ശബരിമല വിഷയത്തില്‍ സര്‍ക്കാരിന് വ്യക്തമായ സൂചന നല്‍കി എന്‍എസ്എസ്. ജനറല്‍ സെക്രട്ടറി ജി.സുകുമാരന്‍ നായര്‍. നവോത്ഥാനമൂല്യങ്ങള്‍ ഉയര്‍ത്തിപ്പിടിച്ച മന്നത്തു പത്മനാഭന്റെ നിലപാടുകള്‍ക്ക് വിരുദ്ധമാണ് എന്‍.എസ്.എസ്സിന്റേതെന്നും. എന്‍.എസ്.എസ്. നിലപാട് തിരുത്തണമെന്നും ആവശ്യപ്പെട്ട സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന് അറുത്തുമുറിച്ച മറുപടി നല്‍കിയ എന്‍എസ്എസ് ജനറല്‍ സെക്രട്ടറി യാതൊരു വിധ വിട്ടു വീഴ്ചയ്ക്കുമില്ലെന്ന സൂചനയും നല്‍കുന്നു. എന്‍.എസ്.എസ്സിന്റെ പഴയകാലപാരമ്പര്യത്തിന് നിരക്കാത്തതാണ് ഇപ്പോള്‍ അവര്‍ സ്വീകരിക്കുന്നത്. സുകുമാരന്‍നായരുടെ ഇപ്പോഴത്തെ നിലപാട് പുനഃപരിശോധിക്കണമെന്നായിരുന്നു ഞായറാഴ്ച കോടിയേരി ബാലകൃഷ്ണന്‍ പ്രഖ്യാപിച്ചത്.

എന്നാല്‍, ഇതിനെതിരെ ശക്തമായ പ്രതികരണവുമായി എത്തിയ എന്‍എസ്എസ് ജനറല്‍ സെക്രട്ടറി സുകുമാരന്‍ നായര്‍ കൊടിയേരിയുടെ ഉപദേശം തികച്ചും അപ്രസക്തമാണെന്ന് പ്രഖ്യാപിച്ചു. ആദ്യം കോടിയേരി പാര്‍ട്ടിയുടെയും സര്‍ക്കാരിന്റെയും നയമാണ് തിരുത്തേണ്ടതെന്ന് അദ്ദേഹം പറഞ്ഞു. എന്‍എസ്എസ് ശബരിമല വിഷയത്തില്‍ ആദ്യം മുതല്‍ ഒരേ നയത്തില്‍ ഉറച്ചു നില്‍ക്കുകയാണ്. വിശ്വാസികള്‍ക്ക് അനുകൂലമായി എന്‍.എസ്.എസ്. എടുത്തിട്ടുള്ള നിലപാട് വ്യക്തമാണ്. അതിന്റെ പിന്നില്‍ രാഷ്ട്രീയലക്ഷ്യങ്ങളൊന്നും തന്നെയില്ല. ഇക്കാര്യത്തിലുള്ള ഗവണ്മെന്റിന്റെ നയമാണ് തിരുത്തിക്കേണ്ടതെന്നും എന്‍എസ്എസ് ജനറല്‍ സെക്രട്ടറി ജി.സുകുമാരന്‍ നായര്‍ പുറത്തിറക്കിയ പ്രസ്താവനയില്‍ വ്യക്തമാക്കുന്നു.

മന്നത്തുപത്മനാഭന്റെ ആദര്‍ശങ്ങളില്‍ അടിയുറച്ചു നിന്നുകൊണ്ട് നവോത്ഥാന മൂല്യങ്ങള്‍ ഉയര്‍ത്തിപ്പിടിക്കുന്ന ചരിത്രമാണ് എന്‍.എസ്.എസ്സിനുള്ളത്. വിശ്വാസസംരക്ഷണവുമായി ഇതിനെ കൂട്ടിക്കുഴയ്‌ക്കേണ്ട ആവശ്യമില്ല. ശബരിമലവിഷയം സംബന്ധിച്ച് വിശ്വാസികള്‍ക്കെതിരെ സര്‍ക്കാര്‍നീക്കം ഉണ്ടാകുന്നു എന്നറിഞ്ഞപ്പോള്‍തന്നെ, അങ്ങനെയൊരു നിലപാടിലേക്ക് പോകുന്നത് ബഹുഭൂരിപക്ഷം വരുന്ന വിശ്വാസികള്‍ അംഗീകരിക്കില്ലെന്നും ആ നീക്കത്തില്‍നിന്നും പിന്‍മാറുകയാണ് നല്ലതെന്നും കോടിയേരി ബാലകൃഷ്ണനെ ഫോണില്‍ ബന്ധപ്പെട്ട് അറിയിച്ചിരുന്നതാണ്. അതല്ലാത്തപക്ഷം, വിശ്വാസ സംരക്ഷണത്തിനായി എന്‍.എസ്.എസ്സും നിലപാട് സ്വീകരിക്കേണ്ടിവരും എന്നും അറിയിച്ചിരുന്നു. അതുകൊണ്ടാണ് കോടിയേരിയുടെ ഇപ്പോഴത്തെ ഉപദേശം അപ്രസക്തമാണെന്ന് പറയേണ്ടിവരുന്നതെന്നും ജനറല്‍ സെക്രട്ടറി പറഞ്ഞു.

ശബരിമല വിഷയത്തില്‍ എന്‍എസ്എസ് കൂടി സര്‍ക്കാര്‍ വിരുദ്ധ നിലപാട് സ്വീകരിച്ചതോടെ സര്‍ക്കാര്‍ കൂടുതല്‍ പ്രതിരോധത്തിലായിട്ടുണ്ട്. സര്‍ക്കാര്‍ അധികാരത്തില്‍ എത്തിയപ്പോള്‍ മുതല്‍ എന്‍എസ്എസ് സര്‍ക്കാരിനോടു അനുകൂലിക്കുന്ന നിലപാടാണ് സ്വീകരിച്ചിരുന്നത്. സാമ്പത്തിക സംവരണത്തിലടക്കം സര്‍ക്കാര്‍ എന്‍എസ്എസിന്റെ ആവശ്യങ്ങളെല്ലാം അംഗീകരിച്ചു നല്‍കുകയും ചെയ്തിരുന്നു. എന്നാല്‍, സര്‍ക്കാരിനെതിരെ ശബരിമല വിഷയത്തോടെയാണ് എന്‍എസ്എസ് തിരിഞ്ഞിരിക്കുന്നത്. സംസ്ഥാനത്ത് അടിയന്തരാവസ്ഥയാണെന്നു വരെ എന്‍എസ്എസ് തുറന്നടിച്ചു.
എന്നാല്‍, എന്‍എസ്എസ് ജനറല്‍ സെക്രട്ടറി ഇത്രത്തോളം പ്രകോപനപരമായ പ്രഖ്യാപനങ്ങളെല്ലാം നടത്തിയിട്ടും ഇതുവരെയും മുഖ്യമന്ത്രി പിണറായി വിജയന്‍ ഒരക്ഷരം പോലും ഇദ്ദേഹത്തിനെതിരെ പറഞ്ഞിട്ടില്ല. കോടിയേരി പ്രതികരിച്ചെങ്കില്‍ പോലും ഇതിലും മൃദുവായ സമീപമാണ് സ്വീകരിച്ചിരുന്നത്. ഈ സാഹചര്യത്തിലാണ് ശബരിമല വിഷയം വീണ്ടും സര്‍ക്കാരിന് കുരുക്കായി മാറിയിരിക്കുന്നത്.