ചങ്കിടുപ്പോടെ സുരേന്ദ്രന്... തുഷാര് വെള്ളാപ്പള്ളി മത്സരിക്കേണ്ടെന്ന് വെള്ളാപ്പള്ളി നടേശന് പറയുമ്പോഴും മത്സരിക്കാന് കച്ചകെട്ടി തുഷാര്; പാരയാകുന്നത് കെ. സുരേന്ദ്രന് നോട്ടമിട്ട തൃശൂര്; ബിജെപി ജില്ലാ കമ്മിറ്റിയും സുരേന്ദ്രനൊപ്പം
തുഷാര് വെള്ളാപ്പള്ളി മത്സരിക്കണമെന്ന് ബിജെപിയും മത്സരിക്കേണ്ടെന്ന് വെള്ളാപ്പള്ളി നടേശനും വാശി പിടിക്കുമ്പോള് തൃശൂരില് തര്ക്കം മുറുകുകയാണ്യ തുഷാറിന് മത്സരിക്കാന് താത്പര്യമുണ്ടെന്നും ജയ സാധ്യതയുള്ള തൃശൂര് തന്നെ വേണമെന്നാണ് പറയുന്നത്.
തൃശൂര് സീറ്റിനെ ചൊല്ലി ബിഡിജെഎസ്സും ബിജെപിയും തമ്മില് തര്ക്കം തുടരുകയാണ്. ബിജെപി സ്ഥാനാര്ത്ഥിയെ തന്നെ തൃശ്ശൂരില് മത്സരിപ്പിക്കണമെന്ന് ജില്ലാ പ്രസിഡന്റ് എ നാഗേഷ് ആവശ്യപ്പെട്ടു. തുഷാര് വെള്ളാപ്പള്ളി മത്സരിക്കാന് തയ്യാറായാല് തൃശൂര് നല്കാമെന്നാണ് ബിജെപി സംസ്ഥാന നേതൃത്വത്തിന്റെ നിലപാട്. മുന്നണിയില് ഏകദേശ സീറ്റ് ധാരണ ആയെന്നു ബിജെപി സംസ്ഥാന അധ്യക്ഷന് പി.എസ്. ശ്രീധരന്പിള്ള പറഞ്ഞു. അതേസമയം ലോക്സഭാ തെരഞ്ഞെടുപ്പില് എന്ഡിഎ സഖ്യകക്ഷിയായ ബിഡിജെഎസ്സിന് അഞ്ച് സീറ്റുകള് മാത്രമെന്നാണ് സൂചന.
ആറ്റിങ്ങല്, മാവേലിക്കര, ഇടുക്കി, ചാലക്കുടി, വയനാട് എന്നിവയാണ് ബിജെപി, ബിഡിജെഎസ്സിന് കരുതിവച്ചിരുന്ന അഞ്ചുമണ്ഡലങ്ങള്. എട്ടു സീറ്റുകളാണ് ചോദിച്ചതെങ്കിലും അഞ്ച് സീറ്റില് തൃപ്തിപ്പെടുത്താനായിരുന്നു ബിജെപി ശ്രമം. എന്നാല് തൃശൂരിനു വേണ്ടിയുള്ള ബിഡിജെഎസ്സിന്റെ കടുംപിടുത്തമാണ് തലവേദനയാകുന്നത്. കെ.സുരേന്ദ്രന്, എഎന് രാധാകൃഷ്ണന് തുടങ്ങിയ സീനിയര് നേതാക്കള് മത്സരിക്കാന് താത്പര്യപ്പെടുന്ന സീറ്റാണ് തൃശ്ശൂര്. പക്ഷെ ബിഡിജെഎസ് ആവശ്യപ്പെട്ട എട്ട് സീറ്റുകളില് ബിജെപി ഏറെ പ്രതീക്ഷ വെക്കുന്ന ഈ എ പ്ലസ് മണ്ഡലവുമുണ്ട്. തുഷാര് തയ്യാറായാല് തൃശൂര് നല്കാമെന്ന ബിജെപി സംസ്ഥാന നേതൃത്വം ബിഡിജെഎസിനെ അറിയിച്ചു. പക്ഷെ മത്സരിക്കാനില്ലെന്ന നിലപാടിലാണ് തുഷാര്. ഇതിനിടെയാണ് ജില്ലാ നേതൃത്വം നിലപാട് വ്യക്തമാക്കിയത്.
കെ.സുരേന്ദ്രനെ മത്സരിപ്പിച്ചാല് തൃശ്ശൂരില് ജയസാധ്യതയുണ്ടെന്നാണ് സംസ്ഥാന പ്രസിഡന്റുമായുള്ള കൂടിക്കാഴ്ചയില് ജില്ലാ നേതൃത്വം അറിയിച്ചത്. ശബരിമല പ്രശ്നത്തോടെ കെ സുരേന്ദ്രന്റെ വിജയസാധ്യത ഏറിയെന്നും ജില്ലാ നേതൃത്വം കണക്കുകൂട്ടുന്നു. അതേ സമയം ബിഡിജെഎസുമായിള്ള സീറ്റ് വിഭജനത്തില് ഇനി അന്തിമ തീരുമാനം കേന്ദ്ര നേതൃത്വമാണ് കൈക്കൊള്ളേണ്ടത്. അതിന് ശേഷമായിരിക്കും തൃശൂരില് ആരെന്നതില് വ്യക്തത വരൂ.
