ആണ്‍തുണയില്ലാതെ സ്ത്രീകള്‍ക്ക് ഹജ്ജിന് പോകാന്‍ അവസരം നല്‍കുന്ന എല്‍.ഡബ്ല്യു.എം ക്വോട്ടയിലെ തീര്‍ഥാടകരില്‍ 90 ശതമാനവും കേരളത്തില്‍ നിന്ന്. ഈ ക്വോട്ടയില്‍ രാജ്യത്തുനിന്ന് മൊത്തം 2,300 പേര്‍ക്കാണ് ഈ വര്‍ഷം അവസരം ലഭിച്ചത്. ഇതില്‍ 2,011 പേരും കേരളത്തില്‍നിന്നുള്ളവരാണ്. കഴിഞ്ഞ വര്‍ഷം മുതലാണ് മഹര്‍റം (ആണ്‍തുണ) ഇല്ലാതെ ഹജ്ജിന് പോകാന്‍ വനിതകള്‍ക്ക് കേന്ദ്രസര്‍ക്കാര്‍ അനുമതി നല്‍കിയത്.

വനിതാ ശാക്തീകരണത്തിന്റെ ഭാഗമായി പ്രധാനമന്ത്രി നേരിട്ട് ഇടപെട്ടാണ് ഈ ക്വോട്ട അനുവദിച്ചത്. ലേഡീസ് വിത്തൗട്ട് മഹര്‍റം (എല്‍.ഡബ്ല്യു.എം) എന്നാണ് ഈ ക്വോട്ടക്ക് നല്‍കിയ പേര്. 45 വയസ്സ് കഴിഞ്ഞ നാലു സ്ത്രീകളടങ്ങുന്ന സംഘം ഒരു കവറിലാണ് അപേക്ഷ നല്‍കേണ്ടത്. 70 വയസ്സ് കഴിഞ്ഞവരെയും ഈ ക്വോട്ടയില്‍ അപേക്ഷിച്ചവരെയും മാത്രമാണ് ഈവര്‍ഷം നറുക്കെടുപ്പില്ലാതെ തെരഞ്ഞെടുത്തത്. കഴിഞ്ഞ വര്‍ഷവും എല്‍.ഡബ്ല്യു.എം ക്വോട്ടയില്‍ കേരളത്തില്‍നിന്നുതന്നെയാണ് ബഹുഭൂരിഭാഗവും പോയത്.

കേരളത്തില്‍ നിന്ന് ഈവര്‍ഷം മൊത്തം 43,115 പേരാണ് ഹജ്ജിന് അപേക്ഷിച്ചത്. ഇവരില്‍ 11,472 പേരെയാണ് ഇതിനകം തെരഞ്ഞെടുത്തത്. ഇവരില്‍ 70 കഴിഞ്ഞവരുടെ ക്വോട്ടയില്‍ 1199 പേരും എല്‍.ഡബ്ല്യു.എം. ക്വോട്ടയില്‍ 2,011 പേരുമാണ് ഉണ്ടായിരുന്നത്. ഇവരെ മുഴുവന്‍ നറുക്കെടുപ്പില്ലാതെ തെരഞ്ഞെടുത്ത ശേഷം അവശേഷിക്കുന്ന 30,905 പേരില്‍നിന്ന് നറുക്കെടുപ്പിലൂടെ 8262 പേരെയാണ് തെരഞ്ഞെടുത്തത്.തുടര്‍ച്ചയായി അഞ്ചാംതവണ അപേക്ഷിക്കുന്നവര്‍ക്ക് നല്‍കിയിരുന്ന പരിഗണന കേന്ദ്ര ഹജ്ജ് കമ്മിറ്റി കഴിഞ്ഞവര്‍ഷം മുതല്‍ നിര്‍ത്തലാക്കിയതോടെ ഹജ്ജ് അപേക്ഷകരുടെ എണ്ണത്തില്‍ ഗണ്യമായ കുറവാണ് ഉണ്ടായിട്ടുള്ളത്.

2017ല്‍ കേരളത്തില്‍നിന്ന് 95,238 പേര്‍ അപേക്ഷ നല്‍കിയിരുന്നു. എന്നാല്‍, ഈവര്‍ഷം 43,171 പേരാണ് അപേക്ഷിച്ചത്. രാജ്യത്തെ മൊത്തം കണക്കെടുത്താല്‍ 2017ല്‍ 4,48,268 പേര്‍ അപേക്ഷിച്ചപ്പോള്‍ ഈവര്‍ഷം അത് 2,61,261ലെത്തി. സംസ്ഥാനത്തുനിന്ന് അപേക്ഷകരുടെ എണ്ണം പകുതിയിലും താഴെയായി കുറഞ്ഞു. തുടര്‍ച്ചയായി അപേക്ഷിച്ചാല്‍ സീനിയോറിറ്റി പ്രകാരം ഹജ്ജിന് അവസരം ലഭിക്കുമെന്നത് ഇല്ലാതായതാണ് ഈ കുറവിന് കാരണം.
ഈ വര്‍ഷം ആദ്യം നിശ്ചയിച്ച തീയതിയില്‍ അപേക്ഷകരുടെ എണ്ണം വളരെ കുറവായിരുന്നു. അപേക്ഷിക്കാനുള്ള സമയം ഒരുമാസത്തോളം വീണ്ടും നീട്ടിയതുകൊണ്ടാണ് ഇത്രയെങ്കിലും അപേക്ഷകരുണ്ടായത്.