ബുക്ക് ചെയ്യുന്നതോ രാഷ്ട്രീയക്കാര്... വനിതാ മതിലിന്റെ മറവില് നടക്കുന്ന കള്ളക്കളികള് പൊളിച്ചടുക്കാന് ബിജെപി കോണ്ഗ്രസ് ഹൈടെക് സെല്; ജനുവരി ഒന്നിന് നടക്കുന്ന കല്യാണങ്ങള്ക്ക് വീഡിയോഗ്രാഫര്മാരെ കിട്ടാനില്ല; ആകാംക്ഷയുടെ വനിതാമതിലിന് മണിക്കൂറുകള് മാത്രം
നാളെ സംസ്ഥാനവ്യാപകമായി നടക്കുന്ന വനിതാ മതിലിന്റെ ദൃശ്യങ്ങള് പകര്ത്താന് ബി ജെ പിയും കോണ്ഗ്രസും വന്തോതില് വീഡിയോഗ്രാഫര്മാരെ ഏര്പ്പാടാക്കി. കോണ്ഗ്രസിന്റെയും ബിജെപിയുടെയും ചാനലുകളിലെ വീഡിയോഗ്രാഫര്മാര്ക്ക് പുറമേ കരാറടിസ്ഥാനത്തിലും ക്യാമറാമാന്മാരെ നിയോഗിച്ചിട്ടുണ്ട്. ജയ്ഹിന്ദിന് പുറമേ മറ്റു ചില ചാനലുകളില് നിന്ന് വിഷ്വലുകള് വാങ്ങാന് കോണ്ഗ്രസും ജനത്തിന് പുറമേ അമൃതയില് നിന്ന് വിഷ്വല് വാങ്ങാന് ബി ജെ പിയും തീരുമാനിച്ചിട്ടുണ്ട്.
ചുരുക്കത്തില് ജനുവരി ഒന്നിന് നടക്കുന്ന കല്യാണങ്ങള്ക്ക് വീഡിയോഗ്രാഫര്മാരെ കിട്ടാനില്ല. എല്ലാവരെയും ബി ജെ പിയും കോണ്ഗ്രസും സി പി എമ്മും ചേര്ന്ന് മതിലിന് വേണ്ടി ബുക്ക് ചെയ്തിരിക്കുകയാണ്.
സി പി എം സംസ്ഥാന വ്യാപകമായി ക്യാമറാമാന്മാരെ ബുക്ക് ചെയ്തത് എത്ര പ്രവര്ത്തകര് മതിലില് പങ്കെടുത്തു എന്നറിയുന്നതിന് വേണ്ടിയാണ്. അത് പ്രാദേശിക നേതാക്കളെ വിശ്വാസക്കുറവുള്ളത് കൊണ്ടാണ്. ഓരോ പ്രദേശത്തും മതിലില് പങ്കെടുക്കുന്നവരുടെ പട്ടിക മുതിര്ന്ന നേതാക്കള് വാങ്ങിയിട്ടുണ്ട്. പ്രസ്തുത പട്ടിക അനുസരിച്ചുള്ള എണ്ണമുണ്ടോ എന്നറിയുകയാണ് സി പി എമ്മിന്റെ ലക്ഷ്യം
എന്നാല് കോണ്ഗ്രസിനും ബി ജെ പി ക്കും മറ്റ് ചില ലക്ഷ്യങ്ങളാണുള്ളത്. അത് മതിലില് പങ്കെടുക്കുന്നവരെ കണ്ടെത്തി 'പണിയുക' എന്നതാണ് . കുടുംബശ്രീ പ്രവര്ത്തകര്, തൊഴിലുറപ്പുകാര്, സര്ക്കാര് ജീവനക്കാര്, ദിവസ വേതനക്കാര് എന്നിവര് മതിലില് പങ്കെടുക്കുന്നുണ്ടോ എന്നറിയാനാണ് ഇവര് ക്യാമറാ കണ്ണുകള് സ്ഥാപിക്കുന്നത്. ലീവെടുക്കാതെ മതിലിന് വരുന്ന സര്ക്കാര് ജീവനകാര്ക്കെതിരെ പരാതി നല്കാന് കോണ്ഗ്രസും ബി ജെ പിയും തീരുമാനിച്ചിട്ടുണ്ട്. ദിവസ വേതനകാര്ക്കിടയില് ശമ്പളം വാങ്ങി മതിലില് പങ്കെടുക്കാന് ഇറങ്ങുന്നവരെ പിടിക്കാനാണ് പ്രതിപക്ഷത്തിന്റെ തീരുമാനം.
