എന്.എസ്.എസ് ജനറല് സെക്രട്ടറി സുകുമാരന് നായര്ക്കെതിരെ കേരളാകോണ്ഗ്രസ് നേതാവ് ബാലകൃഷ്ണപിള്ള വീണ്ടും രംഗത്ത്, സുകുമാരന് നായര്ക്ക് ആരെയെങ്കിലും പിന്തുണയ്ക്കണമെങ്കില് സ്വന്തമായി ആകാം. ചട്ടമ്പി സ്വാമിയുടെയും മന്നത്ത് പത്മനാഭന്റെയും പാരമ്പര്യം മറക്കരുതെന്നും അദ്ദേഹം ഓര്മിപ്പിച്ചു
എന്.എസ്.എസ് ജനറല് സെക്രട്ടറി സുകുമാരന് നായര്ക്കെതിരെ കേരളാകോണ്ഗ്രസ് നേതാവ് ബാലകൃഷ്ണപിള്ള വീണ്ടും രംഗത്ത്. വിശ്വാസം ഇല്ലാതാക്കാന് ആരും ശ്രമിക്കുന്നതായി അറിയില്ലെന്ന് എന്.എസ്.എസ് ഡയറക്ടര് ബോര്ഡ് അംഗം കൂടിയായ ബാലകൃഷ്ണപിള്ള പറഞ്ഞു. ശബരിമല കര്മ സമിതി നടത്തിയ അയ്യപ്പജ്യോതിയില് രാഷ്ട്രീയമുണ്ട്. അതിന്റെ മറവില് ചേരിതിരിവ് ഉണ്ടാക്കാനാണ് ശ്രമിച്ചതെന്നും വിശ്വാസം ളല്ലാതാക്കാന് കുറേപ്പേര്, വിശ്വാസം സംരക്ഷിക്കാന് മറ്റ് ചിലര് അങ്ങനെയൊന്നും വേര്തിരിവ് ഉണ്ടാക്കേണ്ട സാഹചര്യം നിലവിലില്ലെന്നും അദ്ദേഹം വ്യക്തമാക്കി. വിശ്വാസ സംരക്ഷണത്തിന്റെ കുത്തക ഏതെങ്കിലും രാഷ്ട്രീയ പാര്ട്ടിക്കോ, പ്രസ്ഥാനത്തിനോ ആരും വിട്ടുകൊടുത്തിട്ടില്ലെന്നും ബി.ജെ.പിയേയും എന്.എസ്.എസിനേയും പരസ്യമായി പേരെടുത്ത് പറയാതെ ബാലകൃഷ്ണപിള്ള വിമര്ശിച്ചു. എന്.എസ്.എസിന് വിരുദ്ധമായ തീരുമാനം മുമ്പും തന്റെ പാര്ട്ടി സ്വീകരിച്ചിട്ടുണ്ടെന്നും അദ്ദേഹം വ്യക്തമാക്കി.
ബി.ജെ.പി നേതൃത്വത്തില് നടന്ന അയ്യപ്പജ്യോതിയുമായി സഹകരിക്കാന് എന്.എസ്.എസ് ഔദ്യോഗികമായി നിര്ദ്ദേശം നല്കിയതായി അറിയില്ലെന്നും ബാലകൃഷ്ണപിള്ള പറഞ്ഞു. സമദൂരനിലപാട് മാറ്റാന് എന്.എസ്.എസിന് കഴിയില്ല. ജി.സുകുമാരന് നായര്ക്ക് ആരെയെങ്കിലും പിന്തുണയ്ക്കണമെങ്കില് സ്വന്തമായി ആകാം. ചട്ടമ്പി സ്വാമിയുടെയും മന്നത്ത് പത്മനാഭന്റെയും പാരമ്പര്യം മറക്കരുതെന്നും താന് എന്.എസ്.എസില്തുടരുമെന്നും ബാലകൃഷ്ണപിള്ള വ്യക്തമാക്കി. വനിതാ മതിലില് പങ്കെടുക്കുന്നവര് പെരുന്നയിലേക്ക് വരേണ്ടെന്ന് സുകുമാരന് നായര് മുമ്പ് ബാലകൃഷ്ണപിള്ളയേയും ഗണേഷ്കുമാറിനേയും ഭീഷണിപ്പടുത്തിയിരുന്നു. അത് വക വയ്ക്കാതെ ഇരുവരും വനിതാമതിലുമായി സഹകരിക്കാന് തയ്യാറായി മുന്നോട്ട് വന്നിരിക്കുകയാണ്.
ഞാന് വിശ്വാസിയാണ്്. അയ്യപ്പോജ്യോതി തെളിയിച്ചവരോട് യോജിക്കാനാവില്ല. കാരണം കര്മസമിതിയുടെ മറവില് ബി.ജെ.പി രാഷ്ട്രീയം കളിക്കുകയാണ്. വിശ്വാസത്തില് രാഷ്ട്രീയംകലര്ത്താന് പാടില്ല. വനിതാ മതിലുമായി പാര്ട്ടി സഹകരിക്കും. ഇടതുമുന്നണി എടുക്കുന്ന ഏത് തീരുമാനവുമായും സഹകരിക്കും. എല്ഡിഎഫും കേരളാ കോണ്ഗ്രസും ഇനി രണ്ടല്ല. അതുകൊണ്ട് വനിതാമതിലില് പങ്കെടുക്കുമോ എന്ന ചോദ്യത്തിന് പ്രസക്തിയില്ലെന്നും ബാലകൃഷ്ണപിള്ള വ്യക്തമാക്കി. മുന്നോക്ക വികസന കോര്പ്പറേഷന് ചെയര്മാനായ ആര്.ബാലകൃഷ്ണപിള്ള ശബരിമല വിഷയത്തില് എന്എസ്എസ് നിലപാടിനോട് ആദ്യം അനുഭാവം പ്രകടിപ്പിച്ചിരുന്നു. എന്നാല് മുന്നണി പ്രവേശനത്തോടെ ആ തീരുമാനം മാറ്റുകയായിരുന്നു.
എന്.എസ്.എസുമായി കേരളാ കോണ്ഗ്രസ് ബിക്ക് യാതൊരു പ്രശ്നവുമില്ലെന്ന് കെ.ബി ഗണേഷ്കുമാര് എം.എല്.എ പറഞ്ഞു. ജി. സുകുമാരന് നായര്ക്ക് ദേഷ്യം വരുമ്പോള് പറയുന്ന കാര്യങ്ങളില് പിന്നീട് മാറ്റം വരുത്തിയിട്ടുണ്ടെന്നും അദ്ദേഹം ചൂണ്ടിക്കാണിച്ചു. അതിനര്ത്ഥം ബാലകൃഷ്ണപിള്ളയ്ക്കും ഗണേഷിനും എതിരെ സുകുമാരന് നായര്ക്ക് ഒന്നും ചെയ്യാനാവില്ലെന്നതാണെന്ന് വ്യക്തം. അയ്യപ്പജ്യോതിക്ക് പരോക്ഷപിന്തുണ നല്കിയ എന്.എസ്.എസിനെതിരെ കോണ്ഗ്രസും രംഗത്ത് വന്നിരുന്നു. അങ്ങനെ ഇടത്, വലത് പാളയത്തില് നിന്ന് അകന്ന് നില്ക്കുകയാണ് എന്.എസ്.എസ്.
https://www.facebook.com/Malayalivartha
