കാസര്‍കോട്ട് പെരിയ സംഭവം നടക്കുന്നതിന് ആഴ്ചകള്‍ക്ക് മുന്‍പ് സി.പി.എം നേതാവ് വി.പി.പി മുസ്തഫ നടത്തിയ കൊലവിളി പ്രസംഗം പുറത്തായി. കോണ്‍ഗ്രസികാരെ ചിതയില്‍ വയ്ക്കാന്‍ ഇല്ലാത്തവിധം ചിതറിപ്പിച്ച് കളയുമെന്നായിരുന്നു ഭീഷണി. ഗാന്ധി ശിഷ്യരായ കോണ്‍ഗ്രസുകാര്‍ സമാധാന യോഗത്തില്‍ ഒത്തുതീര്‍പ്പുണ്ടാക്കിയിട്ട് പുറത്തിറങ്ങി തോന്ന്യാസം കാണിക്കുന്നു. ഇനിയും ക്ഷമ പരീക്ഷിച്ചാല്‍ തിരിച്ചടിയുണ്ടാകും. സിപിഎം ജില്ലാ സെക്രട്ടറിയേറ്റ് അംഗമാണ് വി പി പി മുസ്തഫ. ഇരട്ടക്കൊലപാതക കേസ് പ്രതി പീതാംബരന്‍ ആക്രമിക്കപ്പെട്ട് രണ്ട് ദിവസം കഴിഞ്ഞ് ജനുവരി ഏഴിന് കല്യാട്ടേ പാര്‍ട്ടിഓഫീസിന് അടുത്താണ് പ്രസംഗം നടത്തിയത്. പൊലീസ് ഇതുവരെ കേസ് എടുത്തിട്ടില്ല എന്നതും ശ്രദ്ധേയമാണ്.

ഒരു പ്രകോപനവും ഇല്ലാതെയാണ് പീതാംബരനേയും സുരേന്ദ്രനേയും മിനിഞ്ഞാന്ന് ആക്രമിച്ചത്. അത് ക്ഷമിക്കുകയാണ്. പാതാളത്തോളം ക്ഷമിച്ചു. ഇനിയും ചവിട്ടാന്‍ വന്നാല്‍ പാതാളത്തില്‍ നിന്ന് റോക്കറ്റ് പോലെ സിപിഎം കുതിച്ച് കയറും. അതിന്റെ വഴിയില്‍ പിന്നെ കല്യാട്ടേലെ, ഗോവിന്ദന്‍ നായരല്ല, ബാബുരാജല്ല, ബാക്കിയില്ലാത്ത വിതത്തില്‍ പെറുക്കിയെടുത്ത് ചിതയില്‍ വയ്ക്കാന്‍ ബാക്കിയില്ലാത്ത വിധം ചിതറി പോകും'' മുസ്തഫ പ്രസംഗത്തില്‍ ആക്രോശിച്ചു. ഇതിന് ശേഷമാണ് കൊലപാതകം അരങ്ങേറിയത്. അതിനാല്‍ പാര്‍ട്ടിക്ക് കൊലപാതകവുമായി ബന്ധമില്ലെന്നും പാതാംബരന്‍ ഒറ്റയ്ക്ക് നടത്തിയതാണെന്നുമുള്ള പാര്‍ട്ടി നേതൃത്വത്തിന്റെ നിലപാട് ശരിയല്ലെന്ന് ഇൗ പ്രസംഗം വ്യക്തമാക്കുന്നു.

പീതാംബരനെയും സുരേന്ദ്രനെയും ആക്രമിച്ചതിന്റെ പ്രതികാരമാണ് കൊലപാതകമെന്ന് മരിച്ച ശരത് ലാലിന്റെയും കൃപേഷിന്റെയും വീട്ടുകാര്‍ ആരോിച്ചിരുന്നു. അത് ശരിവയ്ക്കുന്നതാണ് വി.പി.പി മുസ്തഫയുടെ പ്രസംഗം. പത്ത്മിനിറ്റ് കൊണ്ട് പറഞ്ഞ് തീര്‍ക്കാവുന്ന പ്രശ്‌നമാണ് സി.പി.എം വഷളാക്കി കൊലപാതകത്തില്‍ എത്തിച്ചതെന്ന് മുന്‍മുഖ്യമന്ത്രി ഉമ്മന്‍ചാണ്ടിയും പറയുന്നു. അതിനാല്‍ കൊലപാതകം സി.പി.എം നേതൃത്വത്തിന്റെ അറിവോടെ നടന്നതാണെന്ന കോണ്‍ഗ്രസ് ആരോപണത്തിന് ബലംകൂടുകയാണ്. സി.പി.ഐ കൂടെ തിരിഞ്ഞതോടെ ഇനി എന്ത് പറഞ്ഞ് പ്രതിരോധിക്കും എന്നറിയാതെ കാസര്‍കോട്ടെ നേതാക്കള്‍ കുഴയുന്നു. ഉദുമ എം.എല്‍.എ കുഞ്ഞിരാമനാണ് കൊലപാതകത്തിന്റെ മുഖ്യസൂത്രധാരനെന്ന് മരിച്ചവരുടെ വീട്ടുകാരും പ്രതിപക്ഷനേതാവ് രമേശ് ചെന്നിത്തലയും ആരോപിക്കുന്നു.

സി.പി.എം നേതാക്കള്‍ കൊലവിളി പ്രസംഗം നടത്തുന്നത് ആദ്യമായല്ല. കണ്ണൂരില്‍ പി.ജയരാജനെ മുസ്്‌ലിംലീഗുകാര്‍ ആക്രമിച്ചപ്പോള്‍ പാടത്ത് പണി വരമ്പത്ത് കൂലി എന്നാണ് കോടിയേരി പ്രസംഗിച്ചത്. വണ്‍... ടു... ത്രീ... എന്ന് പേരെടുത്ത് പറഞ്ഞ് തങ്ങള്‍ കൊന്ന കോണ്‍ഗ്രസുകാരുടെ പേര് എടുത്ത് പറഞ്ഞ് മന്ത്രി എം.എം മണി നടത്തിയ പ്രസംഗം വലിയ വിവാദമായിരുന്നു. ടി.പി ചന്ദ്രശേഖരനെ കൊലപ്പെടുത്തുമെന്ന് സി.പി.എം പ്രദേശികനേതാക്കള്‍ പലതവണ ഭീഷണിപ്പെടുത്തിയിരുന്നു. അതിന് ശേഷമാണ് കൊലപ്പെടുത്തിയത്. മുഖ്യസൂത്രധാരകന്‍ സി.പി.എം കണ്ണൂര്‍ ജില്ലാ നേതാവ് പി.കെ കുഞ്ഞനന്തനായിരുന്നു. ശരത്‌ലാലും കൃപേഷും കൊല്ലപ്പെടുന്നതിന് മുമ്പ് ഉദുമ എം.എല്‍.എ കുഞ്ഞിരാമനും ഭീഷണിപ്പെടുത്തിയിരുന്നെന്ന് ഇരുവരുടെയും വീട്ടുകാര്‍ ആരോപിക്കുന്നു.