കാസര്കോട് പെരിയയില് കൊല്ലപ്പെട്ട യൂത്ത്കോണ്ഗ്രസ് പ്രവര്ത്തകരുടെ വീടുകളില് റവന്യൂമന്ത്രി ഇ.ചന്ദ്രശേഖരന് സന്ദര്ശിച്ചതിനെതിരെ ആദ്യം വിമര്ശനം ഉന്നയിച്ച എല്.ഡി.എഫ് കണ്വീനര് പിന്നെ മറുകണ്ടംചാടി
കാസര്കോട് പെരിയയില് കൊല്ലപ്പെട്ട യൂത്ത്കോണ്ഗ്രസ് പ്രവര്ത്തകരുടെ വീടുകളില് റവന്യൂമന്ത്രി ഇ.ചന്ദ്രശേഖരന് സന്ദര്ശിച്ചതിനെതിരെ ആദ്യം വിമര്ശനം ഉന്നയിച്ച എല്.ഡി.എഫ് കണ്വീനര് പിന്നെ മറുകണ്ടംചാടി. താന് മന്ത്രിയെ വിമര്ശച്ചിട്ടില്ലെന്നും മന്ത്രി എന്ന നിലയില് സന്ദര്ശനം നടത്തുന്നതില് തെറ്റില്ലെന്നും എന്നാല് എല്.ഡി.എഫ് എന്ന നിലയില് സന്ദര്ശനം നടത്തിയാല് തെറ്റായസന്ദര്ശമാണ് നല്കുന്നതെന്നും വിജയരാഘവന് മാധ്യമങ്ങളോട് പറഞ്ഞിരുന്നു. മന്ത്രി ഇ ചന്ദ്രശേഖരന് സന്ദര്ശിച്ചതിനെ താന് വിമര്ശിച്ചെന്ന നിലയില് ചില മാധ്യമങ്ങള് നടത്തുന്ന പ്രചരണം വസ്തുതകള്ക്ക് നിരക്കുന്നതല്ലെന്ന് എല്ഡിഎഫ് കണ്വീനര് എ.വിജയരാഘവന് പിന്നീട് പ്രസ്താവനയിറക്കി.
മന്ത്രിയ്ക്ക് സന്ദര്ശിക്കാമെന്നാണ് പറഞ്ഞത്. കൊലപാതകം അപലപനീയവും ആവര്ത്തിക്കാന് പാടില്ലാത്തതാണെന്നും വ്യക്തമാക്കി. എല്ഡിഎഫ് എന്ന നിലയില് സന്ദര്ശനം നടത്താന് തീരുമാനിച്ചിട്ടില്ലെന്നും അദ്ദേഹം അറിയിച്ചു. മരണ വീടുകളില് ജനപ്രതിനിധികള് പോകുന്നതിനെ നിരുത്സാഹപ്പെടുത്തില്ല. സി.പി.ഐ നേതാവെന്ന ചന്ദ്രശേഖരന്റെ സന്ദര്ശനം നല്ല സന്ദേശം നല്കാനെന്ന് കരുതാനാകില്ലെന്നായിരുന്നു ആദ്യ പ്രതികരണം. കൊലപാതകം സി.പി.ഐ- സി.പി.എം പോര് രൂക്ഷമാക്കി. കാനം യാത്ര തുടങ്ങിയ അന്നാണ് കൊലപാതകം നടത്തിയത്. തുടര്ന്ന് ഹര്ത്താലായതിനാല് ജാഥ മാറ്റിവെച്ചു. ഇത് സി.പി.ഐയില് വലിയ അവമതിപ്പുളവാക്കി. കൊലപാതകത്തെ ന്യായീകരിക്കാനാവില്ലെന്ന് കാനം പരസ്യമായി പ്രതികരിച്ചു.
ഇതേതുടര്ന്നാണ് റവന്യൂമന്ത്രി കൊല്ലപ്പെട്ടവരുടെ വീടുകളില് സന്ദര്ശനം നടത്തിയത്. കാനത്തിന്റെ വടക്കന്മേഖലാ ജാഥയ്ക്ക് വേണ്ടത്ര പിന്തുണ കിട്ടാതായത് കൊലപാതകത്തെ തുടര്ന്നാണെന്നാണ് സി.പി.ഐയുടെ ആക്ഷേപം. ഇക്കാര്യം വരുന്ന എല്.ഡി.എഫ് യോഗത്തില് ചര്ച്ചയാകും. സി.പി.ഐയ്ക്ക് ഏറെ വേരോട്ടമുള്ള കാസര്കോട്ട്, തെരഞ്ഞെടുപ്പിന്റെ പടിവാതില്ക്കല് നില്ക്കുമ്പോള് ഇത്തരമൊരു അനുഷ്ടസംഭവം നടക്കാന് പാടില്ലായിരുന്നു എന്നാണ് സി.പി.ഐയുടെ നിലപാട്. കൊലപാതകം സംബന്ധിച്ച് കോടിയേരി പറഞ്ഞതല്ലാതെ മറ്റൊന്നും അറിയില്ലെന്നും പൊലീസ് അന്വേഷണം കാര്യക്ഷമമായി നടക്കണമെന്നും കാനവും പ്രതികരിച്ചു. ഇതിലെല്ലാമുള്ള അതൃപ്തിയാണ് വിജയരാഘവന് ആദ്യം രേഖപ്പെടുത്തിയത്.
എന്നാല് പ്രസ്താവന പുലിവാലാകുമെന്ന് മനസിലാക്കിയാണ് വിജയരാഘവന് തിരുത്തി വീണ്ടും പത്രക്കുറിപ്പ് ഇറക്കിയത്. സി.പി.എമ്മിലെ ഭിന്നത എല്.ഡി.എഫിലേക്ക് നീണ്ടാല് തെരഞ്ഞെടുപ്പിനെ ബാധിക്കുമെന്ന് അറിയാവുന്നതിനാല് വിവാദങ്ങള്ക്ക് തുടക്കത്തിലേ തടയിടുകയായിരുന്നു മുന്നണി കണ്വീനര്. അതേസമയം പാര്ട്ടിക്കുള്ളില് തന്നെ ധാരാളം പ്രതിഷേധം ഉയര്ന്ന് വരുന്നുണ്ട്. മുഖ്യമന്ത്രി പിണറായി വിജയന് അധികാരമേറ്റ ശേഷം ആദ്യം പാര്ട്ടിയോട് നിര്ദ്ദേശിച്ചത് രാഷ്ട്രീയകൊലപാതകങ്ങള് അവസാനിപ്പിക്കണം എന്നായിരുന്നു. എന്നാല് 20 രാഷ്ട്രീയ കൊലപാതകങ്ങളാണ് ഇതുവരെ നടന്നത്. അതില് സി.പി.എമ്മുകാരും കൊല്ലപ്പെട്ടു എന്നതാണ് വസ്തുത.
https://www.facebook.com/Malayalivartha
