ശബരിമല വിഷയത്തില്‍ വല്ലാതെ നേട്ടം കൊയ്തിരിക്കുകയാണ് ബിജെപി. ഇതോടെ വരുന്ന ലോക്‌സഭ തെരഞ്ഞെടുപ്പ് ബിജെപിയ്ക്കും നിര്‍ണായകമാകും. കഴിഞ്ഞ നിയമസഭ തെരഞ്ഞെടുപ്പില്‍ താമര വിരിയും പോലെ ലോക്‌സഭയിലും താമര വിരിയുമെന്നാണ് ബിജെപിക്കാര്‍ കണക്ക് കൂട്ടുന്നത്. 

ഇത്തവണ അട്ടിമറി വിജയത്തിലൂടെ തിരുവനന്തപുരത്ത് താമര വിരിയിക്കും എന്ന ഉറച്ച നിലപാടില്‍ മുന്നോട്ട് പോകുന്ന ബിജെപിക്കും എന്‍ ഡി എ ക്കും വിജയ പ്രതീക്ഷ നല്‍കുന്നതാണ് ശബരിമല വിഷയവും തിരെഞ്ഞെടുപ്പ് ഡാറ്റാകളും. അട്ടിമറി വിജയം ഇത്തവണ ബിജെപി കരസ്ഥമാക്കും എന്നാണ് ബിജെപിക്കാര്‍ പറയുന്നത്. 2009 ലെ ലോക്‌സഭാ തിരഞ്ഞെടുപ്പില്‍ സ്വതന്ത്ര സ്ഥാനാര്‍ത്ഥി നീല ലോഹിതദാസന്‍ നാടാര്‍ക്കും പിന്നില്‍, നാലാം സ്ഥാനത്തായിരുന്ന ബിജെപി അഞ്ചു വര്‍ഷത്തിനു ശേഷം നടന്ന തൊട്ടടുത്ത തിരഞ്ഞെടുപ്പില്‍ നടത്തിയത് അവിശ്വസനീയമായ കുതിപ്പായിരുന്നു. 2009 ല്‍ ബിജെപി സ്ഥാനാര്‍ത്ഥിയായി മത്സരിച്ച പി.കെ കൃഷ്ണദാസ് 11.40 ശതമാനവുമായി 84,094 വോട്ടാണ് നേടിയത്. എന്നാല്‍, 2014 ലേയ്ക്ക് എത്തിയതോടെ 20.92 ശതമാനം വോട്ടിന്റെ വര്‍ധനവുമായി ബിജെപി 2,82,336 വോട്ടാണ് നേടിയത്. ഇവിടെ മത്സരിച്ചത് ബിജെപി സ്ഥാനാര്‍തഥിയായ ഒ.രാജഗോപാലുമായിരുന്നു.

രണ്ടു തെരഞ്ഞെടുപ്പിലെയും കണക്കുകള്‍ പരിശോധിച്ചാല്‍ കോണ്‍ഗ്രസിന്റെ വോട്ടിലുണ്ടായ ചോര്‍ച്ചയാണ് ബിജെപി നേട്ടമാക്കി മാറിയതെന്ന് മനസിലാക്കാന്‍ സാധിക്കും. 2009 ല്‍ സിപിഐയുടെ സ്ഥാനാര്‍ത്ഥിയായി മത്സരിച്ച പി.രാമചന്ദ്രന്‍ നായര്‍ 30.74 ശതമാനം വോട്ടുമായി 226,727 വോട്ട് നേടിയപ്പോള്‍ മൂന്നാം സ്ഥാനത്തായി പോയിട്ടും 2014 ലെ തിരഞ്ഞെടുപ്പില്‍ 28.50 ശതമാനം വോട്ട് സിപിഐ സ്ഥാനാര്‍ത്ഥി ബെനറ്റ് എബ്രഹാം നേടി. 2.24 ശതമാനം 2014 ലെ വോട്ട് മാത്രമാണ് സിപിഐയ്ക്ക് അന്ന് നഷ്ടമായത്. എന്നാല്‍, 2009 ല്‍ 44.29 ശതമാനം വോട്ട് നേടിയിരുന്ന കോണ്‍ഗ്രസിനു 10.20 ശതമാനം വോട്ടിന്റെ നഷ്ടമാണ് ഉണ്ടായത്. ഈ വോട്ട് നേട്ടമുണ്ടാക്കിയത് ബിജെപിയാണെന്നാണ് വ്യക്തമാകുകയാണ് ഇതുവഴി.

തിരവനന്തപുരം മണ്ഡലത്തില്‍ കോണ്‍ഗ്രസില്‍ ഇക്കുറിയും ശശി തരൂര്‍ തന്നെയാവും സ്ഥാനാര്‍ത്ഥിയെന്നാണ് സൂചനകള്‍. എന്നാല്‍, പുതിയ പേരുകള്‍ തിരുവനന്തപുരം മണ്ഡലത്തിലേയ്ക്കു പരിഗണനയില്‍ ഉണ്ടെന്ന സൂചനകളും ലഭിച്ചിട്ടുണ്ട്. നായര്‍ ഭൂരിപക്ഷ മണ്ഡലത്തില്‍ കോണ്‍ഗ്രസ് പുതിയ നായര്‍ സ്ഥാനാര്‍ത്ഥിയെ പരിഗണിക്കുന്നുണ്ടെന്നാണ് റിപ്പോര്‍ട്ട്. സുനന്ദപുഷ്‌കര്‍ കേസ് അടക്കമുള്ള കേസുകള്‍ ശശി തരൂരിനു കുടുക്കാകുമെന്നാണ് സൂചന.

ഏഷ്യാനെറ്റ് ഉടമ രാജീവ് ചന്ദ്രശേഖരിന്റെയും മോഹന്‍ലാലിന്റെയും സുരേഷ് ഗോപിയുടേയും പേരുകളാണ് പ്രധാനമായും ബിജെപിയും സജീവ ചര്‍ച്ചകളില്‍ ഉള്ളത്. ബിജെപി ജില്ലാ പ്രസിഡന്റ് സുരേഷിന്റെ പേരും പരിഗണിക്കുന്നു. മുതിര്‍ന്ന സിപിഐ നേതാക്കള്‍ക്കൊപ്പം സ്വതന്ത്ര സ്ഥാനാര്‍ത്ഥിയായി ചാരക്കേസില്‍ കുടുങ്ങിയ നമ്പിനാരായണനെ മത്സരിപ്പിക്കുന്ന കാര്യം ഇടതു മുന്നണി പരിഗണിക്കുന്നുണ്ട്. സിപിഐ സ്ഥാനാര്‍ത്ഥിയായി ബിനോയ് വിശ്വത്തിന്റെയും ഇസ്മയലിന്റെയും പേരുകളും പരിഗണനാ പട്ടികയില്‍ ഉണ്ട്.