ഭക്തലക്ഷങ്ങള്‍ പൂണ്യംതേടി മാലയിടുന്ന വൃശ്ചിക പുലര്‍ച്ചയില്‍ അയ്യപ്പഭക്തി തുളുമ്പുന്ന ചിത്രവുമായി മോഹന്‍ലാല്‍ ഫെയിസ്ബുക്കില്‍. ചെറുപ്പകാലത്ത് നിരവധി തവണ ശബരിമല ദര്‍ശനം നടത്തിയിട്ടുള്ള മോഹന്‍ലാല്‍ മൂന്ന് വര്‍ഷം മുമ്പാണ് അവസാനമായി ദര്‍ശനം നടത്തിയത്. അമ്മ ശാന്തകുമാരി അമ്മയ്ക്ക് വേണ്ടിയായിരുന്നു അത്. അമ്മ ശാന്തകുമാരി അമ്മയ്ക്ക് രോഗം കലശലായിരുന്ന സമയത്താണ് പ്രാര്‍ത്ഥനയുമായി താരം മലകയറിയത്. 2015 മേയ് 15ന് പുലര്‍ച്ചെ സന്നിധാനത്തെത്തിയ താരം ഇരുമുടിക്കെട്ടില്ലാത്തതിനാല്‍ വടക്കേ നടയിലൂടെയാണ് ശ്രീകോവിലിന് മുന്നിലെത്തിയത്. നിര്‍മാല്യം കണ്ട് തൊഴുതു. നെയ്യഭിഷേകവും നടത്തി. നിര്‍മാതാവ് ആന്റണി പെരുമ്പാവൂരും സുഹൃത്ത് സനല്‍കുമാറും മോഹന്‍ലാലിനൊപ്പം അന്നുണ്ടായിരുന്നു.

2004ലും താരം ശബരിമല ദര്‍ശനം നടത്തിയിരുന്നു. പണ്ട് പത്തനംതിട്ടയിലെ കുടുംബ വീട്ടില്‍ നിന്ന് ഇരുമുടികെട്ടുമായി മോഹന്‍ലാല്‍ പലതവണ മലകയറിയിട്ടുണ്ട്. എന്നാല്‍ ഇത്തവണ ശബരിമല ദര്‍ശനം നടത്തുമോ എന്ന കാര്യം താരം വ്യക്തമാക്കിയിട്ടില്ല. യുവതീപ്രവേശനത്തെ തുടര്‍ന്ന് ശബരിമലയില്‍ സംഘര്‍ഷത്തിന്റെ പാതയിലേക്കാണ് നീങ്ങുന്നത്. ആചാരങ്ങള്‍ സംരക്ഷിക്കാന്‍ സമരം നടത്തുന്ന ഭക്തര്‍ക്കൊപ്പമാണോ താരം എന്ന ചോദ്യം ഫെയിസ്ബുക്കില്‍ ഫോട്ടോ ഇട്ടത് മുതല്‍ ഉയരുന്നുണ്ട്. കറുപ്പ് ഷര്‍ട്ടണിഞ്ഞ് തൊഴുകയ്യോടെ നില്‍ക്കുന്ന ഫോട്ടോ ഇഷ്ടപ്പെടാത്ത ചിലര്‍ താമസിക്കാതെ മോഹന്‍ലാലിനെ സംഘിയാക്കുമെന്ന കമന്റുകളും ഫോട്ടോയ്ക്ക് താഴെ വന്നിട്ടുണ്ട്. 

അതേസമയം വിഷകലയെ അറസ്റ്റ് ചെയ്തതിന് അയ്യപ്പസ്വാമിയോട് ലാലേട്ടന്‍ നന്ദിപറയുകയാണെന്ന് ജിജേഷ് ജനാര്‍ദ്ദനന്‍ എന്ന ആരാധകന്‍ പറയുന്നു. മോഹന്‍ലാല്‍ സംഘി ആണെന്ന് പറയാന്‍ ഇപ്പോ വരും കുറച്ചു ഊള സഖാക്കളും സപ്പോര്‍ട്ട് ചെയ്യാന്‍ കുറച്ച് ചാണക സംഘികളും എന്നി നിപുന്‍ മാധവ് എന്ന ആരാധകന്‍ ഫോട്ടോയ്ക്ക് ഇട്ട കമന്റിന് താഴെയാണ് ഏറ്റവും കൂടുതല്‍ കമന്റ് വന്നത്. രണ്ട് മണിക്കൂര്‍ കൊണ്ട് ഫോട്ടോ ഒന്‍പതിനായിരത്തോളം പേര്‍ ഷെയര്‍ ചെയ്തിട്ടുണ്ട്.