''ഇവര്, ഈ കോണ്‍ഗ്രസ്സുകാര് ബിജെപിയുടെ ഒക്കച്ചങ്ങായി ആയി നടക്കുകയാണല്ലോ''. മുഖ്യമന്ത്രി പിണറായി വിജയൻ വാര്‍ത്താസമ്മേളനത്തില്‍ പറഞ്ഞ വാചകമാണിത്. ഇതിലെ 'ഒക്കച്ചങ്ങായി' എന്താണെന്നാണ് ഇപ്പോൾ പലരുടെയും സംശയം

തലശ്ശേരി, പാനൂര്‍ സമീപ പ്രദേശങ്ങളിൽ കല്യാണദിവസം കല്യാണച്ചെറുക്കന്റെ കൂടെ നിൽക്കുന്ന കൂട്ടുകാരനാണ് 'ഒക്കച്ചങ്ങായി'..ചെറുക്കനെ അണിയിച്ചു ഒരുക്കുന്നതും കൂടെ നിക്കുന്നതും എല്ലാം ഒക്കച്ചങ്ങായി' യാണ്. . ചെറുക്കന് പൗഡറൊക്കെ ഇട്ട് കൊടുക്കുക, ഷര്‍ട്ടിന്റെ ബട്ടണിട്ടു കൊടുക്കുക, കല്യാണമണ്ഡപം വരെ ഒപ്പം നടക്കുക, ആള്‍ക്കൂട്ടത്തെ കണ്ട് പുയ്യാപ്ലയ്ക്ക് സഭാകമ്പം വരുമ്പോള്‍ ചെറിയ തമാശയൊക്കെ പറഞ്ഞ് ആളെ ഒന്ന് ഉഷാറാക്കുക എന്നതൊക്കെ ഒക്കചങ്ങായിയുടെ ഡ്യൂട്ടിയാണ്

ചുരുക്കി പറഞ്ഞാൽ ഒരാളുടെ ജീവിതത്തിലെ ഏറ്റവും നിര്‍ണായക ദിവസങ്ങളിലൊന്നില്‍ ഓരോ നിമിഷവും ഒപ്പം നടക്കുന്ന ചങ്ങാതി ആണ് 'ഒക്കച്ചങ്ങായി' എന്നര്‍ത്ഥം.

അതുപോലെ ഇപ്പോൾ കോൺഗ്രെസ്സുകാർ ബി ജെ പിയുമായി കൂടിച്ചേരാനുള്ള മാർഗ്ഗമായാണോ ശബരിമലയെ കാണുന്നത് എന്നാണു പിണറായി പറയാതെ പറഞ്ഞത് . ശബരിമലയിൽ കോൺഗ്രസ് വിശ്വാസികളുടെ കൂടെയാണെന്ന് പറഞ്ഞത് ബി ജെ പി അനുകൂല തരംഗമാണെന്ന സൂചനയുണ്ട് പിണറായിയുടെ വാക്കുകളിൽ