കുംഭമാസ പൂജകള്‍ക്കായി 12നു ശബരിമല നട വീണ്ടും തുറക്കാനാരിക്കേ കനത്ത സുരക്ഷാ ക്രമീകരണങ്ങളുമായി പോലീസ്. ദക്ഷിണമേഖല എഡിജിപി അനില്‍കാന്തിന്റെ നേതൃത്വത്തില്‍ 3,000 പോലീസുകാരെ വിന്യസിക്കും. തിരുവനന്തപുരം റേഞ്ച് ഐജിയുടെ ചുമതലയുള്ള മനോജ് ഏബ്രാഹാമും കൊല്ലം സിറ്റി പോലീസ് കമ്മീഷണര്‍ പി.കെ. മധു, കോട്ടയം എസ്പി ഹരിശങ്കര്‍, പോലീസ് ആസ്ഥാനത്തെ സ്‌പെഷല്‍ സെല്‍ എസ്പി വി.അജിത് എന്നിവരും സംഘത്തിലുണ്ടാകും. ശബരിമല നട തുറക്കുന്ന ദിവസങ്ങളില്‍ യുവതികള്‍ സന്ദര്‍ശനം എത്തിയേക്കുമെന്നും ഇന്റലിജന്‍സ് മുന്നറിയിപ്പു നല്‍കിയിട്ടുണ്ട്. ഈ സാഹചര്യത്തില്‍ പ്രതിഷേധങ്ങള്‍ അതിരു കടക്കാതിരിക്കാനുളള മുന്‍കരുതല്‍ നടപടികള്‍ സ്വീകരിക്കാനാണു പോലീസ് തീരുമാനം. ഇതിന്റെ ഭാഗമായി നേരത്തെ പ്രതിഷേധങ്ങളില്‍ ഏര്‍പ്പെട്ടിരുന്ന സംഘടനകളെ പോലീസ് നിരീക്ഷിക്കുന്നുണ്ട്.
സുപ്രീം കോടതി വിധിയുടെ അടിസ്ഥാനത്തില്‍ നേരത്തെ ഏതാനും യുവതികള്‍ ശബരിമലയിലെത്തുകയും അവര്‍ക്കെതിരെ പ്രതിഷേധങ്ങള്‍ ഉയരുകയും ചെയ്തിരുന്നു. തുലാമാസ പൂജയ്ക്കായി നട തുറന്നപ്പോള്‍ അത് കാര്യമായ തരത്തില്‍ സംഘര്‍ഷങ്ങള്‍ക്കും വഴി വച്ചിരുന്നു. ആ സാഹചര്യം ഇപ്പോള്‍ നിലനില്‍ക്കുന്നില്ലെന്നാണ് പോലീസ് വിലയിരുത്തുന്നതെങ്കിലും കുംഭമാസ പൂജയ്ക്കായി നട തുറക്കുമ്പോള്‍ യുവതികള്‍ എത്തിയാല്‍ അത് പ്രതിഷേധങ്ങള്‍ക്ക് വഴിവച്ചേക്കുമന്ന് കരുതുന്നു.