മനിതി സംഘത്തെ ആരാണ് തമിഴ്നാട്ടില് നിന്ന് ആനയിച്ച് കൊണ്ടുവന്നതെന്ന കാര്യത്തില് അന്വേഷണം വേണമെന്ന് പ്രതിപക്ഷനേതാവ് രമേശ് ചെന്നിത്തല ആവശ്യപ്പെട്ടു, ലോക്സഭ തെരഞ്ഞെടുപ്പിലെ പരാജയ ഭീഷണി മുന്നില് കണ്ടാണ് ഇടത് മുന്നണി വിപുലീകരിക്കുന്നതെന്നും അദ്ദേഹം ആരോപിച്ചു
ശബരിമല ദര്ശനത്തിനായി യുവതികളെ കയറ്റിക്കൊണ്ടുപോകുന്ന സര്ക്കാര് അതേ സ്പീഡില് അതേ സ്പീഡില് അവരെയും കൊണ്ട് താഴേക്ക് ഇറങ്ങുകയാണെന്നും പണ്ട് നാറാണത്ത് ഭ്രാന്തന് പെരുമാറിയിരുന്നത് ഇത് പോലെയായിരുന്നെന്നും പ്രതിപക്ഷനേതാവ് രമേശ് ചെന്നിത്തല പരിഹസിച്ചു. ശബരിമലയില് നാറാണത്തു ഭ്രാന്തനെ പോലെയാണ് സര്ക്കാര് പെരുമാറുന്നത്. മനിതി സംഘത്തെ ആരാണ് തമിഴ്നാട്ടില് നിന്ന് ആനയിച്ച് കൊണ്ടുവന്നതെന്ന കാര്യത്തില് അന്വേഷണം വേണമെന്നും കൊച്ചിയില് നടത്തിയ വാര്ത്താസമ്മേളനത്തില് അദ്ദേഹം ആവശ്യപ്പെട്ടു.
ഭൂമി കയ്യേറ്റക്കാരനെന്ന് സി.പി.എം വിശേഷിപ്പിക്കുന്ന വീരേന്ദ്രകുമാറിനെയും അഴിമതിക്കാരനായ ബാലകൃഷ്ണപിള്ളയേയും ഇടത് മുന്നണിയിലെടുത്തത് ശരിയാണോ എന്ന് അവര് വ്യക്തമാക്കണം. വീരേന്ദ്രകുമാറിനെ കുറിച്ചുള്ള നിലപാട് മാറിയോ എന്ന് സിപിഎം വ്യക്തമാക്കണം. അഴിമതിക്കാരരെന്ന് പറഞ്ഞാണ് ആര്. ബാലകൃഷ്ണപ്പിള്ളയെ വിഎസ് അച്യുതാനന്ദന് ജയിലില് അടച്ചത്. ആ പിള്ളയെ ഇപ്പോള് കൂടെ കൂട്ടിയിരിക്കുകയാണ്. അഴിമതിയുമായി സന്ധി ചെയ്യാന് സിപിഎമ്മിന് മടിയില്ലെന്ന് ഇത് വ്യക്തമാക്കുന്നു. ഇവരെ ഉള്പ്പെടുത്തിയത് കൊണ്ട് ഇടതുമുന്നണി ശക്തമാകില്ലെന്നും ചെന്നിത്തല ചൂണ്ടിക്കാട്ടി. ലോക്സഭ തെരഞ്ഞെടുപ്പിലെ പരാജയ ഭീഷണി മുന്നില് കണ്ടാണ് ഇടത് മുന്നണി വിപുലീകരിക്കുന്നതെന്നും അദ്ദേഹം ആരോപിച്ചു.
മുന് പിഎസ്സി ചെയര്മാനും കോണ്ഗ്രസ് സഹയാത്രികനുമായ കെഎസ് രാധാകൃഷ്ണന് അയ്യപ്പ ജ്യോതിയില് പങ്കെടുത്തതിനെ ചെന്നിത്തല ന്യായീകരിക്കുകയും ചെയ്തു. കോണ്ഗ്രസിന്റെ പ്രാഥമിക അംഗത്വം കെ.എസ് രാധാകൃഷ്ണനില്ല. ആചാരസംരക്ഷണത്തിനാണ് അദ്ദേഹം പോയതെന്നും പറഞ്ഞു. എന്നാല് വനിതാ മതിലിനെതിരെ രൂക്ഷവിമര്ശനം ഉന്നയിക്കുകയും ചെയ്തു. മതിലെന്തിനാണെന്ന് സര്ക്കാര് വ്യക്തമാക്കണം. കേരളത്തിന്റെ നവോത്ഥാനത്തിന് എന്തെങ്കിലും മാറ്റം സംഭവിച്ചതായി അറിയില്ല. നവോത്ഥാനത്തിന്റെ പാരമ്പര്യം കോണ്ഗ്രസിന് അവകാശപ്പെട്ടതാണ്. വനിതാ മതിലില് പങ്കെടുക്കാന് കുടുംബശ്രീ, അംഗനവാടി, ആശാവര്ക്കര്മാകെ അടക്കം സിപിഎം പ്രാദേശിക നേതാക്കള് ഭീഷണിപ്പെടുത്തുകയാണ്. ക്ഷേമപെന്ഷന്കാരെ പോലും വെറുതെ വിടുന്നില്ല.
വരാപ്പുഴ ശ്രീജിത്തിന്റെ കൊലപാതകത്തില് സര്ക്കാര് കള്ളക്കളി നടത്തുകയാണ്. പ്രതികളായ പൊലീസുകാരെ സി.പി.എമ്മും സര്ക്കാരും സംരക്ഷിക്കുകയാണ്. ലോക്കപ്പ് കൊലപാതകങ്ങളെ സര്ക്കാര് പ്രത്സാഹിപ്പിക്കുകയാണെന്ന് ഇതില് നിന്ന് വ്യക്തമായി. വരാപ്പുഴ കസ്റ്റഡി മരണത്തില്പ്പെട്ട ഏഴ് പൊലീസുകാരുടെ സസ്പെന്ഷന് പിന്വലിച്ച് സര്ക്കാര് ഉത്തരവിറക്കിയതിനെതിരെയായിരുന്നു പ്രതിപക്ഷനേതാവിന്റെ വിമര്ശനം.
https://www.facebook.com/Malayalivartha