അതേസമയം, എന്.ഡി.എ.യുടെ ഘടകകക്ഷിയായ ബി.ഡി.ജെ.എസിന്റെ നീക്കങ്ങളില് മുന്നണിയിലെ മുഖ്യകക്ഷിയായ ബി.ജെ.പി.ക്ക് സംശയം. മുന്നണിക്കുള്ളില്നിന്നുകൊണ്ട് അതിനെ ദുര്ബലപ്പെടുത്താനുള്ള ശ്രമം നടക്കുന്നുണ്ടോ എന്നാണവരുടെ ആശങ്ക. ഒപ്പം ഉറച്ചുനില്ക്കുന്നില്ലെങ്കില് ബി.ഡി.ജെ.എസിനെ ഒഴിവാക്കണമെന്ന നിലപാടാണ് കേരളത്തിലെ ആര്.എസ്.എസ്. നേതാക്കള്ക്കെന്നാണ് വിവരം. ബി.ഡി.ജെ.എസ്. വിഷയം കൈകാര്യംചെയ്യുന്നത് കേന്ദ്ര നേതൃത്വമായതിനാല് സംസ്ഥാന നേതാക്കള് ഇക്കാര്യത്തില് നിശ്ശബ്ദത പാലിക്കുകയാണ്.
വെള്ളാപ്പള്ളി മുന്കൈയെടുത്ത് സ്ഥാപിച്ച പാര്ട്ടിയാണ് ബി.ഡി.ജെ.എസ്. പിന്നീടാണ് എസ്.എന്.ഡി.പി. യോഗത്തിന് രാഷ്ട്രീയമില്ലെന്നും തനിക്ക് ഈ പാര്ട്ടിയുമായി ബന്ധമില്ലെന്നും അദ്ദേഹം പ്രഖ്യാപിക്കുന്നത്. അപ്പോഴും അദ്ദേഹത്തിന്റെ മകനും എസ്.എന്.ഡി.പി. യോഗം വൈസ് പ്രസിഡന്റുമായ തുഷാര് വെള്ളാപ്പള്ളി ബി.ഡി.ജെ.എസിന്റെ പ്രസിഡന്റായി തിരഞ്ഞെടുക്കപ്പെട്ടു. പാര്ട്ടിയുടെ ഭാരവാഹികളിലേറെയും എസ്.എന്.ഡി.പി. യോഗം ഭാരവാഹികളുമാണ്.
ശബരിമല വിവാദത്തില് വെള്ളാപ്പള്ളി സര്ക്കാര് നിലപാടുകള്ക്കൊപ്പമായിരുന്നു. സംഘപരിവാര് നിലപാടുകളെ അദ്ദേഹം തുറന്നു വിമര്ശിക്കുകയും ചെയ്തു. വെള്ളാപ്പള്ളിയുടെ പുതിയ പ്രസ്താവന എന്.ഡി.എ.യെ ലക്ഷ്യംവെച്ചാണ് എന്നാണ് ബി.ജെ.പി. വൃത്തങ്ങള് സംശയിക്കുന്നത്. ഇത് എല്.ഡി.എഫിനെ പരോക്ഷമായി സഹായിക്കാനുള്ള നീക്കങ്ങളുടെ ഭാഗമാണോ എന്നാണ് സംശയം. ചെങ്ങന്നൂര് നിയമസഭാ തിരഞ്ഞെടുപ്പില് എന്.ഡി.എ.യ്ക്കൊപ്പംനിന്ന് ബി.ഡി.ജെ.എസ്. ഇടതുമുന്നണിയെ സഹായിക്കുകയായിരുന്നെന്ന് ആര്.എസ്.എസ്. നേതൃത്വം കണ്ടെത്തിയിട്ടുണ്ട്. ഇതും ഇപ്പോഴത്തെ സംശയങ്ങള്ക്ക് കാരണമാണ്.
സജീവരാഷ്ട്രീയത്തില്നിന്ന് സംഘടന മാറിനില്ക്കാന് തീരുമാനിച്ചതിന്റെ ഭാഗമാണ് വെള്ളാപ്പള്ളിയുടെ പ്രസ്താവനയെന്നാണ് എസ്.എന്.ഡി.പി. യോഗം നിലപാട്. എസ്.എന്.ഡി.പി. ഭാരവാഹികള് പാര്ട്ടി ഭാരവാഹിത്വം വഹിക്കുന്നത് വിവാദമായാല് അതിനും വിലക്കുവരുമെന്നാണ് സൂചന. അങ്ങനെവന്നാല് തുഷാര് അടക്കമുള്ളവര് ബി.ഡി.ജെ.എസ്. ഭാരവാഹിത്വം ഒഴിയേണ്ടിവരും.
ബിഡിജെഎസ്സിനു പുറമെ കേരള കോണ്ഗ്രസ് പി.സി. തോമസ് വിഭാഗത്തിന് കോട്ടയം സീറ്റ് നല്കിയേക്കും. പി.സി. തോമസ് തന്നെ കോട്ടയത്ത് മത്സരിക്കാനാണ് സാധ്യത.
https://www.facebook.com/Malayalivartha