അതിനിടെ ബി ജെ പി വ്യാപകമായ വാട്ട്സ് ആപ്പ് പ്രചരണം ആരംഭിച്ചുകഴിഞ്ഞു. സര്ക്കാര് ജോലിയുള്ളവര് മതിലിന് പോയാല് ഫോട്ടോയെടുത്ത് കോടതിയില് സമര്പ്പിക്കാനാണ് നിര്ദ്ദേശം. അങ്ങനെ ചെയ്താല് ജോലി പോകുമെന്നാണ് പ്രചരണം. കോടതി വിധി ലംഘിച്ച് 18 വയസിന് താഴെയുള്ള കുട്ടികളെ മതിലില് പങ്കെടുപ്പിച്ചാല് ഫോട്ടോയെടുക്കണമെന്നും നിര്ദ്ദേശമുണ്ട്. തൊഴിലുറപ്പ് സ്ത്രീകള് ശമ്പളം വാങ്ങി മതിലില് പങ്കെടുത്താല് ഫോട്ടോയെടുത്ത് സമര്പ്പിക്കണമെന്നും നിര്ദ്ദേശമുണ്ട്. തൊഴിലുറപ്പ് വെബസൈറ്റില് കയറി മസ്റ്റ് റോള് പ്രകാരം അവര് കൂലി വാങ്ങിയോ എന്ന് പരിശോധിക്കണം. അങ്ങനെ സംഭവിച്ചിട്ടുണ്ടെങ്കില് പരാതി നല്കണമെന്നാണ് നിര്ദ്ദേശം. കുടുംബശ്രീ പ്രവര്ത്തകരെ പങ്കെടുപ്പിച്ചാലും കേന്ദ്രത്തെ അറിയിക്കണമത്രേ.
കേന്ദ്ര ഗ്രാമവികസന സഹമന്ത്രി, അദ്ദേഹത്തിന്റെ ജീവനക്കാരായ ഗ്രീരാം കൃപാല് യാദവ്, സുശീല് സിംഗ്, രതീര് കുമാര് , പ്രശാന്ത് എന്നിവരെ അറിയിക്കണമെന്നാണ് ആരുടേതെന്ന പേരില്ലാതെ പ്രചരിക്കുന്ന സന്ദേശത്തിലെ നിര്ദ്ദേശം.
സര്ക്കാര് ജീവനക്കാര് അവധിയെടുത്ത് മതിലില് പങ്കെടുത്താല് നിയമ പ്രകാരം ഒന്നും ചെയ്യാനാവില്ല. കുടുംബശ്രീ, തൊഴിലുറപ്പുകാരുടെ കാര്യവും ഇങ്ങനെ തന്നെ. 18 വയസിന് താഴെയുള്ള കുട്ടികളുടെ കാര്യം മാത്രമാണ് പ്രസക്തം. ഇതിന് കുട്ടികളുടെ ചിത്രം മാത്രം മതിയാവില്ല. അവരുടെ പ്രായം തെളിയിക്കുകയും വേണം. ഹൈക്കോടതി ഉത്തരവ് ഉള്ളതു കൊണ്ടാണ് ഇത് മാത്രം കര്ശനമാകുന്നത്. ബാലാവകാശ കമ്മീഷന്റെ ഉത്തരവിന് കടലാസിന്റെ വില മാത്രമാണ് ഉള്ളത്. അത് കമ്മീഷന് അധ്യക്ഷന് സിപിഎം നേതാവായതു കൊണ്ടു മാത്രമാണ്. ബാലാവകാശ കമ്മീഷന്റെ ഉത്തരവിനെതിരെ എറണാകുളം സ്വദേശി ഹൈക്കോടതിയെ സമീപിച്ച് കഴിഞ്ഞു.
