മീ ടു മൂവ്‌മെന്റിന് പിന്തുണ പ്രഖ്യാപിച്ച് നടി സോനം കപൂര്‍. ദുരനുഭവങ്ങളെ തുറന്നുപറയുന്ന സ്ത്രീകളെ വിശ്വസിക്കാന്‍ തയ്യാറാകണമെന്നാണ് സോനം കപൂര്‍ പറയുന്നത്.

തങ്ങള്‍ നേരിട്ട ദുരനുഭവങ്ങള്‍ തുറന്നുപറയുന്നവരെ സമൂഹം വിശ്വസിക്കാന്‍ തയ്യാറാകണമെന്ന് സോനം കപൂര്‍ പറയുന്നു. സ്ത്രീ വിദ്വേഷികളും അധികാരം ദുരുപയോഗം ചെയ്യുന്നവരുമായ പുരുഷന്മാര്‍ ആരോപണമുന്നയിക്കുന്ന സ്ത്രീകളെ കുറ്റപ്പെടുത്തും. ചിലര്‍ സ്വാര്‍ത്ഥ നേട്ടങ്ങള്‍ക്കായി ഈ ക്യാംപെയ്‌നെ ദുരുപയോഗം ചെയ്യും. കുറ്റം തെളിയുന്നതുവരെ ആരോപണ വിധേയരെ നിഷ്‌കളങ്കരായി കാണാന്‍ കഴിയുന്നവര്‍ അപ്പുറത്തുളള സ്ത്രീകളെപ്പറ്റി ചിന്തിക്കുന്നില്ല. സോനം പറയുന്നു.

വ്യക്തിപരമായി വലിയ റിസ്‌ക് എടുത്തുകൊണ്ടാണ് അവര്‍ ഇക്കാര്യങ്ങള്‍ തുറന്നുപറയുന്നത്. വിശ്വാസം കൊണ്ടും പിന്തുണ കൊണ്ടുമെങ്കിലും നാം അവര്‍ക്കൊപ്പം നില്‍ക്കണം, സോനം കപൂര്‍ പറയുന്നു. അടുത്തിടെ മീ ടു ക്യാംപെയ്‌നുമായി ബന്ധപ്പെട്ട് തന്നെ ഞെട്ടിച്ച ഒരു സംഭവത്തെക്കുറിച്ചും നടി തുറന്നുപറഞ്ഞിരുന്നു. മീ ടു വെളിപ്പെടുത്തലുമായി എത്തിയ ഒരു നടി പറഞ്ഞ കാര്യങ്ങളാണ് സോനം കപൂര്‍ പറഞ്ഞത്.

അയാള്‍ കാണാന്‍ എത്ര സുന്ദരനാണ്. അയാള്‍ക്കെന്താണ് അങ്ങനെ ചെയ്യേണ്ട ആവശ്യം എന്നായിരുന്നു ആ നടി പറഞ്ഞത്. ആ സ്ത്രീയുടെ പ്രതികരണം തന്നെ ഞെട്ടിച്ചതായി സോനം കപൂര്‍ പറയുന്നു. മോശം അനുഭവത്തെ അതിജീവിച്ച ഒരാളോട് സമൂഹത്തിന്റെ മനോഭാവം ഇതാണല്ലോയെന്ന് വളരെ വേദനയോടെ ആണ് തിരിച്ചറിഞ്ഞതെന്നും സോനം കപൂര്‍ പറഞ്ഞു.