പുല്‍വാമ ഭീകരാക്രമണത്തിന്റെ പശ്ചാത്തലത്തില്‍ പ്രധാനമന്ത്രി നരേന്ദ്രമോദിക്കെതിരെ അതിരൂക്ഷവിമര്‍ശനവുമായി കോണ്‍ഗ്രസ് അധ്യക്ഷന്‍ രാഹുല്‍ഗാന്ധി രംഗത്ത്. നാല്‍പ്പത് സൈനികര്‍ വീരമൃത്യു മരിച്ചിട്ടും പ്രധാനമന്ത്രി സന്തോഷവാനാണ്. ജീവന്‍ വെടിഞ്ഞ സൈനികരെ രക്തസാക്ഷികളായി അദ്ദേഹം പരിഗണിക്കുന്നില്ല. ഇതാണ് മോദി വിഭാവനം ചെയ്ത പുതിയ ഇന്ത്യയെന്നും രാഹുല്‍ ട്വിറ്ററിലൂടെ പരിഹസിച്ചു. സൈനികരുടെ 30,000 കോടി രൂപ അദ്ദേഹം സുഹൃത്ത് അനില്‍ അംബാനിക്ക് നല്‍കിയെന്നും ആരോപിച്ചു. അക്രമണം മുന്‍കൂട്ടിക്കാണുന്നതില്‍ ഇന്റലിജന്‍സിന് എങ്ങനെ വീഴ്ച സംഭവിച്ചെന്നും രാഹുല്‍ ഗാന്ധി ചോദിച്ചു.

പുല്‍വാമ ആക്രമണം നടക്കുമ്പോള്‍ പ്രധാനമന്ത്രി ഷൂട്ടിംഗിലായിരുന്നെന്നും വിവരം അറിഞ്ഞിട്ടും അദ്ദേഹം അത് ഉപേക്ഷിക്കാന്‍ തയ്യാറായില്ലെന്നും കോണ്‍ഗ്രസ് വക്താവ് രാവിലെ ആരോപിച്ചിരുന്നു. അതിന് പിന്നാലെയാണ് രാഹുലിന്റെ ട്വീറ്റ്. കോര്‍ബറ്റ് നാഷണല്‍ പാര്‍ക്കില്‍ തെരഞ്ഞെടുപ്പ് പ്രചാരണത്തിന് വേണ്ടിയുള്ള ഷൂട്ടില്‍ ആയിരുന്നു മോദി. വിവരമറിഞ്ഞിട്ടും നാലു മണിക്കൂര്‍ വരെ തെരഞ്ഞെടുപ്പ് പ്രചരണത്തിനുള്ള ഷൂട്ടിങ്ങ് തുടര്‍ന്നു. അദ്ദേഹം ബോളിവുഡ് താരമല്ല രാജ്യത്തിന്റെ പ്രധാനമന്ത്രിയാണ് അക്കാര്യം മറന്നു. അധികാരം നിലനിര്‍ത്താന്‍ മനുഷ്യത്വം മറന്ന മോദി ജവാന്‍മാരുടെ രക്തസാക്ഷിത്വം കൊണ്ട് രാഷ്ട്രീയം കളിക്കുകയാണ്. മോദി കപട ദേശീയ വാദിയാണ്- വക്താവ് രണ്‍ദീപ് സുര്‍ജ്ജേവാല ആരോപിച്ചു.

റഫേല്‍ ഇടപാടിലെ അഴിമതികള്‍ കോണ്‍ഗ്രസ് പുറത്ത് കൊണ്ടുവന്നതിലൂടെ മോദി ശരിക്കും പ്രതിരോധത്തിലായിരുന്നു. ആ സമയത്താണ് പുല്‍വാമ ആക്രമണം നടന്നത്. ആക്രമണത്തെ തുടര്‍ന്ന് എല്ലാവരും രാഷ്ട്രീയം മറന്ന് കൂടെ നില്‍ക്കണമെന്ന് മോദി ആവശ്യപ്പെട്ടിരുന്നു. അതോടെ രാഹുല്‍ഗാന്ധി സര്‍ക്കാരിന് പിന്തുണയുമായി രംഗത്തെത്തിയിരുന്നു. എന്നാല്‍ ആക്രമണം ബി.ജെ.പിയും മോദിയും തെരഞ്ഞെടുപ്പിനുള്ള ഊര്‍ജ്ജമാക്കി മാറ്റുന്ന നീക്കം കണ്ടാണ് കോണ്‍ഗ്രസ് തിരിച്ചടിക്കാന്‍ തീരുമാനിച്ചത്. പ്രോട്ടോക്കോള്‍ ലംഘിച്ച് മോദി പാക് പ്രധാനമന്ത്രിയായിരുന്ന നവാസ് ഷെരീഫുമായി സൗഹൃദ സന്ദര്‍ശനം നടത്തിയിട്ടെന്തായി, പുല്‍വാമ ആക്രമണത്തെ തുടര്‍ന്ന് പാക്കിസ്ഥാനെ അപലപിക്കാത്തെ മുഹമ്മദ് ബിന്‍ സല്‍മാന് എന്തിന് മോദി പരവതാനി വിരിച്ചു , തുടങ്ങിയ കാര്യങ്ങളാണ് പ്രധാനമന്ത്രിക്കെതിരെ കോണ്‍ഗ്രസ് ഉയര്‍ത്തുന്നത്.

മസൂദ് അസ്ഹറിനെ അന്താരാഷ്ട്ര ഭീകരനായി പ്രഖ്യാപിക്കണമെന്ന ഇന്ത്യയുടെ ആവശ്യത്തിന് സൗദിയുടെ പിന്തുണ ഉറപ്പിക്കാനാകുമോ എന്ന് മുഹമ്മദ് ബിന്‍ സല്‍മാനോട് പ്രധാനമന്ത്രി ചോദിക്കുമോ, പാക്കിസ്ഥാനും അവരുടെ ഭീകരക്യാമ്പുകള്‍ക്കും 20 മില്യണ്‍ യു.എസ് ഡോളര്‍ സഹായം നല്‍കുന്നവരുമായി ചങ്ങാത്തം സ്ഥാപിക്കുന്നത് പുല്‍വാമയില്‍ കൊല്ലപ്പെട്ട സൈനികരോടുള്ള അവഹേളനമാണെന്നും കോണ്‍ഗ്രസ് ആരോപിക്കുന്നു. വരും ദിവസങ്ങളില്‍ പുല്‍വാമ ആക്രമണം സംബന്ധിച്ച കൂടുതല്‍ വെളിപ്പെടുത്തലുകളും ആരോപണങ്ങളും കോണ്‍ഗ്രസ് നേതൃത്വം നടത്തുമെന്ന് ഉറപ്പാണ്.