തമിഴ്നാട്ടില് നിന്ന് കേരളത്തിലേക്ക് വൈദ്യുതി എത്തിക്കുന്ന വടക്കഞ്ചേരി- മാടക്കത്തറ ഭൂഗര്ഭ വൈദ്യുതിലൈന് നിര്മാണം പുരോഗമിക്കുന്നു
തമിഴ്നാട്ടിലെ പുഗലൂരില് നിന്ന് കേരളത്തിലേക്ക് 2000 കിലോവാട്ട് വൈദ്യുതി എത്തിക്കാനായി ഭൂഗര്ഭ വൈദ്യുതലൈന് നിര്മാണം പുരോഗമിക്കുന്നു. വടക്കഞ്ചേരി മുതല് മണ്ണുത്തി മാടക്കത്തറ വരെ ഭൂമിക്കടിയിലൂടെയാണ് വൈദ്യുതി കൊണ്ടുപോകുക. രാജ്യത്ത് ആദ്യമായാണ് ഭൂമിക്കടിയില് കൂടി വൈദ്യുത ലൈന് കൊണ്ടുപോകുന്ന പദ്ധതി പരീക്ഷണാടിസ്ഥാനത്തില് നടപ്പിലാക്കുന്നത്. മൂവായിരം കോടി രൂപയുടെ പദ്ധതി ഇന്ത്യയിലെ വൈദ്യുതി വിതരണ ശൃംഖലയായ പവര്ഗ്രിഡ് കോര്പറേഷനാണ് നടപ്പിലാക്കുന്നത്.
തമിഴ്നാട്ടിലെ പുഗലൂരില് നിന്ന് തൃശൂരില് വടക്കഞ്ചേരി വരെ 212 കിലോമീറ്റര് വരെ ടവര് വഴി വൈദ്യുതി എത്തിച്ചശേഷം ആറുവരിപ്പാതയോരത്തുകൂടി മാടക്കത്തറ വരെ 28 കിലോമീറ്റര് ഭൂഗര്ഭ വൈദ്യുതലൈന് സ്ഥാപിച്ചാണ് വൈദ്യുതി എത്തിക്കുന്നത്. വടക്കഞ്ചേരിയില് നിന്ന് ദേശീയപാതക്കരികില് കൂടി രണ്ടരമീറ്റര് താഴ്ചയില് ചാലുകള് നിര്മിച്ച് പൈപ്പുകള് സ്ഥാപിച്ചുകഴിഞ്ഞു. കേബിള് ഇടുന്ന ജോലിയാണ് ഇപ്പോള് നടക്കുന്നത്. പൈപ്പിനുള്ളില് കൂടി യു.ജി. കേബിള് ഇട്ടാണ് വൈദ്യുതി എത്തിക്കുക.
കേബിളിലൂടെ ഡയറക്ട് കറന്റാണ് (ഡി.സി.) കടത്തിവിടുക. ഇത് പവര്സ്റ്റേഷനില് എത്തിച്ച് ആള്ട്ടര്നേറ്റ് കറന്റാക്കി (എ.സി) മാറ്റും. 2020-ലാണ് പദ്ധതി കമ്മിഷന് ചെയ്യുക. ഇതിന്റെ ഭാഗമായി മാടക്കത്തറയില് പുതിയ പവര്സ്റ്റേഷന്റെ നിര്മാണവും തുടങ്ങിയിട്ടുണ്ട്. പവര് സ്റ്റേഷനില് എത്തിച്ച് സംസ്ഥാനത്തിന്റെ വിവിധ ഭാഗങ്ങളിലേക്ക് കെഎസ്ഇബി വൈദ്യുതി വിതരണം ചെയ്യും. ടവറുകളേക്കാള് സുരക്ഷിതമാണ് ഭൂഗര്ഭ വൈദ്യുതലൈന്.
ആറുവരിപ്പാത നിര്മാണത്തിന് സ്ഥലം ഏറ്റെടുത്തതിനാല് ലൈന് കൊണ്ടുപോകുന്നതിന് മറ്റു സാങ്കേതിക പ്രശ്നങ്ങളും പവര്ഗ്രിഡിന് ഇല്ല. ദേശീയപാത അതോറിറ്റിയുമായുള്ള കരാര്പ്രകാരമാണ് പദ്ധതി നടപ്പിലാക്കുന്നത്. എന്നാല് ദേശീയപാതക്കായി ഭൂമി ഏറ്റെടുത്തപ്പോള് പാതയോര നിവാസികള്ക്ക് തുച്ഛമായ വില നല്കിയ ദേശീയപാത അതോറിറ്റി വന് തുകയ്ക്കാണ് പവര്ഗ്രിഡുമായി കരാറില് ഏര്പ്പെട്ടതെന്നും ഇത് ജനങ്ങളെ കബളിപ്പിക്കലാണെന്നും ആക്ഷേപമുണ്ട്. ആറുവരിപ്പാതക്കായി 60 മീറ്റര് സ്ഥലം ദേശീയപാത അതോറിറ്റി ഏറ്റെടുത്തിട്ടുണ്ട്.
https://www.facebook.com/Malayalivartha
