ശബരിമല യുവതീപ്രവേശനവുമായി ബന്ധപ്പെട്ട് സര്‍ക്കാര്‍ വിളിച്ച നവോത്ഥാന സംഗമത്തില്‍ പങ്കെടുക്കാനെത്തിയവരെ ജാതിസംഘടനകളാക്കിയും സമൂഹത്തിലെ എടുക്കാ ചരക്കുകളെ മുഖ്യമന്ത്രി മഹത്വവല്‍ക്കരിച്ചെന്നും പ്രതിപക്ഷനേതാവ് പ്രസ്താവിച്ചത് സാമാന്യ മര്യാദയുടെ ലംഘനമാണെന്ന് മുഖ്യമന്ത്രി പിണറായി വിജയന്‍.

സംഘടനാകളോടും നേതാക്കന്‍മാരോടും എന്ത് മാത്രം പുശ്ചമനോഭാവം വെച്ചുപുലര്‍ത്തുന്നു എന്ന് മനസിലാകും. വനിതാ മതില്‍ പൊളിക്കുമെന്ന് അദ്ദേഹം പറഞ്ഞത് സ്ത്രീവിരുദ്ധമായ പ്രസ്താവനയാണ്. യാഥാസ്ഥിതിക മനോഭാവം അദ്ദേഹം ഇപ്പോഴും വെച്ചുപുലര്‍ത്തുന്നു എന്നതിന് ഉദാഹരണമാണ്. വനിതകള്‍ പാലിയംസമരത്തിലും മാറുമറയ്ക്കല്‍ സമരത്തിലും നേടിയ വിജയത്തെ അപഹസിക്കുകയാണ് പ്രതിപക്ഷനേതാവ് ചെയ്തതെന്ന് ആരെങ്കിലും കുറ്റംപറഞ്ഞാല്‍ അവരെ കുറ്റം പറയാനാകില്ലെന്നും മുഖ്യമന്ത്രി പറഞ്ഞു.

പ്രതിപക്ഷത്തുള്ള കോണ്‍ഗ്രസ് ഉള്‍പ്പെടെയുള്ള നേതാക്കന്‍മാര്‍ക്ക് ഇക്കാര്യത്തിലുള്ള ഇതേ അഭിപ്രായമാണോ എന്നത് സമൂഹം അറിയുന്നത് നല്ലതാണ്. നവോത്ഥാന ചരിത്രത്തിനെതിരായ കുറ്റകൃത്യമാണ് പ്രതിപക്ഷനേതാവ് നടത്തിയത്. കോണ്‍ഗ്രസ് എന്തുകൊണ്ട് നവോത്ഥാനത്തിനെതിരെ മുഖംതിരിച്ച് നില്‍ക്കുന്നു എന്ന് അവരുടെ മനോഭാവത്തില്‍ നിന്ന് വ്യക്തമാണ്. സര്‍ക്കാര്‍ വിളിച്ച യോഗം ജാതിസമ്മേളനമാക്കി പ്രതിപക്ഷനേതാവ് മാറ്റി. ഈ മനോഭാവം മാറ്റണമെന്ന് അഭ്യര്‍ത്ഥിക്കുന്നു. യോഗം തീരുമാനിച്ച വനിതാമതില്‍ പൊളിക്കണമെന്നാണ് അദ്ദേഹം പറഞ്ഞത്. അത് സര്‍ക്കാരിന്റെ തീരുമാനമല്ല. യോഗതീരുമാനമാണ്. യോഗത്തില്‍ വരാത്ത സംഘടനകള്‍ മോശക്കാരാണെന്ന അഭിപ്രായമില്ല. അവര്‍ വന്നിരുന്നെങ്കില്‍ അവരും പ്രതിപക്ഷനേതാവിന്റെ അധിക്ഷേപത്തിന് ഇരയായേനെ.

നിര്‍ഭാഗ്യവശാല്‍ മന്നത്ത് പത്മനാഭന്റെ പാരമ്പര്യം എന്‍.എസ്.എസ് സ്വീകരിക്കുന്നില്ല, അവര്‍ തിരുത്തുമെന്നാണ് സര്‍ക്കാര്‍ കരുതുന്നത്. വിളിച്ച സംഘടനകളെല്ലാം നവോത്ഥാന കാലത്ത് വലിയ പങ്ക് വഹിച്ചവരാണ്. അതുകൊണ്ടാണ് അവരുടെ പിന്‍മുറക്കാരായ നേതാക്കളെ വിളിച്ചത്. അവരെ ജാതി സംഘടനകള്‍ എന്ന് വിളിച്ചത് ധിക്കാരപരമാണ്. അദ്ദേഹത്തിന്റെ പദവിക്കും പാര്‍ട്ടിക്കും ചേര്‍ന്ന നിലപാടല്ല. പദവിക്ക് ചേരാത്ത പദപ്രയോഗമാണ് അദ്ദേഹം നടത്തിയതെന്നും മുഖ്യമന്ത്രി കുറ്റപ്പെടുത്തി. ഇത് നവോത്ഥാന മൂല്യങ്ങളോടും സംഘടനകളോടും ഗുരുശ്രേഷ്ഠന്‍മാരോടും ഉത്പതിഷ്ണുക്കളോടുമുള്ള അപകീര്‍ത്തിപരമായ നിലപാടായാണ് കാണുന്നതെന്നും മുഖ്യമന്ത്രി ആരോപിച്ചു.