ശബരിമലയിലെ നിയന്ത്രണങ്ങള്‍ സുഗമമായ തീര്‍ഥാടനത്തെ ബാധിച്ചതോടെ ഇളവു നല്‍കുന്നതില്‍ പോലീസിന്റെ തീരുമാനം ഇന്ന്. സന്നിധാനത്തെ കര്‍ശന നിയന്ത്രണങ്ങള്‍ ഭക്തരെ ബാധിക്കുന്നതായി ദേവസ്വം ബോര്‍ഡംഗം കെ.പി. ശങ്കരദാസ് ഡി.ജി.പി. ലോക്‌നാഥ് ബെഹ്‌റയെ അറിയിച്ചു. മാറ്റങ്ങള്‍ പരിഗണിക്കുമെന്നു ഡി.ജി.പി. അറിയിച്ചിട്ടുണ്ട്. നെയ്യഭിഷേകത്തിനു തടസമുണ്ടാകാതിരിക്കുന്ന മാറ്റങ്ങളാണു പരിഗണനയിലുള്ളത്. രാത്രി 12നു നിലയ്ക്കലില്‍ എത്തുന്നവരെ ഒന്നിനു പമ്പയിലേക്കും തുടര്‍ന്നു സന്നിധാനത്തേക്കും കയറ്റിവിടുക. ദര്‍ശനവും നെയ്യഭിഷേകവും കഴിഞ്ഞ് തിരിച്ചിറക്കുക.
പടിപൂജ ബുക്ക് ചെയ്തവരെ സന്നിധാനത്തു രാത്രി തങ്ങാന്‍ അനുവദിക്കുക തുടങ്ങിയ മാറ്റങ്ങള്‍ക്ക് ഏകദേശ ധാരണയായി. വിശ്രമം പോലുമില്ലാതെ തിരിച്ചിറക്കത്തിനു നിര്‍ബന്ധിക്കുന്നു എന്നു പരാതിയുണ്ടായ നിലയ്ക്ക് വയോധികര്‍ക്കും ഭിന്നശേഷിക്കാര്‍ക്കും ഇളവ് നല്‍കാനും ആലോചനയുണ്ട്. എന്നാല്‍ ഇതിന്റെ പ്രായോഗികത സംശയത്തിലാണ്. ദേവസ്വം ബോര്‍ഡ് പ്രസിഡന്റ് എ. പത്മകുമാര്‍ മന്ത്രി കടകംപള്ളി സുരേന്ദ്രനെ വിയോജിപ്പറിയിച്ചതോടെ സന്നിധാനത്തെ കടകളും അപ്പം, അരവണ കൗണ്ടറുകളും രാത്രി അടപ്പിക്കില്ലെന്നു ഡി.ജി.പി. അറിയിച്ചു.