പടക്കങ്ങളുടെ ഉപയോഗം സംബന്ധിച്ച് സുപ്രീം കോടതി കൊണ്ടുവന്ന നിയന്ത്രണങ്ങള്‍ കര്‍ശനമായി നടപ്പാക്കാനൊരുങ്ങി സംസ്ഥാന സര്‍ക്കാര്‍. ശബ്ദം കൂടിയ പടക്കങ്ങള്‍ തോന്നുന്ന സമയത്താണു പൊട്ടിക്കുന്നതെങ്കില്‍ ക്രിമിനല്‍ കേസാകും കാത്തിരിക്കുന്നത്. വിധി കര്‍ശനമായി നടപ്പാക്കാന്‍ പോലീസിനും മലിനീകരണ നിയന്ത്രണ ബോര്‍ഡിനും നിര്‍ദേശം നല്‍കിയിട്ടുണ്ട്. ദീപാവലി പോലുള്ള ആഘോഷങ്ങള്‍ക്ക് രാത്രി എട്ടുമുതല്‍ പത്തുവരെയും ക്രിസ്മസിനും പുതുവര്‍ഷത്തിനും രാത്രി 11.55 മുതല്‍ 12.30 വരെയുമേ പടക്കം പൊട്ടിക്കാന്‍ പാടുള്ളൂയെന്നാണു സുപ്രീം കോടതി കഴിഞ്ഞദിവസത്തെ ഉത്തരവിലൂടെ വ്യക്തമാക്കിയിരിക്കുന്നത്.
ബേരിയം സോള്‍ട്ട് ഉപയോഗിച്ച് നിര്‍മിക്കുന്ന പടക്കങ്ങള്‍ക്ക് പൂര്‍ണവിലക്ക് സുപ്രീം കോടതി ഏര്‍പ്പെടുത്തിയിട്ടുണ്ട്. ആര്‍സനിക്, ലിഥിയം, ലെഡ്, മെര്‍കുറി എന്നീ മൂലകങ്ങള്‍ അടങ്ങിയ പടക്കങ്ങള്‍ക്ക് എര്‍പ്പെടുത്തിയ നിയന്ത്രണം കര്‍ശനമായി നടപ്പാക്കും. മാനദണ്ഡങ്ങള്‍ പാലിക്കാതെ പടക്കം പൊട്ടിച്ചാല്‍ മലിനീകരണം, പൊതുശല്യം എന്നീ കേസുകള്‍ ചുമത്തിയാകും തുടക്കത്തില്‍ പോലീസ് കേസെടുക്കുക. പിന്നീടു കടുത്ത വകുപ്പുകള്‍ ചുമത്തുന്നതും പരിഗണനയിലുണ്ട്.

പടക്കങ്ങള്‍ പൊട്ടിക്കുമ്പോള്‍ ഉണ്ടാകുന്ന അന്തരീക്ഷ മലിനീകരണം സംബന്ധിച്ച് ദീപാവലിക്കു മുന്‍പും ശേഷവും ബോധവല്‍ക്കണ പ്രവര്‍ത്തനങ്ങള്‍ നടത്താനാണു മലിനീകരണ നിയന്ത്രണ ബോര്‍ഡിന്റെ തീരുമാനം. സ്‌കൂള്‍, കോളേജ് തലത്തില്‍ ബോധവല്‍ക്കരണ പരിപാടികള്‍ നടത്തും. സുപ്രീം കോടതി നിര്‍ദ്ദേശത്തിന്റെ അടിസ്ഥാനത്തില്‍ ഇതുമായി ബന്ധപ്പെട്ടു പാലിക്കേണ്ട ഗ്രീന്‍ പ്രോട്ടോക്കോള്‍ തയ്യാറാക്കി സംസ്ഥാന സര്‍ക്കാരിനു സമര്‍പ്പിക്കും. ശബ്ദമലിനീകരണ നിയന്ത്രണ ചട്ടത്തിലെ മൂന്നാം ചട്ടത്തിലാണ് വിവിധ മേഖലകളില്‍ അനുവദനീയമായ ശബ്ദ പരിധി വ്യവസ്ഥ ചെയ്യുന്നത്.