ശബരിമല യുവതീ പ്രവേശനത്തില്‍ നിര്‍ണായക നീക്കവുമായി എന്‍എസ്എസ്. ശബരിമല യുവതീ പ്രവേശനവിധി പുനഃപരിശോധിക്കണമെന്ന ആവശ്യം സുപ്രീം കോടതിവിധി തള്ളുന്നപക്ഷം, ആചാരസംരക്ഷണത്തിനായി ഓര്‍ഡിനന്‍സ് പുറപ്പെടുവിക്കാന്‍ കേന്ദ്രസര്‍ക്കാര്‍ തയാറെടുക്കുന്നു. ബി.ജെ.പിആര്‍.എസ്.എസ്. സംസ്ഥാന നേതൃത്വങ്ങള്‍ എന്‍.എസ്.എസിനാണു സൂചന നല്‍കിയത്.

പുനഃപരിശോധന വേണ്ടെന്നാണു കോടതിയുടെ തീരുമാനമെങ്കില്‍ എന്‍.എസ്.എസ്. പ്രസിഡന്റും ജനറല്‍ സെക്രട്ടറിയും ഡല്‍ഹിയിലെത്തി പ്രധാനമന്ത്രി നരേന്ദ്ര മോഡിയെ കാണും. അദ്ദേഹത്തിനു സമര്‍പ്പിക്കാനായി ഓര്‍ഡിനന്‍സിന്റെ കരട് തയാറാക്കാന്‍ തുടങ്ങിക്കഴിഞ്ഞു. ശബരിമല ആചാരങ്ങളുടെ വ്യത്യസ്തത എന്‍.എസ്.എസിനു വേണ്ടി സുപ്രീം കോടതിയില്‍ നിരത്തിയ മുതിര്‍ന്ന അഭിഭാഷകന്‍ കെ. പരാശരന്റെ മേല്‍നോട്ടത്തിലാണ് ഇത്. രണ്ടു തവണ അറ്റോര്‍ണി ജനറലായിരുന്ന അദ്ദേഹം ഭരണഘടനാ വിദഗ്ധനുമാണ്.

പൊതുതെരഞ്ഞെടുപ്പ് പ്രഖ്യാപിക്കുന്നതിനു മുമ്പുതന്നെ ഓര്‍ഡിനന്‍സ് യാഥാര്‍ഥ്യമാക്കാനാണു ശ്രമം. എന്‍.എസ്.എസിന്റെ നീക്കത്തിനു വിവിധ ഹൈന്ദവ സംഘടനകളുടെയും സന്യാസി മഠങ്ങളുടെയും പന്തളം കൊട്ടാരം, ബ്രാഹ്മണ സഭ തുടങ്ങിയവരുടെയും പിന്തുണയുണ്ട്. ശിവഗിരി മഠത്തിന്റെ പിന്തുണയും ഉറപ്പാക്കിക്കഴിഞ്ഞു.

മൗലികാവകാശങ്ങള്‍ വ്യാഖ്യാനിച്ചുള്ള സുപ്രീം കോടതിവിധി നിയമനിര്‍മാണത്തിലൂടെ ദുര്‍ബലപ്പെടുത്താന്‍ കഴിയില്ലെന്നു വിദഗ്ധര്‍ ചൂണ്ടിക്കാട്ടുന്നുണ്ടെങ്കിലും പഴുതുണ്ടെന്നാണ് എന്‍.എസ്.എസിന്റെ വിലയിരുത്തല്‍.

ശബരിമല യുവതീ പ്രവേശനവുമായി ബന്ധപ്പെട്ട് സമര്‍പ്പിച്ച ഹര്‍ജികളില്‍ സുപ്രീംകോടതിയില്‍ നടന്ന വാദത്തില്‍ ഏറ്റവും ശ്രദ്ധേയമായിരുന്നു എന്എസ്എസിന്റെ വാദം. മുതിര്‍ന്ന അഭിഭാഷകന്‍ കെ.പരാശരനാണ് എന്‍.എസ്.എസിന്റെ വാദഗതികള്‍ അറിയിച്ചത്. ആരാധനാലയത്തെ പൊതു സ്ഥലങ്ങളില്‍ ഉള്‍പ്പെടുത്തിയത് തെറ്റെന്നും വിധിയുടെ പ്രത്യാഘാതം ഇതരമതസ്ഥര്‍ക്കിടയിലും ഉണ്ടാകുമെന്നും എന്‍.എസ്.എസ് വ്യക്തമാക്കി.

യുവതീ പ്രവേശനം തെരഞ്ഞെടുപ്പ് പ്രചരണത്തിലും ചൂടു പിടിക്കുകയാണ്. ശബരിമല യുവതീ പ്രവേശനവുമായി ബന്ധപ്പെട്ട സുപ്രീം കോടതി വിധി വിശ്വാസികള്‍ക്ക് എതിരാണെന്ന് യു.പി മുഖ്യമന്ത്രി യോഗി ആദിത്യനാഥ് കഴിഞ്ഞ ദിവസം പത്തനംതിട്ടയില്‍ പറഞ്ഞു. ശബരിമലയിലും അയോധ്യ മാതൃകയില്‍ പ്രക്ഷോഭം വേണമെന്നും ശബരിമലയിലെയും ഹിന്ദുക്കളെ അപമാനിക്കാനാണ് ശ്രമമെന്നും യോഗി ആദിത്യനാഥ് പറഞ്ഞു.

ശബരിമല സമരത്തിന് താന്‍ ധാര്‍മ്മിക പിന്തുണ അറിയിക്കുന്നു. ഇത്തവണ ശബരിമലയില്‍ ദര്‍ശനം നടത്താന്‍ ആഗ്രഹിച്ചിരുന്നുവെങ്കിലും കുഭേമേളയുടെ തിരക്ക് കാരണം ദര്‍ശനം സാധ്യമായില്ലെന്നും യോഗി ആദിത്യനാഥ് പറഞ്ഞു.

അതേസമയം കോടിയേരി ബാലകൃഷ്ണനും ശബരിമലയിലെ നിലപാട് രംഗത്തെത്തിയിരുന്നു. ശബരിമലയില്‍ സ്ത്രീ പുരുഷ സമത്വത്തിന് വേണ്ടിയാണ് നിലനിന്നതെന്ന് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്‍ പറഞ്ഞു. ഒരു നിലപാട് സ്വീകരിച്ചതിന്റെ പേരില്‍ വോട്ട് കുറഞ്ഞ് പോകുമോയെന്ന ആശങ്ക ഇടത് മുന്നണിക്കില്ലെന്നും കോടിയേരി പറഞ്ഞു.

ഇടത് മുന്നണിയുടെ കേരള സംരക്ഷണ യാത്ര ഉദ്ഘാടന ചടങ്ങില്‍ സംസാരിക്കുകയായിരുന്നു കോടിയേരി ബാലകൃഷ്ണന്‍. അതോടൊപ്പം മുല്ലപ്പള്ളി രാമചന്ദ്രന്‍ നയിക്കുന്നത് മഹാനിധി സമാഹരണ യാത്രയാണെന്നും നോട്ടെണ്ണുന്ന യന്ത്രവുമായാണ് മുല്ലപ്പള്ളിയുടെ യാത്രയെന്നും കോടിയേരി വിമര്‍ശിച്ചു. കൂടാതെ ബിജെപിക്കെതിരായ പോരാട്ടത്തില്‍ വിശ്വസിക്കാവുന്നത് ഇടതുപക്ഷത്തെ മാത്രമാണെന്നും അദ്ദേഹം പറഞ്ഞു.