ശബരിമല വിഷയത്തില്‍ ബിജെപി അധ്യക്ഷന്‍ അമിത്ഷാ വീണ്ടും പ്രതികരിച്ചിരിക്കുന്നു. പിണറായി വിജയന്‍ സര്‍ക്കാര്‍ ശബരിമല വിഷയം കൈകാര്യം ചെയ്ത രീതി നിരാശാജനകമെന്ന് അമിത് ഷാ പറഞ്ഞു. കുട്ടികള്‍ , പെണ്‍കുട്ടികള്‍, പ്രായമായവര്‍ എന്നിവരോട് പോലീസ് മനുഷ്യത്വരഹിതമായാണ് പോലീസ് പെരുമാറുന്നത്. ഭക്ഷണം, വെള്ളം, വിരിവയ്ക്കാനുള്ള സ്ഥലം, ശുദ്ധമായ ശുചിമുറികള്‍ എന്നിവയൊന്നും നല്‍കാതെ ഭക്തരെ പോലീസ് പീഡിപ്പിക്കുകയാണ് ചെയ്യുന്നത്. 

മുമ്പ് കണ്ണൂരില്‍ അമിത്ഷാ വന്നപ്പോള്‍ അമിത്ഷാ നടത്തിയ പ്രസ്താവന ഏറെ വിവാദമായിരുന്നു. ശബരിമല ഭക്തരെ അടിച്ചൊതുക്കി ആചാരങ്ങളും അനുഷ്ടാനങ്ങളും ഇല്ലാതാക്കാനാണ് സര്‍ക്കാര്‍ ശ്രമമെങ്കില്‍ കേരളത്തിലെ സര്‍ക്കാറിനെ വലിച്ച് താഴെയിടാന്‍ തയ്യാറാവേണ്ടിവരുമെന്ന് അമിത്ഷാ പറഞ്ഞിരുന്നു. ഭക്തര്‍ രാജ്യം ഒന്നാകെയുണ്ട്. ഹിന്ദു സമൂഹം എന്നും സ്ത്രീകള്‍ക്ക് തുല്യ പദവി നല്‍കിയിട്ടുണ്ട്. ശബരിമലയുടെ പേരില്‍ വിശ്വാസികളെ ദ്രോഹിക്കുന്ന നടപടി അനുവദിക്കില്ല. ഭക്ത ജനങ്ങളെ അടിച്ചൊതുക്കുന്ന സര്‍ക്കാര്‍ നടപടി തീക്കളിയാണ്. കോടതി ഉത്തരവ് അനുസരിച്ച് എന്തൊക്കെയാണ് നടപ്പാക്കിയതെന്നും അമിത് ഷാ ചോദിച്ചു.