യുവതികൾക്കായി അയ്യപ്പ ക്ഷേത്രം സ്ഥാപിക്കാനുള്ള ശ്രമത്തിലാണെന്ന് ബി.ജെ.പി എം.പി സുരേഷ് ഗോപി. ഇതിനായി റാന്നിയിലോ പരിസരത്തോ സ്ഥലം ലഭ്യമാക്കാന്‍ കേന്ദ്ര, സംസ്ഥാന സര്‍ക്കാരുകളോട് അഭ്യര്‍ഥിക്കുമെന്നും സുരേഷ് ഗോപി പറഞ്ഞു. പൂങ്കാവനത്തിനടുത്ത് സ്ഥലം ലഭ്യമാക്കാനാണ് ശ്രമിക്കുന്നത്. ഇല്ലെങ്കില്‍ വിഷയത്തില്‍ സമാനമനസ്‌കരായ ആളുകളുടെ സഹകരണത്തോടെ സ്ഥലം ലഭ്യമാക്കുമെന്നും ശബരിമല സുരേഷ് ഗോപി പറഞ്ഞു.

അതിന്റെ പൂര്‍ണരൂപം ആയിക്കഴിഞ്ഞിരിക്കുന്നു. അതിന്റെ വിളംബരം ഈയടുത്ത ദിവസങ്ങളിലുണ്ടാകും. ഈ വര്‍ഷം തന്നെ ക്ഷേത്രത്തിനായി സ്ഥലം കണ്ടെത്തും. ആ ക്ഷേത്രത്തില്‍ പൂജ നടത്താന്‍ പൂജാരി വേണോ പൂജാരിണി വേണോ എന്ന കാര്യത്തില്‍ തന്ത്രി മുഖ്യനുമായി ആലോചിച്ച് തീരുമാനമെടുക്കും. ശബരിമലയെ സംബന്ധിച്ച് ദൈവഹിതത്തിന് വേണ്ടി നിലനില്‍ക്കുന്ന സമൂഹത്തിന് യാതൊരു പോറല്‍പോലും ഏല്‍ക്കരുതെന്നും സുരേഷ് ഗോപി പറഞ്ഞു.

കൊളത്തൂര്‍ അദ്വൈതാശ്രമത്തില്‍ ശ്രീശങ്കര ചാരിറ്റബിള്‍ ട്രസ്റ്റിന്റെ ശ്രീശങ്കര വൃദ്ധസേവാ കേന്ദ്രം ഉദ്ഘാടനം ചെയ്യുകയായിരുന്നു അദ്ദേഹം.