ശബരിമല രണ്ടു ദിവസമായി ശാന്തമാണെങ്കിലും നിയന്ത്രണത്തില്‍ കാര്യമായ അയവ് വരുത്തിയിട്ടില്ല. കാര്‍ത്തിക നാളായ വെള്ളിയാഴ്ച അനുഭവപ്പെട്ട തിരക്ക് ഇന്നലെയുണ്ടായില്ല. 34,574 തീര്‍ത്ഥാടകരാണ് ഇന്നലെ വൈകിട്ട് ഏഴുവരെ മല കയറിയത്. വെള്ളിയാഴ്ച അര ലക്ഷം തീര്‍ത്ഥാടകരെത്തിയിരുന്നു.
പമ്പയിലും നിലയ്ക്കലിലും സ്ഥിതിഗതികള്‍ ശന്തമാണ്.
നിലയ്ക്കലില്‍ വാഹന പരിശോധന തുടരുകയാണ്. പമ്പയില്‍ ആഞ്ജനേയ ഓഡിറ്റോറിയത്തില്‍ ഭക്തര്‍ വിരിവയ്ക്കുന്നുണ്ട്. സന്നിധാനത്ത് നടപ്പന്തലില്‍ വിരിവയ്ക്കാന്‍ അനുവാദം നല്‍കിയിട്ടില്ല. മാംഗുണ്ട അയ്യപ്പനിലയം, മാളികപ്പുറം നടപ്പന്തല്‍, പ്രസാദം നടപ്പന്തല്‍, മരാമത്ത് ഓഫീസിന് എതിര്‍വശം, വടക്കേ നട, ശബരി ഗസ്റ്റ് ഓഫീസിന് എതിര്‍വശം, പാണ്ടിത്താവളം എന്നിവിടങ്ങളില്‍ വിരികേന്ദ്രം അനുവദിച്ചിട്ടുണ്ട്.

സന്നിധാനത്ത് ഇന്നലെ ഐ.ജി വിജയ് സാക്കറെ സുരക്ഷാ നടപടികള്‍ അവലോകനം ചെയ്തു. ഭക്തര്‍ക്ക് സുഗമമായ ദര്‍ശനം ഉറപ്പുവരുത്തി സുരക്ഷാ ക്രമീകരണം തുടരുമെന്ന് അദ്ദേഹം പറഞ്ഞു.