കേന്ദ്ര സര്‍വീസില്‍ വളരെക്കാലമായി തുടരുന്ന, കേരളാ കേഡര്‍ ഐ.പി.എസ്. ഉദ്യോഗസ്ഥരെ തിരികെ വിളിക്കണമെന്നാവശ്യപ്പെട്ട് സംസ്ഥാന പോലീസ് മേധാവി ലോക്‌നാഥ് ബെഹ്‌റ സര്‍ക്കാരിനു കത്ത് നല്‍കി. മൂന്നു മുതിര്‍ന്ന എ.ഡി.ജി.പിമാര്‍ കേന്ദ്ര ഡെപ്യൂട്ടേഷനു താത്പര്യം പ്രകടിപ്പിച്ച സാഹചര്യത്തിലാണു ബെഹ്‌റയുടെ കത്ത്. ഇപ്പോള്‍ ആവശ്യത്തിന് ഐ.പി.എസ്. ഉദ്യോഗസ്ഥരില്ലെന്നും കൂടുതല്‍പേര്‍ കേരളം വിട്ടാല്‍ പല സുപ്രധാന തസ്തികകളും ഒഴിച്ചിടേണ്ടിവരുമെന്നും ബെഹ്‌റയുടെ കത്തില്‍ ചൂണ്ടിക്കാട്ടുന്നു.

ഐ.ജിമാരായ ടി. വിക്രം, ഗോപേഷ് അഗര്‍വാള്‍ തുടങ്ങിയവര്‍ ദീര്‍ഘകാലമായി കേന്ദ്ര സര്‍വീസിലാണ്. എസ്.പിമാര്‍ക്കു നാലുവര്‍ഷവും ഐ.ജിമാര്‍ക്ക് അഞ്ചുവര്‍ഷവും കേന്ദ്ര ഡെപ്യൂട്ടേഷനില്‍ തുടരാം. എന്നാല്‍, ഇങ്ങനെ പോകുന്നവര്‍ മടങ്ങിയെത്താന്‍ താത്പര്യം കാട്ടാറില്ല. ഡി.ജി.പി. ഗ്രേഡ് ലഭിക്കുമ്പോള്‍ മാത്രം സംസ്ഥാന പോലീസ് മേധാവിയുടെ കസേര ലക്ഷ്യമിട്ട് എത്തുന്നവരാണ് ഏറെയും. ഇതു പോലീസ് തലപ്പത്ത് ശീതസമരത്തിനിടയാക്കുമെന്നതും കണക്കിലെടുത്താണു സര്‍ക്കാര്‍ നീക്കം.
ഡെപ്യൂട്ടേഷനു താത്പര്യം പ്രകടിപ്പിച്ച ദക്ഷിണമേഖല എ.ഡി.ജി.പി: അനില്‍ കാന്ത്, പോലീസ് പരിശീലനവിഭാഗം മേധാവി ബി. സന്ധ്യ, തീരദേശ പോലീസ് മേധാവി സുധേഷ് കുമാര്‍ എന്നിവര്‍ക്കു വൈകാതെ കേന്ദ്രനിയമനം ലഭിച്ചേക്കും. ഇവരുടെ സീനിയോറിറ്റി പ്രകാരം, ഒഴിവുണ്ടാക്കുന്ന മുറയ്ക്ക് താക്കോല്‍ സ്ഥാനങ്ങളിലാകും നിയമനം.