക്കുകയാണ് ഹാനാനെ ചികിത്സിക്കുന്ന, എറണാകുളം മെഡിക്കല്‍ ട്രസ്റ്റ് ആശുപത്രിയിലെ ഡോ. ഹാരൂണ്‍ പിള്ള പറയുന്നു.

ഒന്നര മാസമെങ്കിലും ബെല്‍റ്റ് ഉപയോഗിക്കണമെന്നു കര്‍ശനമായി നിര്‍ദേശിച്ചിട്ടുണ്ട്. ഈ കാലയളവില്‍ നന്നായി ശ്രദ്ധിക്കണം. നട്ടെല്ലിനു പരുക്കേറ്റ ഹനാന്‍ ഭാഗ്യമുള്ള കുട്ടിയാണ്. ഇത്രവേഗം രോഗം ഭേദമാകുന്നത് അപൂര്‍വമാണ്. ഒരുപക്ഷേ തളര്‍ന്നു പോകാമായിരുന്നു. അതാണ് അടിയന്തിര ശസ്ത്രക്രിയ നിര്‍ദേശിച്ചത്. നിലവില്‍ കാലുകള്‍ നന്നായി സെന്‍സ് ചെയ്യുന്നുണ്ട്. നല്ല മനക്കരുത്തുള്ള അപൂര്‍വ പെണ്‍കുട്ടിയാണു ഹനാനെന്നും ഡോ. ഹാരൂണ്‍ പറയുന്നു. കോളേജിലെ പരീക്ഷകള്‍ പൂര്‍ത്തിയാക്കിയ ശേഷം ഹനാന്‍ സഞ്ചരിക്കുന്ന ഫിഷ് മാളുമായി മീന്‍ വില്‍പ്പന ആരംഭിക്കും.