തടയാമെങ്കില് തടഞ്ഞോ... ശബരിമലയില് പൊലീസ് ഏര്പ്പെടുത്തിയ നിയന്ത്രണങ്ങള്ക്കും വിലക്കുകള്ക്കുമെതിരെ ബി.ജെ.പി നേതാക്കള്; കേന്ദ്ര മന്ത്രി അല്ഫോണ്സ് കണ്ണന്താനവും മറ്റ് നേതാക്കളും നാളെ പാസോ മറ്റു അനുമതികളോ കൂടാതെ പമ്പയിലെത്തും
ശബരിമലയില് പൊലീസ് ഏര്പ്പെടുത്തിയ നിയന്ത്രണങ്ങള്ക്കും വിലക്കുകള്ക്കുമെതിരെ ബി.ജെ.പി നേതാക്കള് രംഗത്ത്. കേന്ദ്ര മന്ത്രി അല്ഫോണ്സ് കണ്ണന്താനം നാളെ പാസോ മറ്റു അനുമതികളോ കൂടാതെ പമ്പയിലെത്തുമെന്നും പൊലീസിന് തടയാമെങ്കില് തടയട്ടെയെന്നുമാണ് ബി.ജെ.പി സംസ്ഥാന അദ്ധ്യക്ഷന് പി.എസ്. ശ്രീധരന് പിള്ളയുടെ വെല്ലുവിളി. കേരളത്തിന് പുറത്തു നിന്ന് എം.എല്.എമാര് എത്തും. ഇവരെയൊക്കെ അറസ്റ്റ് ചെയ്ത് അടയ്ക്കാന് നിലവിലുള്ള ജയിലുകള് പോരാതെ വരും.
ശബരിമലയിലേക്ക് വഴി കാട്ടാന് പൊലീസ് സഹായം ആവശ്യമില്ലെന്നും ശ്രീധരന് പിള്ള പറഞ്ഞു. ശബരിമല വിഷയങ്ങളില് പ്രതിഷേധിച്ച് ബി.ജെ.പി പത്തനംതിട്ടയില് സംഘടിപ്പിച്ച സായാഹ്ന ധര്ണയിലാണ് ശ്രീധരന് പിള്ള പൊലീസിനെതിരെ വിമര്ശനം നടത്തിയത്.
ശബരിമലയിലേക്ക് പാസില്ലാതെ പോകുമെന്നായിരുന്നു ബി.ജെ.പി നേതാവ് എ.എന് രാധാകൃഷ്ണന്റെ വെല്ലുവിളി. ശബരിമലയിലും പരിസര പ്രദേശങ്ങളിലും പൊലീസ് ഏര്പ്പെടുത്തിയ നിയന്ത്രണങ്ങള് തീര്ത്ഥാടകര് ലംഘിക്കണമെന്നും രാധാകൃഷ്ണന് ആവശ്യപ്പെട്ടു.
അതേ സമയം ശബരിമല സമരം വ്യാപിപ്പിക്കുന്നതിനെ കുറിച്ച് ആലോചനയുണ്ടെന്ന് ശ്രീധരന് പിള്ള പറഞ്ഞു. ശബരിമല വിഷയം കേന്ദ്രത്തെ അറിയിച്ചിട്ടുണ്ട്. ശബരിമലയിലെ അസൗകര്യങ്ങള് പരിഹരിക്കാന് സര്ക്കാരിന് കഴിവില്ലെങ്കില് ബി.ജെ.പി അതിന് തയ്യാറാണെന്നും ശ്രീധരന് പിള്ള പറഞ്ഞു.
https://www.facebook.com/Malayalivartha
