ശബരിമലയിലെത്തുന്ന യഥാര്‍ഥ ഭക്തര്‍ക്ക് സംരക്ഷണം ഉറപ്പാക്കുമെന്ന് സര്‍ക്കാര്‍ ഹൈക്കോടതിയില്‍. മണ്ഡല മകരവിളക്ക് കാലത്ത് ക്ഷേത്രത്തിന്റെ അന്തസ്സും പവിത്രതയും നിലനിര്‍ത്തിതന്നെ എല്ലാ ഭക്തര്‍ക്കും ദര്‍ശനത്തിനു സംരക്ഷണം ലഭിക്കുമെന്ന് പ്രതീക്ഷിക്കുന്നതായി ഹൈക്കോടതി. ശബരിമല പ്രവേശനത്തിന് പൊലീസ് സംരക്ഷണം തേടി നാലു സ്ത്രീകള്‍ നല്‍കിയ ഹരജിയിലാണ് കോടതിയും സര്‍ക്കാറും നിലപാടറിയിച്ചത്. അനിഷ്ട സംഭവങ്ങള്‍ ഉണ്ടാകാത്തവിധം നിയമപ്രകാരമുള്ള ദര്‍ശനത്തിന് അവസരമൊരുക്കുമെന്ന സര്‍ക്കാര്‍ വിശദീകരണം രേഖപ്പെടുത്തി കോടതി ഹര്‍ജി തീര്‍പ്പാക്കി. സുപ്രീംകോടതി വിധിയെത്തുടര്‍ന്ന് മലകയറാന്‍ എത്തിയ സ്ത്രീകള്‍ക്കുനേരെ വ്യക്തിപരമായ ആക്രമണങ്ങളുണ്ടായെന്നും അപകീര്‍ത്തിപ്പെടുത്താന്‍ ശ്രമമുണ്ടായെന്നും ഹര്‍ജിയില്‍ പറഞ്ഞു. സുപ്രീംകോടതി വിധി നടപ്പാക്കാന്‍ എല്ലാ അധികൃതര്‍ക്കും ബാധ്യതയുണ്ടെന്ന് കോടതി അഭിപ്രായപ്പെട്ടു.

സുപ്രീംകോടതി വിധി രാജ്യത്തെ നിയമമാണ്. കോടതി വിധിയുണ്ടായിട്ടും വേണ്ടത്ര സംരക്ഷണം ഒരുക്കുന്നതില്‍ സര്‍ക്കാറിന് വീഴ്ചയുണ്ടായോ എന്ന് ഡിവിഷന്‍ ബെഞ്ച് ആരാഞ്ഞു. വീഴ്ച ഉണ്ടായിട്ടില്ലെന്ന് സര്‍ക്കാറിനുവേണ്ടി ഹാജരായ സ്‌റ്റേറ്റ് അറ്റോണി വ്യക്തമാക്കി. ഭക്തര്‍ക്ക് സംരക്ഷണം നല്‍കാന്‍ പരമാവധി നടപടി സ്വീകരിച്ചതായി സര്‍ക്കാര്‍ അറിയിച്ചു. അതേസമയം, തന്നെ അനിഷ്ട സംഭവങ്ങളുണ്ടാകാനുള്ള സാധ്യതയും പരിഗണിക്കേണ്ടിവന്നു. സുപ്രീംകോടതി വിധി നടപ്പാക്കുന്നത് തടയാന്‍ ഭക്തരുടെ വേഷത്തില്‍ ക്രിമിനലുകള്‍ എത്തിയെന്നും സര്‍ക്കാര്‍ ചൂണ്ടിക്കാട്ടി.
സുപ്രീംകോടതി ഉത്തരവനുസരിച്ച് ഭക്തര്‍ക്ക് സംരക്ഷണം ഉറപ്പാക്കാന്‍ പൊലീസിന് ഉത്തരവാദിത്തമുണ്ടെന്നു കോടതി പറഞ്ഞു. സ്ത്രീപുരുഷ ഭേദമില്ലാതെ എല്ലാ യഥാര്‍ഥ ഭക്തര്‍ക്കും സംരക്ഷണം നല്‍കുമെന്നായിരുന്നു സര്‍ക്കാര്‍ മറുപടി. ഭരണഘടന സ്ഥാപനങ്ങളുടെ ഉന്നത സ്ഥാനത്തുള്ളവര്‍ പോലും വിധിയില്‍ പ്രതിഷേധിച്ച് രംഗത്തുവന്ന സങ്കീര്‍ണാവസ്ഥയാണുള്ളതെന്നും സ്‌റ്റേറ്റ് അറ്റോണി ചൂണ്ടിക്കാട്ടി. ശബരിമലയിലെത്തുന്ന ഭക്തര്‍ക്ക് സുരക്ഷ കാര്യത്തില്‍ ആശങ്കയുണ്ടെങ്കില്‍ അപേക്ഷ നല്‍കിയാല്‍ പരമാവധി സഹായം നല്‍കാനാവുമെന്നും സര്‍ക്കാര്‍ അറിയിച്ചു.
ഹരജിക്കാര്‍ പലതരത്തിലുള്ള ആവശ്യങ്ങളാണ് ഒരു ഹരജിയിലൂടെ തേടുന്നതെന്ന് ഉത്തരവില്‍ നിരീക്ഷിച്ചു. ഹരജി ഊഹാപോഹങ്ങളുടെ അടിസ്ഥാനത്തിലുള്ളതും യുക്തിഭദ്രമല്ലാത്തതുമാണ്. സംരക്ഷണംതേടി ഹരജിക്കാര്‍ പൊലീസിനെയാണ് സമീപിക്കേണ്ടിയിരുന്നതെന്നു കോടതി വ്യക്തമാക്കി.