വനിതാ ടി20 ലോകകപ്പിൽ പാകിസ്ഥാനെതിരെ ഇന്ത്യയ്ക്ക് 64 റൺസ് വിജയം. ഇന്ത്യ ഉയർത്തിയ 171 റൺസ് വിജയലക്ഷ്യം പിന്തുടർന്ന പാകിസ്ഥാൻ 17 ഓവറിൽ 106 റൺസ് എടുക്കുന്നതിനിടെ എല്ലാവരും പുറത്താകുകയായിരുന്നു. 35 പന്തിൽ 42 റൺസെടുത്ത മുനീബ അലിയാണ് പാകിസ്ഥന്റെ ടോപ് സ്‌കോറർ. പാകിസ്ഥാൻ നിരയിൽ 4 താരങ്ങൾ മാത്രമെ രണ്ടക്കം കടന്നുള്ളു. മറുപടി ബാറ്റിങ്ങിൽ കരുതലോടെയുള്ള തുടക്കമാണ് പാകിസ്ഥാൻ നടത്തിയതെങ്കിലും കൃത്യമായ ഇടവേളകളിൽ വിക്കറ്റ് വീണ് തിരിച്ചടിയായി. മധ്യ ഓവറുകളിൽ ഇന്ത്യൻ വനിതകൾ തുടരെ തുടരെ വിക്കറ്റുകൾ വീഴ്ത്തിയത് പാകിസ്ഥാന് തിരിച്ചടിയായി.

നേരത്തെ നിശ്ചിത ഓവറിൽ ആറ് വിക്കറ്റ് നഷ്ടത്തിലാണ് ഇന്ത്യ 170 റൺസ് കരസ്ഥമാക്കിയത്. അർധ സെഞ്ചുറി നേടിയ സ്മൃതി മന്ദാനയും 36 റൺസ് അടിച്ച ഹർമൻപ്രീത് കൗറുമാണ് ഇന്ത്യക്ക് അടിത്തറ പാകിയത്.

രണ്ടുപേരും മൂന്നാം വിക്കറ്റിൽ 91 റൺസ് കൂട്ടുകെട്ടുണ്ടാക്കി. 44 പന്തിൽ ഒമ്പത് ഫോറിന്റേയും രണ്ട് സിക്സറുകളുടേയും അകമ്പടിയോടെയാണ് സ്മൃതി 68 റൺസ് അടിച്ചുകൂട്ടിയത്. 35 പന്തിൽ നാല് ഫോർ സഹിതമായിരുന്നു ഹർമൻപ്രീതിന്റെ 36 റൺസ്. അവസാന ഓവറുകളിൽ റിച്ചാ ഘോഷിന്റെ വെടിക്കെട്ടും ഇന്ത്യയുടെ സ്‌കോറുയർത്തുകയായിരുന്നു.