ശബരിമലയിലെ സ്ത്രീ പ്രവേശനത്തില്‍ ഊളിയിട്ട സര്‍ക്കാരിന് ഹൈക്കോടതിയില്‍ നിന്ന് തിരിച്ചടി കിട്ടിയതിനെ തുടര്‍ന്ന് ഇന്ന് സുപ്രീംകോടതിയില്‍ ഹര്‍ജി നല്‍കില്ല. വിധി നടപ്പാക്കുന്നതിലെ പ്രായോഗിക ബുദ്ധിമുട്ട് സംബന്ധിച്ച് ഇന്ന് സുപ്രീംകോടതിയില്‍ ഹര്‍ജി നല്‍കാന്‍ നേരത്തെ തീരുമാനിച്ചിരുന്നതാണ്. എന്നാല്‍ യുവതികള്‍ ശബരിമല ദര്‍ശനത്തിനെത്തിയാല്‍ എന്തൊക്കെ സുരക്ഷാ നടപടികളാണ് സര്‍ക്കാര്‍ സ്വീകരിച്ചിരിക്കുന്നത്, അതേക്കുറിച്ചുള്ള പദ്ധതി റിപ്പോര്‍ട്ട് മുദ്രവെച്ച കവറില്‍ നല്‍കണമെന്നും കോടതി ആവശ്യപ്പെട്ടു. മാത്രമല്ല ശബരിമലയിലെ സുരക്ഷയ്ക്കായി വനിതാ ഐ.പി.എസ് ഓഫീസറെ നിയമിക്കുമെന്ന് സര്‍ക്കാര്‍ ആദ്യം അറിയിച്ചിരുന്നു. പിന്നീട് അതേക്കുറിച്ചൊന്നും പറയുന്നില്ലെന്നും കോടതി ചോദിച്ചതോടെ സര്‍ക്കാര്‍ വെട്ടിലായി.

യുവതീപ്രവേശനം മുന്‍നിര്‍ത്തി ഏര്‍പ്പെടുത്തിയ നിരോധനാജ്ഞ ഉള്‍പ്പെടെ ഹൈക്കോടതി ശരിവെച്ച സാഹചര്യത്തില്‍ പ്രായോഗിക ബുദ്ധിമുട്ട് കാട്ടി സുപ്രീംകോടതിയെ സമീപിച്ചാല്‍ തിരിച്ചടിയാകുമെന്ന് സര്‍ക്കാര്‍ മനസിലാക്കി. ഡ്യൂട്ടിയിലുള്ള പൊലീസുകാരെ ജാതിയുടെയും മതത്തിന്റെയും പേരില്‍ അധിക്ഷേപിക്കുന്നു, ഹൈക്കോടതിയില്‍ നിന്ന് പൊലീസ് ഉദ്യോഗസ്ഥര്‍ക്കെതിരെ വ്യക്തിപരമായ പരാമര്‍ശങ്ങള്‍ നിരന്തരം ഉണ്ടാകുന്നു, വലത്പക്ഷതീവ്ര സംഘടനകള്‍ പ്രക്ഷോഭം സംഘടിപ്പിക്കുന്നു, ഹൈക്കോടതി മൂന്നംഗ നിരീക്ഷക സമിതിയെ നിയോഗിച്ചു തുടങ്ങിയ കാര്യങ്ങള്‍ ചൂണ്ടിക്കാട്ടിയാണ് സുപ്രീംകോടതിയില്‍ ഹര്‍ജി നല്‍കാന്‍ തീരുമാനിച്ചിരുന്നത്. ഇതിനായി മുതിര്‍ന്ന അഭിഭാഷകനായ ദേവിഷ് ഗുപ്ത ഹര്‍ജിയുടെ കരട് തയ്യാറാക്കി മുഖ്യമന്ത്രിക്ക് അയച്ചുകൊടുത്തിരുന്നു.

എന്നാല്‍ ഇന്നലെ വൈകുന്നേരം ഹൈക്കോടതിയില്‍ നിന്ന് സ്ത്രീപ്രവേശനത്തിന് അനുകൂലമായ തീരുമാനം ഉണ്ടായതോടെ സര്‍ക്കാര്‍ വീണ്ടും യുവതീപ്രവേശനത്തിലേക്ക് തിരിയാന്‍ തീരുമാനിക്കുകയായിരുന്നു. നിരോധനാജ്ഞ ഹൈക്കോടതി ശരിവെച്ചതാണ് സര്‍ക്കാരിന് ഉണ്ടായ വലിയ നേട്ടം. മാത്രമല്ല യുവതീപ്രവേശനം സംബന്ധിച്ച കാര്യങ്ങളും അറിയിക്കണമെന്ന് നിര്‍ദ്ദേശിച്ചു. ഇതോടെ സുപ്രീംകോടതി വിധി നടപ്പാക്കണമെന്ന് ഹൈക്കോടതിയും ഉറച്ച് നില്‍്ക്കുന്നതോടെ സര്‍ക്കാരിന് രാഷ്ട്രീയമായി നേട്ടമായി.