മന്ത്രി കടകംപള്ളി സുരേന്ദ്രനും ദേവസ്വം പ്രസിഡന്റിനും എതിരെ രൂക്ഷവിമര്ശനവുമായി മുഖ്യമന്ത്രി പിണറായി വിജയന്, യുവതികള് ശബരിമലയില് വരരുതെന്ന് പറയാന് രണ്ട് പേര്ക്കും അധികാരമില്ല, യുവതികളെത്തിയാല് പൊലീസ് സംരക്ഷണം നല്കുമെന്നും ആവര്ത്തിച്ചു
ശബരിമലയില് യുവതികള് വരരുതെന്ന് പറയാന് ദേവസ്വം മന്ത്രി കടകംപള്ളി സുരേന്ദ്രന് അധികാരമില്ലെന്ന് മുഖ്യമന്ത്രി പിണറായി വിജയന് വ്യക്തമാക്കി. മണ്ഡലകാലം തീരും വരെ യുവതികള് വരരുതെന്ന കടകംപള്ളിയുടെ പ്രസ്താവന മാധ്യമങ്ങള് ചൂണ്ടിക്കാണിച്ചപ്പോള് സുപ്രീംകോടതി വിധിയുടെ അടിസ്ഥാനത്തില് യുവതികള് വരരുതെന്ന് പറയാന് ഒരു മന്ത്രിക്കും അധികാരമില്ലെന്ന് മുഖ്യമന്ത്രി പറഞ്ഞു. ദേവസ്വം പ്രസിഡന്റ് എ.പത്മകുമാറും ഇക്കാര്യം ആവര്ത്തിച്ച് വ്യക്തമാക്കിയെന്ന് പറഞ്ഞപ്പോള് പ്രസിഡന്റിന് അതിന് അധാകാരമില്ലെന്നും മുഖ്യമന്ത്രി വ്യക്തമാക്കി. ശബരിമലയില് സുപ്രീംകോടതി വിധി നടപ്പാക്കുക എന്നതാണ് സര്ക്കാര് നയമെന്നും മുഖ്യമന്ത്രി ആവര്ത്തിച്ചു.
മകരവിളക്ക് തീരുംവരെ യുവതികള് ശബരിമല ദര്ശനം നടത്തരുതെന്ന് ദേവസ്വം മന്ത്രി കടംപള്ളി സുരേന്ദ്രന് മണ്ഡലപൂജയ്ക്ക് നടഅടയ്ക്കും മുമ്പ് പറഞ്ഞിരുന്നു. ശബരിമലയില് യുവതികളെ പ്രവേശിപ്പിക്കരുതെന്നാണ് തന്റെ നിലപാടെന്നും സര്ക്കാരിനും പാര്ട്ടിക്കും വിധേയമായി പ്രവര്ത്തിക്കുമെന്നും അദ്ദേഹം പറഞ്ഞിരുന്നു. ശരണം വിളിക്കുന്ന നാല് ചട്ടമ്പികളെ പേടിച്ചല്ല സര്ക്കാര് യുവതീപ്രവേശനം നടത്താത്തതെന്നും സര്ക്കാരിന് അതിനുള്ള ശക്തിയുണ്ടെന്നും സംഘര്ഷം സൃഷ്ടിച്ച് യുവതീപ്രവേശനം നടത്താന് താല്പര്യമില്ലെന്നും കടകംപള്ളി പറഞ്ഞിരുന്നു. ഇത് വലിയ ആശയക്കുഴപ്പമാണ് സൃഷ്ടിച്ചത്. സര്ക്കാര് യുവതീപ്രവേശന നിലപാടില് നിന്ന് പിന്മാറിയെന്ന് ബി.ജെ.പിയും കോണ്ഗ്രസും ആരോപിച്ചു. ഈ നിലപാട് ആദ്യമേ പറഞ്ഞിരുന്നെങ്കില് ശബരിമല സംഘര്ഷ ഭൂമിയാകില്ലായിരുന്നെന്നും ഇവര് ചൂണ്ടിക്കാട്ടി.
ദര്ശനത്തിനെത്തുന്ന യുവതികള്ക്ക് സുരക്ഷയൊരുക്കുകയാണ് സര്ക്കാര് നയം. അത് നടപ്പിലാക്കുക തന്നെ ചെയ്യും. അതേസമയം സ്ത്രീകളെ കയറ്റുക സര്ക്കാരിന്റെ അജണ്ടയല്ലെന്നും മുഖ്യമന്ത്രി വ്യക്തമാക്കി. ശബരിമലയിലെ ആചാരങ്ങള് പലതവണ മാറ്റിയിട്ടുണ്ട്. അതുകൊണ്ട് സ്ത്രീകള് വരരുതെന്ന് പറയാന് ആര്ക്കും അവകാശമില്ലെന്നും മുഖ്യമന്ത്രി പറഞ്ഞു. ഇതോടെ സര്ക്കാരിലും ദേവസ്വം ബോര്ഡിലും യുവതീപ്രവേശനത്തെ എതിര്ക്കുന്നവരുണ്ടെന്നും അവരുടെ നിലപാടുകള് അംഗീകരിക്കില്ലെന്നും വ്യക്തമായി.
എന്.എസ്.എസുമായി ഏറെ അടുപ്പമുള്ളയാളാണ് എ.പത്മകുമാര്. കടകംപള്ളിക്കും അവരുമായി നല്ല ബന്ധമാണ്. ദേവസ്വം പ്രസിഡന്റ് ആദ്യമേ എന്.എസ്.എസ് നിലപാടാണ് എടുത്തത്. പിന്നീട് മുഖ്യമന്ത്രി അത് തിരുത്തിക്കുകയായിരുന്നു. ഇപ്പോഴാകാട്ടെ രണ്ട് പേരെയും പരസ്യമായി തള്ളിപ്പറയുകയും ചെയ്തു.
https://www.facebook.com/Malayalivartha
