ശബരിമലയിലെ പൊലീസ് നിയന്ത്രണം അടക്കമുള്ള പ്രശ്നങ്ങളില് ഭക്തര്ക്ക് ആശ്രയം ഹൈക്കോടതി, സര്ക്കാര് പൊലീസിനെ ഉപയോഗിച്ച് നടത്തുന്ന അനാവശ്യ നിയന്ത്രണങ്ങളും മറ്റും ഹൈക്കോടതി എടുത്ത് കളയുന്നു
ശബരിമലയിലെ പൊലീസ് നിയന്ത്രണം അടക്കമുള്ള പ്രശ്നങ്ങളില് ഭക്തര്ക്ക് ആശ്രയം ഹൈക്കോടതി മാത്രമാണ്. സര്ക്കാര് പൊലീസിനെ ഉപയോഗിച്ച് നടത്തുന്ന അനാവശ്യ നിയന്ത്രണങ്ങളും മറ്റും ഹൈക്കോടതിയില് അഭയം തേടിയാണ് ഭക്തര് മാറ്റിയെടുക്കുന്നത്. ഇതേ തുടര്ന്ന് സംസ്ഥാന സര്ക്കാരിന്റെ മുതിര്ന്ന അഭിഭാഷകനായ എ.ജി രണ്ട് തവണ കോടതി കയറി.
ദേവസ്വം ബോര്ഡിനോടും ഡി.ജി.പിയോടും സത്യവാങ്മൂലം സമര്പ്പിക്കാന് ഹൈക്കോടതി ആവശ്യപ്പെട്ടിരിക്കുകയാണ്. നിരോധനാജ്ഞയുടെ മറവിലാണ് പൊലീസ് ഭക്തരുടെ സ്വാതന്ത്ര്യം ഹനിക്കുന്നത്. ശരണംവിളിക്കാനോ വിരിവയ്ക്കാനോ നെയ്യാഭിഷേകം നടത്താനോ പോലും കഴിയാത്ത സാഹചര്യമായിരുന്നു ഉണ്ടായിരുന്നത്. അതെല്ലാം കോടതി ഇടപെട്ടാണ് നീക്കിയത്.
നെയ്യഭിഷേകത്തിന് ടിക്കറ്റെടുത്തവരെ പോലും സന്നിധാനത്ത് നിന്ന് പറഞ്ഞുവിടുന്ന സാഹചര്യമുണ്ടായിരുന്നു. നിലയ്ക്കലില് നിന്ന് സന്നിധാനത്തെത്തി ആറ് മണിക്കൂറിനുള്ളില് മടങ്ങണമെന്ന് ചിലര്ക്ക് പൊലീസ് നിര്ദ്ദേശം നല്കിയിട്ടുണ്ട്. ആരോഗ്യമുള്ള വ്യക്തിക്ക് പോലും അതിന് സാധ്യമല്ലാതിരിക്കെ ഈ നിയന്ത്രണവും എടുത്ത് കളയണമെന്ന് ആവശ്യപ്പെട്ട് ഭക്തര് ഹൈക്കോടതിയെ സമീപിച്ചിട്ടുണ്ട്. വലിയനടപ്പന്തലില് വിരിവയ്ക്കാന് ഭക്തരെ അനുവദിച്ചില്ലെന്ന് മാത്രമല്ല വെള്ളം കോരി ഒഴിക്കുകയും ചെയ്തു. ഇതോടെ കോടതി ഇടപെട്ടു. നടപ്പന്തലില് സ്ത്രീകളെയും കുട്ടികളെയും വൃദ്ധരെയും ഭിന്നശേഷിയുളളവരെയും വിരിവയ്ക്കാന് അനുവദിക്കാന് അനുവദിക്കണമെന്ന് നിര്ദ്ദേശിച്ചു. സര്ക്കാര് അതിന് വഴങ്ങി.
സ്ത്രീകളും കുട്ടികളും മര്ദ്ദനത്തിന് ഇരയായതിനാല് പൊലീസ് അനാവശ്യമിയന്ത്രണങ്ങള് ഒഴിവാക്കണമെന്നും പൊലീസ് ബാരക്കിലാണ് ഇരിക്കേണ്ടതെന്നും കോടതി വിമര്ശിച്ചിരുന്നു. തുടര്ന്നാണ് നിയന്ത്രണങ്ങള് ഒഴിവാക്കിയത്. നിരോധനാജ്ഞ ലംഘിച്ച യു.ഡി.എഫ് നേതാക്കളെ അറസ്റ്റ് ചെയ്യാത്തതും വിവാദമായിരുന്നു. ഇതേ തുടര്ന്നാണ് ഭക്തരിന്ന് വീണ്ടും കോടതിയെ സമീപിച്ചത്. യഥാര്ത്ഥഭക്തരെയും മറ്റുള്ളവരെയും എങ്ങനെ തിരിച്ചറിയുമെന്നും കോടതി ചോദിച്ചപ്പോള് സര്ക്കാരിന് ഉത്തരംമുട്ടി. എ.ജി വിശദമായ സത്യവാങ്മൂലം നല്കുമെന്ന് അറിയിച്ചു. നിലയ്ക്കലില് നിന്ന് പമ്പയിലേക്ക് ഓരോ മിനിറ്റ് ഇടവിട്ട് സര്വ്വീസ് നടത്താമെന്ന കെ.എസ്.ആര്.ടി.സിയുടെ ഉറപ്പ് പൊലീസ് തടസപ്പെടുത്തിയതിനെതിരെയും കോടതി രംഗത്ത് വന്നെങ്കിലും പൊലീസ് ഇതുവരെ ആ നിയന്ത്രണം എടുത്ത് കളഞ്ഞില്ല.
https://www.facebook.com/Malayalivartha