കണ്ണൂര് രാജ്യാന്തര വിമാനത്താവളത്തില് ജോലി നല്കാത്തതില് പ്രതിഷേധിച്ച് വിമാനത്താവള കവാടം ഉപരോധിച്ച് പ്രദേശവാസികള്
കണ്ണൂര് രാജ്യാന്തര വിമാനത്താവളത്തില് പ്രദേശവാസികള്ക്ക് ജോലി നല്കാത്തതില് പ്രതിഷേധിച്ച് വിമാനത്താവള കവാടം ഉപരോധിച്ചു. ഇന്നു രാവിലെയാണ് ഡി.വൈ.എഫ്.ഐ നേതൃത്വത്തില് കല്ലേരിക്കരയിലെ കവാടം ഉപരോധിച്ചത്. പിന്നീട് കിയാല് എം.ഡിക്ക് നിവേദനം നല്കാമെന്ന പോലീസിന്റെ ഉറപ്പില്മേല് രണ്ടു മണിക്കൂറിനു ശേഷം ഉപരോധം അവസാനിപ്പിക്കുകയായിരുന്നു.
വിമാനത്താവളം നിര്മാണം ആരംഭിക്കുന്നത് മുതല് ജോലിയിലുള്ളവരെ പരിഗണിക്കാതെ ജില്ലയിലെ വിവിധ മേഖലയിലുള്ളവര്ക്ക് ജോലി നല്കിയതില് പ്രതിഷേധിച്ചാണ് കല്ലേരിക്കര പ്രദേശവാസികള് പ്രക്ഷോഭത്തിനിറങ്ങിയത്. സമരത്തിന്റെ ആദ്യ ഘട്ടമെന്ന നിലയിലാണ് കവാടം ഉപരോധിച്ചത്. രാവിലെ ഏഴുമണിയോടെ കവാടത്തിലെത്തിയ സ്ത്രീകള് അടക്കമുള്ളവര് വിമാനത്താവളത്തിലേക്കുള്ള റോഡ് ഉപരോധിക്കുകയായിരുന്നു. സ്ഥലത്തെത്തിയ മട്ടന്നൂര് എസ്.ഐ ശിവന് ചോടേത്ത് സമരക്കാരുമായി സംസാരിച്ചുവെങ്കിലും സമരത്തില് നിന്നു പിന്മാറിയില്ല.
തുടര്ന്ന് കിയാല് എം.ഡിയുമായി പൊലീസ് സംസാരിച്ചു. എം.ഡിയെ കണ്ടു നിവേദനം നല്കാന് സൗകര്യം ഏര്പ്പെടുത്തിയതോടെ ഒമ്പതോടെ ഉപരോധം അവസാനിപ്പിക്കുകയായിരുന്നു.വര്ഷങ്ങളായി വിമാനത്താവളത്തില് വിവിധ മേഖലയില് ജോലി ചെയ്യുന്ന 170 ഓളം പേരെ പരിഗണിക്കാതെ പുറത്തുള്ളവര്ക്ക് ജോലി നല്കുകയായിരുന്നുവത്രെ. ജോലി ലഭിക്കുന്നതിനു കിയാല് ആവശ്യപ്പെട്ടതു പ്രകാരം അപേക്ഷയു പോലീസിന്റെ ക്ലിയറന്സ് സര്ട്ടിഫിക്കറ്റ് ഉള്പ്പെടെ നല്കിയെങ്കിലും പരിഗണിച്ചില്ലെന്നു സമരക്കാര് പറയുന്നു. 29 വയസു മുതല് 60 വയസുവരെയുള്ള സ്ത്രീകളാണ് വിമാനത്താവളത്തില് ക്ലീനിംഗിനും ചെടിനടലിനും ഉള്പ്പെടെയുള്ള ജോലികള് ചെയ്യുന്നത്. വര്ഷങ്ങളോളം വെയിലും മഴയും കൊണ്ടു ജോലി ചെയ്ത തങ്ങളെ പരിഗണിച്ചില്ലെങ്കില് ശക്തമായ സമരപരിപാടികള് ആരംഭിക്കുമെന്നു തൊഴിലാളികള്.
https://www.facebook.com/Malayalivartha
