ഗുണനിലവാരമുള്ളതും ശുചിത്വത്തോടുമുള്ള മത്സ്യവുമായി സംസ്ഥാന ഫിഷറീസ് വകുപ്പിന്റെ 'അന്തിപ്പച്ച' മൊബൈല്‍ ഫിഷ്മാര്‍ട്ട് പ്രവര്‍ത്തനമാരംഭിക്കുന്നു. ശുദ്ധമത്സ്യം എത്തിക്കാനുള്ള ഫിഷറീസ് വകുപ്പ് പ്രവര്‍ത്തനത്തിന്റെ ഭാഗമായാണിത്. മത്സ്യം കേടാകാതിരിക്കാനുള്ള ഫ്രീസിങ് സംവിധാനം 'അന്തിപ്പച്ച' വാഹനത്തിലുണ്ടാകും.
രാസപദാര്‍ഥങ്ങള്‍ ചേര്‍ക്കാത്ത മത്സ്യം പൊതുജനത്തിന് ലഭ്യമാക്കുകയാണ് പദ്ധതിയുടെ മുഖ്യലക്ഷ്യം. ക്രിസ്മസ്, നവവത്സര സമ്മാനമായാണ് പദ്ധതിയെന്ന് ഫിഷറീസ് മന്ത്രി ജെ. മേഴ്‌സിക്കുട്ടിയമ്മ അറിയിച്ചു. തദ്ദേശീയരായ പരമ്പരാഗത മത്സ്യത്തൊഴിലാളികളില്‍നിന്നാണ് മത്സ്യം സംഭരിക്കുക. അതാത് ദിവസം സംഭരിച്ച് വില്‍പന നടത്താനാണ് തീരുമാനം.
തുറസ്സായ സ്ഥലങ്ങളിലും താല്‍ക്കാലിക ഷെഡ് കെട്ടിയും വൃത്തിഹീനമായി കൂട്ടിയിട്ടും മറ്റും വില്‍പന നടത്തുന്ന പഴഞ്ചന്‍ ശൈലിയില്‍നിന്ന് മാറി, വൃത്തിയുള്ള അന്തരീക്ഷത്തിലും പശ്ചാത്തല സൗകര്യങ്ങളിലും ശുദ്ധമായ മത്സ്യം വിപണിയില്‍ എത്തിക്കുകയാണ് ഇതിലൂടെ ചെയ്യുന്നത്.

മുഴുവനായ മത്സ്യം, ക്ലീന്‍ ചെയ്ത് പാചകത്തിന് തയാറാക്കിയ റെഡി ടു കുക്ക് മത്സ്യം, റെഡി ടു ഈറ്റ് മത്സ്യം, മറ്റു മത്സ്യ ഉല്‍പന്നങ്ങള്‍ എന്നിവ ന്യായവിലയില്‍ ഗുണഭോക്താക്കള്‍ക്ക് ലഭ്യമാക്കും. ആരോഗ്യത്തിന് ഹാനികരമാകുന്ന അമോണിയ, ഫോര്‍മലിന്‍ ഉള്‍പ്പെടെയുള്ള രാസവസ്തുക്കള്‍ തുടങ്ങിയവ ചേര്‍ക്കാത്ത ഗുണനിലവാരമുള്ള പച്ച മത്സ്യങ്ങളും ഉണക്ക മത്സ്യങ്ങളും മൂല്യവര്‍ധിത ഉല്‍പന്നങ്ങളും ഈ വാഹനത്തില്‍നിന്ന് ലഭിക്കും.

ചാള, അയല, നെത്തോലി, നെയ്മീന്‍, ചൂര, വാള, ആവോലി, ഞണ്ട്, കക്ക, കൊഞ്ച് എന്നിവ അതാത് ദിവസത്തെ ലഭ്യതക്കനുസൃതമായി അന്തിപ്പച്ചയിലുണ്ടാകും.
ആദ്യഘട്ടമെന്ന നിലയില്‍ ഡിസംബര്‍ ഒന്നുമുതല്‍ കൊല്ലം ജില്ലയിലാണ് മൊബൈല്‍ ഫിഷ് മാര്‍ട്ട് പ്രവര്‍ത്തനമാരംഭിക്കുന്നത്. സ്വീകാര്യതയും വിപണന പുരോഗതിയും വിലയിരുത്തിയശേഷം എല്ലാ ജില്ലകളിലേക്കും വ്യാപിപ്പിക്കും. കൊല്ലം ജില്ലയിലെ ഏറ്റവും തിരക്കുള്ള ആറു ടൗണുകള്‍ കേന്ദ്രീകരിച്ച് വിപണനത്തിനാണ് ഇപ്പോള്‍ പദ്ധതി തയ്യാറാക്കിയത്‌ .