തങ്ങളുടെ യുവതികള്‍ ദര്‍ശനത്തിനെത്തുമെന്ന് ഭക്തരെ മുന്‍കൂട്ടി അറിയിച്ച് ശബരിമലയില്‍ സംഘര്‍ഷം സൃഷ്ടിക്കാന്‍ തീവ്രഇടത് സംഘടനകള്‍ ശ്രമിക്കുന്നെന്ന് ഇന്റലിജന്‍സ് റിപ്പോര്‍ട്ട്. വന്നവര്‍ ആക്ടിവിസ്റ്റുകളാണ്. മനിതി സംഘം പൊലീസ് പറഞ്ഞത് അനുസരിച്ചില്ല. പ്രശ്‌നങ്ങള്‍ സൃഷ്ടിക്കാനാണ് ശ്രമിച്ചത്.

നിലയ്ക്കല്‍ മുതല്‍ സന്നിധാനം വരെ തീവ്രഹിന്ദു സംഘടനകള്‍ ക്യാമ്പ് ചെയ്യുന്നുണ്ട്. അവരെ അറിയിച്ച ശേഷമാണ് ഇടത് തീവ്രസംഘടനകള്‍ അവരുടെ യുവതികളെ ദര്‍ശനത്തിനെത്തിച്ചത്. യുവതികളെ മലകയറ്റിയ ശേഷം തങ്ങളാണ് നവോത്ഥാനം നടപ്പാക്കിയതെന്ന് വരുത്തിത്തീര്‍ക്കാനാണ് ഇവര്‍ ശ്രമിക്കുന്നതെന്നും റിപ്പോര്‍ട്ടില്‍ പറയുന്നു.

ദര്‍ശനം നടത്തുക എന്നതിന് ഉപരി സംഘര്‍ഷം സൃഷ്ടിക്കുകയും മാധ്യമശ്രദ്ധ നേടുകയുമാണ് മനിതി ഉള്‍പ്പെടെ ശബരിമലയില്‍ എത്തിയ സ്ത്രീകളുടെ ശ്രമം. ഇവരെല്ലാവരും ആക്ടിവിസ്റ്റുകളാണ്. ഫെയിസ്ബുക്ക് അടക്കമുള്ള സമൂഹമാധ്യമങ്ങളിലൂടെ മുന്നറിയിപ്പ് നല്‍കിയ ശേഷമാണ് ഭൂരിപക്ഷം പേരും ശബരിമലയിലെത്തുന്നത്. ഇത് പ്രതിഷേധക്കാരായ തീവ്രഹിന്ദു സംഘടനകള്‍ക്ക് ഊര്‍ജ്ജം പകരുന്നു. അവര്‍ക്ക് മറ്റ് ഭക്തരെ കൂടെ കൂട്ടാനാകുന്നെന്നും റിപ്പോര്‍ട്ടില്‍ വ്യക്തമാക്കുന്നു. നിലയ്ക്കല്‍ മുതല്‍ സന്നിധാനം വരെ തീവ്രഹൈന്ദവ സംഘടനകളുടെ നിരീക്ഷകരുണ്ട്. അവര്‍ പ്രതിഷേധങ്ങളിലൂടെ ഭക്തരെ തങ്ങള്‍ക്കൊപ്പം ചേര്‍ക്കുകയാണ്. മണ്ഡലകാലത്തെ പ്രധാന ദിവസങ്ങളിലൊന്നായ തങ്കഅങ്കി കൊണ്ടുവരുന്ന ദിവസങ്ങളില്‍ തന്നെ മനിതി സംഘവും മറ്റും ദര്‍ശനത്തിനായി തെരഞ്ഞെടുത്തതും ശ്രദ്ധലഭിക്കാനാണെന്നും റിപ്പോര്‍ട്ടില്‍ പറയുന്നു.

ചിത്തരആട്ടവിശേഷം മാസപൂജ എന്നീ സമയങ്ങളില്‍ ഒഴികെ യുവതികള്‍ക്ക് ശബരിമലയില്‍ ദര്‍ശനം നടത്താനാവുമെന്നും അതിനുള്ള സാഹചര്യം നിലവിലുണ്ടെന്നും റിപ്പോര്‍ട്ടില്‍ പറയുന്നു. മുന്‍ കൂട്ടി അറിയിക്കാതെ യുവതികള്‍ ദര്‍ശനത്തിനെത്തിയാല്‍ വലിയ പ്രതിഷേധങ്ങള്‍ ഉണ്ടാകാന്‍ സാധ്യതയില്ലെന്നും രഹസ്യാന്വേഷണ വിഭാഗം പറയുന്നു. മാവോയിസ്റ്റുകളുടെയും നക്‌സലൈറ്റുകളുടെയും സാനിധ്യത്തെ കുറിച്ച് പന്തളം കൊട്ടാരവും ദേവസ്വം പ്രസിഡന്റും വ്യക്തമാക്കിയത് ഇത് മനസിലാക്കിയാണ്. ചിലര്‍ നഷ്ടപ്രതാപം വീണ്ടെടുക്കാന്‍ ശ്രമിക്കുന്നെന്ന് ദേവസ്വം പ്രസിഡന്റ് പറഞ്ഞത് നക്‌സലൈറ്റുകളെ കുറിച്ചാണ്. ഇക്കാര്യങ്ങളെല്ലാം മനസിലാക്കിയാണ് സര്‍ക്കാര്‍ ഈ യുവതികളെ ആരെയും ദര്‍ശനം നടത്താതെ മടക്കി അയച്ചത്.