വനിതാമതില് സര്ക്കാര് സംരംഭമാണ്. അതിന് മുന്കൈയെടുക്കുന്നത് മുഖ്യമന്ത്രിയും മന്ത്രിമാരുമാണ്. ജില്ലാ കളക്ടര്മാരും സര്ക്കാരിലെ ഉയര്ന്ന ഉദ്യോഗസ്ഥരുമാണ്. മതിലിന്റെ വിജയത്തിനു വേണ്ടി പ്രവര്ത്തിക്കുന്നത് സര്ക്കാര് വകുപ്പുകള് തന്നെയാണ്. അതായത് സര്ക്കാരിന്റെ ഉദ്ദേശ ലക്ഷ്യങ്ങള്ക്ക് വിരുദ്ധമായി നീങ്ങിയാല് സര്ക്കാര് ഉദ്യോഗസ്ഥര്ക്കെതിരെ സര്ക്കാരിന് നടപടി എടുക്കാം. മതില് സംഘടിപ്പിക്കുന്നതിന് സര്ക്കാരിന് കോടതി വിലക്കില്ല. സര്ക്കാര് ഇതിനായി ഹൈക്കോടതിയില് നിന്നും അനുമതി നേടിയിട്ടുണ്ട്. പണം സര്ക്കാര് ചെലവാക്കുമെന്നു തന്നെയാണ് ഹൈക്കോടതിയെ അറിയിച്ചിരിക്കുന്നത്. അതിനെതിരെ മുഖ്യമന്ത്രി പറഞ്ഞത് പരസ്യ പ്രസ്താവനയാണ്. സര്ക്കാര് പണം ചെലവാക്കില്ലെന്ന കാര്യത്തില് സര്ക്കാര് ഹൈക്കോടതിയില് ഒരു ഉറപ്പും നല്കിയിട്ടില്ല.
വനിതാ മതിലിനെതിരെ കോണ്ഗ്രസ് എടുക്കുന്ന വീഡിയോയില് പെടുന്ന സര്ക്കാര് ദിവസവേതനക്കാരെ വേണമെങ്കില് അവരുടെ സര്ക്കാര് അധികാരത്തില് വരുമ്പോള് പിരിച്ചുവിടാം. അതല്ലാതെ യാതൊരു നടപടിയും കോണ്ഗ്രസിന് സ്വീകരിക്കാനാവില്ല. 18 വയസിന് താഴെയുള്ള കുട്ടികളെ പങ്കെടുപ്പിച്ചാല് കോണ്ഗ്രസിന് ഹൈക്കോടതിയില് പോകാം. എന്നാല് 18 വയസിന് താഴെയുള്ളവരെ മതിലില് അണി നിരത്തിയത് തങ്ങളല്ലെന്ന് സര്ക്കാര് പറഞ്ഞാല് അതിന് കോടതിയില് മുന്ഗണന ലഭിക്കും. അക്കാര്യത്തില് സംശയമില്ല. സര്ക്കാര് നിര്ബന്ധപൂര്വം കുട്ടികളെ പങ്കെടുപ്പിച്ചതായി തെളിയിച്ചാല് മാത്രമേ ഹൈക്കോടതിക്ക് നടപടിയെടുക്കാന് കഴിയുകയുള്ളു.
ഏതായാലും വീഡിയോഗ്രാഫര്മാരുടെ സമയം തെളിഞ്ഞെന്ന് പറഞ്ഞാല് മതി. അവര്ക്ക് പത്ത് പുത്തന് കിട്ടേണ്ട സമയമാണ് വന്നു ചേര്ന്നിരിക്കുന്നത്.
https://www.facebook.com/Malayalivartha
