ശബരിമല വിഷയത്തിൽ ബിജെപി ദേശീയ അധ്യക്ഷൻ അമിത് ഷായ്ക്കു മറുപടിയുമായി ഭരണപരിഷ്കാര കമ്മീഷൻ ചെയർമാൻ വി.എസ്. അച്യുതാനന്ദൻ. കേരളത്തിന്‍റെ മനസറിയാതെ, ഇവിടെ വന്ന് വര്‍ഗീയ വാചക കസര്‍ത്ത് നടത്തി കൈയ്യടി നേടാനാവുമോ എന്ന് നോക്കുകയാണ് അമിത്ഷാ എന്ന് വി.എസ് പറഞ്ഞു.

ശബരിമലയിൽ സ്ത്രീകൾ കയറണമെന്ന് ഉത്തരേന്ത്യയിൽ ഇരിക്കുന്പോൾ ഒരു നിലപാട് എടുക്കുകയും പിന്നീട് കേരളത്തിൽ എത്തി സമരം ചെയ്യണമെന്ന് പറയുകയും ചെയ്യുന്നത് ഇരട്ടത്താപ്പാണെന്നും കേരളത്തിലെ ജനങ്ങള്‍ക്ക് മനസിലാവുന്നുണ്ടെന്ന് അമിത് ഷാ അറിയുന്നത് നല്ലതാണെന്ന് വി .എസ് ആഞ്ഞടിച്ചു .നൂറ്റാണ്ടിലെ ഏറ്റവും വലിയ പ്രളയ ദുരിതം അനുഭവിക്കുന്ന കേരളത്തോട് കേന്ദ്രം ചെയ്തത് എന്താണെന്നും ഇവിടത്തെ കൊച്ചു കുഞ്ഞുങ്ങള്‍ക്ക് പോലും അറിയാം. വി എസ് വ്യക്തമാക്കി

കഞ്ചിക്കോട് കോച്ച് ഫാക്റ്ററിയടക്കം കേരളത്തിന്‍റെ ദീര്‍ഘകാല ആവശ്യങ്ങളോട് കേന്ദ്രം മുഖം തിരിച്ചു. അതേസമയം, അതെല്ലാം അനുവദിച്ചു തന്നത് തങ്ങളാണെന്ന പച്ചക്കള്ളം പ്രസംഗിച്ച് ജനങ്ങളെ തെറ്റിദ്ധരിപ്പിക്കുകയും ചെയ്യുന്ന തട്ടിപ്പ് കേരളത്തില്‍ ചെലവാകാന്‍ പോകുന്നില്ലെന്ന് വി എസ് വാർത്താകുറിപ്പിൽ അറിയിച്ചു.