ശബരിമലയിലെ സ്ഥിതി പരമദയനീയമെന്ന് ഹൈക്കോടതി. അഡ്വക്കേറ്റ് ജനറല്‍ കാര്യങ്ങള്‍ വിശദീകരിച്ചെങ്കിലും അദ്ദേഹത്തെ കോടതി വിമര്‍ശിച്ചു. എ.ജി പറയുന്നത് പോലെയല്ല കാര്യങ്ങളെന്നും കോടതി ചൂണ്ടിക്കാട്ടി. ചില പൊലീസ് ഉദ്യോഗസ്ഥര്‍ നിയമം കയ്യിലെടുക്കുകയാണ്. ഹൈക്കോടതി നിര്‍ദ്ദേശങ്ങള്‍ പാലിക്കുന്നില്ല. രേഖാമൂലം ഉത്തരവിടാത്തത് നിങ്ങളിലുള്ള വിശ്വാസം കൊണ്ടാണ്. കോടതി നിര്‍ദ്ദേശങ്ങള്‍ മനസിലായോ? നിരോധനാജ്ഞ നടപ്പാക്കിയത് ശരിയായ രീതിയിലാണോ? നിരോധനാജ്ഞയുടെ പേരിലുള്ള നിയന്ത്രണങ്ങള്‍ നിയമപരമാണോ? കഴിഞ്ഞ ദിവസം മുംബയില്‍ നിന്ന് വന്ന ഭക്തര്‍ മടങ്ങിയതെന്ത് കൊണ്ട്? ഇതരസംസ്ഥാന ഭക്തര്‍ ദര്‍ശനം നടത്താതെ മടങ്ങിയോ എന്നും കോടതി ചോദിച്ചു.

മണ്ഡലകാലത്ത് സംഘര്‍ഷത്തിന് സാധ്യതയുണ്ടെന്ന് രഹസ്യാന്വേഷണ റിപ്പോര്‍ട്ടുണ്ട്. ചിത്തിരആട്ട വിശേഷത്തിനും തുലാമാസ പൂജയ്ക്കും സംഘര്‍ഷം ഉണ്ടായി. ഇതാണ് നിയന്ത്രണം ഏര്‍പ്പെടുത്താന്‍ കാരണമായതെന്നും എ.ജി പറഞ്ഞു. എ.ജിയുടെ സ്ഥാനം മഹനീയമാണ്. കോടതി നിര്‍ദ്ദേശങ്ങള്‍ എ.ജി ബന്ധപ്പെട്ട ഉദ്യോഗസ്ഥരെ അറിയിച്ചില്ലേ എന്നും കോടതി ചോദിച്ചു. എ.ജി പറയുന്നത് പോലെയല്ല ശബരിമലയിലെ കാര്യങ്ങള്‍ പരമദയനീയമാണെന്നും കോടതി നിരീക്ഷിച്ചു. എ.ജിക്ക് വലിയ സ്ഥാനമാണ് കോടതിയിലുള്ളതെന്നും കോടതി ഓര്‍മിപ്പിച്ചു. ശബരിമലയിലെ നിയന്ത്രണങ്ങള്‍ നീക്കണമെന്ന് ആവശ്യപ്പെട്ട് അഞ്ച് പേര്‍ നല്‍കിയ ഹര്‍ജി പരിഗണിച്ചപ്പോഴാണ് ഇക്കാര്യങ്ങള്‍ കോടതി പറഞ്ഞത്.

യഥാര്‍ത്ഥ ഭക്തര്‍ക്ക് ദര്‍ശനം നടത്താന്‍ പ്രയാസമില്ലെന്നും ശരണമന്ത്രങ്ങള്‍ മുഴക്കുന്നതിന് തടസമില്ലെന്ന് ഐ.ജി വിജയ് സാഖറെ കോടതിയില്‍ റിപ്പോര്‍ട്ട് നല്‍കി. എല്ലാവര്‍ക്കും സുഗമമായ ദര്‍ശനം നടത്താനാവണമെന്ന് കോടതി നിര്‍ദ്ദേശിച്ചു. പ്രശ്‌നത്തില്‍ ആരെയും പഴിചാരാനില്ലെന്നും കോടതി പറഞ്ഞു. പ്രതിഷേധങ്ങള്‍ കാരണമാണ് ശബരിമലയില്‍ കര്‍ശനനിയന്ത്രണങ്ങള്‍ ഏര്‍പ്പെടുത്തിയതെന്ന് എ.ജി കോടതിയെ അറിയിച്ചു. ശരണമന്ത്രങ്ങള്‍ ചൊല്ലുന്നത് തടസപ്പെടുത്തരുതെന്നും കോടതി നിര്‍ദ്ദേശിച്ചു. രണ്ടാം തവണയാണ് കോടതി എ.ജിയെ വിളിച്ചുവരുത്തുന്നത്.