പ്രളയ പുനര്‍നിര്‍മാണം അവതാളത്തിലാണെന്ന മനോരമ വാര്‍ത്തയെ പൊളിച്ചടുക്കി മുഖ്യമന്ത്രി പിണറായി വിജയന്‍. സര്‍ക്കാരിനോടോ, ബന്ധപ്പെട്ടവരോടെ അന്വേഷിക്കാതെ വസ്തുനിഷ്ഠമല്ലാതെ തയ്യാറാക്കിയ റിപ്പോര്‍ട്ടാണ് ഇത് സംബന്ധിച്ച് ഇന്നത്തെ ഒരു പ്രമുഖപത്രത്തില്‍ വന്നതെന്നും നാളെ വനിതാമതില്‍ നടക്കാനിരിക്കെ ഇങ്ങിനെയൊരു വാര്‍ത്ത വരേണ്ടത് അവരുടെ ആവശ്യമായിരിക്കുമെന്നും മുഖ്യമന്ത്രി വിമര്‍ശിച്ചു. പ്രളയ പുനര്‍നിര്‍മ്മാണംസ ദ്രുതഗതിയില്‍ പുരോഗമിക്കുകയാണെന്ന്ും അദ്ദേഹം വ്യക്തമാക്കി. പ്രളയത്തില്‍ 13,311 വീടുകളാണ് പൂര്‍ണമായും തകര്‍ന്നത്. സ്വന്തമായി വീട് നിര്‍മിക്കാന്‍ 8881 പേര്‍ തയ്യാറായി വന്നു. അവര്‍ക്ക് സര്‍ക്കാര്‍ സഹായം മാത്രം നല്‍കിയാല്‍ മതി. വീട് അവര്‍ നിര്‍മിക്കും. അതില്‍ 6546 പേര്‍ക്ക് ഇതിനകം ആദ്യ ഗഡു വിതരണം ചെയ്‌തെന്നും മുഖ്യമന്ത്രി വ്യക്തമാക്കി. ബാക്കിയുള്ളവര്‍ക്ക് ജനുവരി 10നകം ആദ്യ ഗഡു വിതരണം ചെയ്യും.

പൂര്‍ണമായി തകര്‍ന്നതില്‍ 2000 വീടുകള്‍ സഹകരണ മേഖല നിര്‍മിച്ച് നല്‍കും. അതിനുള്ള നടപടികള്‍ മുന്നോട്ട് പോവുകയാണ്. ബാക്കിയുള്ള 2430 വീടുകള്‍ക്ക് സ്‌പോണ്‍സര്‍മാരെ കണ്ടെത്തിക്കഴിഞ്ഞു. സ്വന്തമായി ഭൂമിയില്ലാത്ത 1071 കുടുംബങ്ങള്‍ക്കാണ് വീട് നഷ്ടമായത്. അവര്‍ക്ക് സ്ഥലം കണ്ടെത്താന്‍ നടപടി തുടങ്ങി. ഭാഗികമായി 2,43,162 വീടുകളാണ് തകര്‍ന്നത്. അതില്‍ 15 ശതമാനം കേട് പാടുകള്‍ പറ്റിയ വീടുകള്‍ക്ക് 10000 രൂപയും 30 ശതമാനം കേട്പാട് ഉള്ള വീടുകള്‍ക്ക് 60000 രൂപയും മറ്റ് പരിശോധനകളില്ലാതെ ജനുവരി 10നകം നല്‍കാന്‍ മുമ്പേ നിര്‍ദ്ദേശം നല്‍കിയതാണ്. അടിയന്തരദുരിതാശ്വാസ സഹായമായി പതിനായിരം രൂപ വീതം 6,57,000 പേര്‍ക്ക് പ്രളയം ഉണ്ടായി 90 ദിവസത്തിനകം ലഭ്യമാക്കിയെന്നും മുഖ്യമന്ത്രി വ്യക്തമാക്കി. എങ്ങുമെത്താതെ നവകേരള നിര്‍മാണം എന്ന തലക്കെട്ടിലാണ് ഇന്ന് മനോരമ ഒന്നാം പേജില്‍ വാര്‍ത്ത കൊടുത്തത്.

പതിനായിരം രൂപയ്ക്ക് അപേക്ഷ നല്‍കേണ്ട സമയം കഴിഞ്ഞ് നല്‍കിയ 1,12,385 അപേക്ഷകള്‍ ലഭിച്ചു. അതില്‍ 1,11,872 എണ്ണം തീര്‍പ്പാക്കി. ആലപ്പുഴയില്‍ 1,63,952 പേര്‍ക്ക് പതിനായിരം രൂപ വീതം നല്‍കി. ആലപ്പുഴയില്‍ സമയം കഴിഞ്ഞ് ലഭിച്ച് 1700 അധിക അപേക്ഷകള്‍ മാത്രമാണ് തീര്‍പ്പാക്കാനുള്ളത്. ബാങ്ക് അക്കൗണ്ട് അടക്കമുള്ള വിശദാംശങ്ങള്‍ ലഭിക്കാത്തതിനാലാണ് കാലതാമസം വരുന്നതെന്നും മുഖ്യമന്ത്രി ചൂണ്ടിക്കാട്ടി. ആലപ്പുഴയില്‍ 1162 വീടുകള്‍ പൂര്‍ണമായും തകര്‍ന്നു. അതില്‍ 702 പേര്‍ സര്‍ക്കാര്‍ സഹായത്തോടെ സ്വന്തമായി നിര്‍മാണം നടത്തുന്നു. അതില്‍ 654 പേര്‍ക്ക് ആദ്യ ഗഡു നല്‍കി. 17 പേര്‍ക്ക് നല്‍കാനുണ്ട്. അവകാശ തര്‍ക്കം കാരണമാണ് പലര്‍ക്കും നല്‍കാത്തതെന്നും മുഖ്യമന്ത്രി വ്യക്തമാക്കി.