കാലാവധി കഴിഞ്ഞ മരുന്നുകള്‍ വിവരങ്ങള്‍ തിരുത്തി വീണ്ടും വിപണിയിലെത്തിക്കുന്ന സംഘങ്ങള്‍ സജീവം. വിഷയത്തില്‍ ഗൗരവമായ ഇടപെടല്‍ വേണമെന്ന് ഡല്‍ഹി ഹൈക്കോടതി കേന്ദ്രസര്‍ക്കാരിനോടാവശ്യപ്പെട്ടു. ഇതില്‍ നിയമഭേദഗതിക്കുള്ള നീക്കവും പുരോഗമിക്കുകയാണ്. മരുന്നുകളുടെ കാലാവധിയും വിലയും ഉള്‍പ്പെടെയുള്ള വിവരങ്ങള്‍ മായ്ച്ച് പുതിയവ രേഖപ്പെടുത്തുന്ന രീതി വിവരിക്കുന്ന വീഡിയോ അടുത്തിടെ സാമൂഹികമാധ്യമങ്ങളില്‍ പ്രചരിച്ചിരുന്നു. കൊല്‍ക്കത്തയിലും അഹമ്മദാബാദിലുമായി ഇത്തരം മരുന്നുകള്‍ പിടിക്കുകയും ചെയ്തു. ഡോക്ടര്‍മാര്‍ക്ക് നല്‍കുന്ന സാമ്പിള്‍ മരുന്നുകളില്‍ ചിലതും ഇത്തരത്തിലുള്ളതാണെന്ന് തെളിഞ്ഞിരുന്നു.


ഈ സാഹചര്യത്തിലാണ് അഭിഭാഷകനായ അമിത് സാഹ്‌നി കോടതിയില്‍ പൊതുതാത്പര്യ ഹര്‍ജി നല്‍കിയത്. പരാതി പരിഗണിച്ച ചീഫ് ജസ്റ്റിസ് രാജേന്ദ്ര മേനോനും ജസ്റ്റിസ് വി.കെ. റാവുവുമാണ് കേന്ദ്ര ആരോഗ്യ വകുപ്പിനും ഡ്രഗ്‌സ് കണ്‍ട്രോള്‍ ജനറലിനും നോട്ടീസയക്കാന്‍ ഉത്തരവിട്ടത്. കാലാവധി തീര്‍ന്ന മരുന്നുകള്‍ സംസ്‌കരിക്കുന്ന നിയമത്തിലെ അവ്യക്തതകളാണ് പ്രശ്‌നം. ഇത്തരം മരുന്നുകള്‍ കുഴിച്ചിടുകയോ വെള്ളത്തിലൊഴുക്കുകയോ ചെയ്യുന്നതും പതിവാണ്. ഇത്തരത്തില്‍ മണ്ണില്‍ ചേരുന്ന രാസപദാര്‍ഥങ്ങള്‍ ഭക്ഷണത്തിലൂടെ മനുഷ്യരടക്കമുള്ളവരിലെത്തുന്നതായും അറിഞ്ഞിട്ടുണ്ട്. ഉപയോഗശൂന്യമായ മരുന്നുകള്‍ പതിനഞ്ചുദിവസത്തിലധികം കടകളില്‍ സൂക്ഷിക്കാന്‍ പാടില്ലെന്ന വിധത്തില്‍ നിയമത്തില്‍ ഭേദഗതി വേണമെന്നാണ് വിദഗ്ധരുടെ ആവശ്യം

കാലാവധി കഴിഞ്ഞവയുടെ ഉത്തരവാദിത്വം നിര്‍മാതാക്കളില്‍ നിക്ഷിപ്തമാക്കുന്ന വിധത്തില്‍ നിയമം വേണമെന്നത് ഉന്നയിക്കപ്പെട്ടിട്ടുള്ളതാണ്. കേരളത്തില്‍ മൊത്തവ്യാപാരി സംഘടനയുടെ സഹകരണത്തോടെ സംവിധാനമുണ്ടാക്കാനും ശ്രമം നടക്കുന്നുണ്ട്. ഇതിന് സര്‍ക്കാരിന്റെ അനുമതി പ്രതീക്ഷിക്കുകയുമാണ്