പെരിയ സംഭവത്തില് യൂത്ത് കോണ്ഗ്രസ് പ്രവര്ത്തകരെ മര്ദ്ദിക്കുക മാത്രമായിരുന്നു ലക്ഷ്യം, അതുകൊണ്ട് സംസ്ഥാനനേതൃത്വത്തെ അറിയിക്കാതെയാണ് ആക്രമണം ആസൂത്രണം ചെയ്തത്
പെരിയ സംഭവത്തില് യൂത്ത് കോണ്ഗ്രസ് പ്രവര്ത്തകരെ മര്ദ്ദിക്കുക മാത്രമായിരുന്നു ലക്ഷ്യം, അതുകൊണ്ട് സംസ്ഥാനനേതൃത്വത്തെ അറിയിക്കാതെയാണ് ആക്രമണം ആസൂത്രണം ചെയ്തത്. പക്ഷെ, എല്ലാം കൈവിട്ട് പോയി. പീതാംബരനെയും സുരേന്ദ്രനെയും കൃപേഷും ശരത്ലാലും മറ്റും ആക്രമിച്ചെങ്കിലും സമാധാനമായി പ്രശ്നം പരിഹരിക്കാനാണ് പാര്ട്ടി പ്രാദേശിക നേതൃത്വം ആദ്യം ശ്രമം നടത്തിയത്. പക്ഷെ, പീതാംബരന് കടുത്ത അമര്ഷമുണ്ടായിരുന്നു. മകന്റെ പ്രായം വരുന്നവരുടെ അടിയും കൊണ്ട് നേതാവാണെന്ന് പറഞ്ഞ് നാട്ടിലൂടെ നടക്കാന്. തുടര്ന്നാണ് തിരിച്ചടി കൊടുക്കാന് തീരുമാനിച്ചത്. കിട്ടിയ തല്ല് കൊടുത്ത് തീര്ക്കുക മാത്രമായിരുന്നു ലക്ഷ്യം. എന്നാല് സംഭവം തുടങ്ങിയപ്പോള് എല്ലാം പിടിവിട്ടുപോയി.
പ്രതികളെ ആക്രമിച്ച് തുടങ്ങിയപ്പോള് പീതാംബരന്റെയും കൂട്ടരുടെയും വൈരാഗ്യം കൂടി. അങ്ങനെ മര്ദ്ദനം കൊലപാതകത്തില് കലാശിക്കുകയായിരുന്നു. അതോടെ പീതാംബരനും സംഘവും പാര്ട്ടി ഓഫീസില് അഭയം തേടി. പിന്നീട് നേതാക്കളുടെ നിര്ദ്ദേശപ്രകാരമാണ് ഓരോ നീക്കവും നടന്നത്. കൊലപാതകം വ്യക്തിപരമായ വൈരാഗ്യം തീര്ക്കലാണെന്ന് മൊഴി നല്കണമെന്ന് നിയമോപദേശം ലഭിച്ചതോടെ പീതാംബരന് എല്ലാ ഉത്തരവാദിത്തവും ഏറ്റെടുത്തു. നിയമസഹായം ഉള്പ്പെടെ പാര്ട്ടി നല്കുമെന്ന് ഉറപ്പ് നല്കി. അതോടെ പാര്ട്ടി എഴുതിയ തിരക്കഥയില് കാര്യങ്ങള് മുന്നോട്ട് പോവുകയാണ്. പാര്ട്ടി തിരിച്ചടിക്കാത്തതില് നിരാശ പൂണ്ടാണ് ഇരുവരെയും കൊന്നതെന്ന് പീതാംബരന് മൊഴി നല്കി. പാര്ട്ടിയില് പരാതി നല്കിയിട്ടും പ്രയോജനം ഉണ്ടായില്ല. ലോക്കല് കമ്മിറ്റി അംഗമെന്ന പരിഗണന പോലും കിട്ടാത്തതോടെ തിരിച്ചടിക്കാന് തീരുമാനിച്ചു. അതിനാണ് കഞ്ചാവിന്റെ ലഹരിയില് ആക്രമണം നടത്തിയതെന്നും മൊഴി നല്കിയത്.
മൊഴികളെല്ലാം അറസ്റ്റിലാകും മുമ്പ് ഏതോ ക്രിമിനല് അഭിഭാഷകന് പഠിപ്പിച്ചതാണെന്ന് അന്വേഷണ സംഘത്തിനറിയാം. അത് പൊലീസിനെ വല്ലാതെ കുഴയ്ക്കുന്നുണ്ട്. പീതാംബരന് നിരവധി കേസുകളിലെ പ്രതിയാണ്. പാര്ട്ടിക്ക് വേണ്ടി അക്രമം നടത്തിയതിന് പലതവണ മര്്ദ്ദനം ഏല്ക്കുകയും ചെയ്തിട്ടുണ്ട്. ഇക്കാര്യം അദ്ദേഹത്തിന്റെ ഭാര്യയും മകളും വെളിപ്പെടുത്തിയിരുന്നു. മൂരിയനം മഹേഷ് വധക്കേസ്, പെരിയ വദ്യകലാ സംഘം ഓഫീസും വീടും കത്തിച്ച കേസിലും പീതാംബരന് പ്രതിയാണ്. പാര്ട്ടിയിലെ സമാധാനകാംഷികള്ക്ക് പീതാംബരന്റെ രീതികളോട് താല്പര്യമില്ല. അവരില് പലരും മുമ്പ് പീതാംബരനെതിരെ വിമര്ശനം ഉന്നയിച്ചിരുന്നു.
പീതാംബരന്റെ ഉറ്റസുഹൃത്തുക്കളായ ആറുപേരാണ് കൊലപാതകത്തില് പങ്കാളികളായത്. മൂന്നാട് പീപ്പിള്സ് കോളജിലെ സംഘര്ഷവുമായി ബന്ധപ്പെട്ടാണ് കോണ്ഗ്രസ്- സിപിഎം സംഘര്ഷം പെരിയയില് ഉണ്ടായത്. പ്രശ്നത്തില് ഇടപെട്ട പീതാംബരനെ യൂത്ത് കോണ്ഗ്രസ് പ്രവര്ത്തകര് മര്ദ്ദിച്ചു. അതിനു ശേഷം കൃപേഷിനെയും ശരത്ത് ലാലിനെയും ചില്ലിട്ട് ഫ്രെയിം ചെയ്യുമെന്ന് ഭീഷണിപ്പെടുത്തി.
തുടര്ന്ന് ബേക്കല് പൊലീസില് പരാതിപ്പെട്ടെങ്കിലും നടപടിയെടുത്തില്ല. പാര്ട്ടിപ്രവര്ത്തനത്തില് സജ്ജീവമായിരുന്ന ഇരുവരും പ്രദേശത്ത് ഒരു ക്ലബ് രൂപീകരിച്ചെങ്കിലും അതിന്റെ പ്രവര്ത്തനങ്ങളുമായി മുന്നോട്ട് പോകാന് പീതാംബരന് അടക്കമുള്ള സി.പി.എം നേതാക്കന്മാര് സമ്മതിച്ചില്ല
https://www.facebook.com/Malayalivartha
