ലോക്‌സഭാ തെരഞ്ഞെടുപ്പ് അടുത്തതോടെ എന്‍എസ്എസും സിപിഎമ്മും തമ്മിലുള്ള അകല്‍ച്ച പൂര്‍ണമാകുന്നതായി റിപ്പോര്‍ട്ട്. സിപിഎമ്മുകാരായ അംഗങ്ങള്‍ക്ക് എന്‍എസ്എസിനോടാണോ പാര്‍ട്ടിയോടാണോ കൂടുതല്‍ ആഭിമുഖ്യമെന്ന കണക്കെടുപ്പ് തുടങ്ങിയിരിക്കുകയാണ്. ആചാര സംരക്ഷണം പോലുള്ള നിര്‍ണായക ഘട്ടത്തില്‍ എന്‍എസ്എസിനെക്കാളുപരി പാര്‍ട്ടിയോടാണ് കൂറെങ്കില്‍ അവരുമായുള്ള സഹകരണം പരിമിതപ്പെടുത്തുന്നതിന് മുന്നോടിയായാണ് കണക്കെടുപ്പ്. എന്‍എസ്എസ് ആസ്ഥാനത്തുനിന്ന് താലൂക്ക് യൂണിയനുകള്‍ക്ക് അയച്ച സര്‍ക്കുലര്‍ അനുസരിച്ച് താലൂക്ക് പ്രസിഡന്റുമാര്‍ വിവരങ്ങള്‍ ശേഖരിച്ച് നേതൃത്വത്തെ അറിയിച്ചു തുടങ്ങി. അതി രഹസ്യം എന്ന കുറിപ്പോടെയാണ് സര്‍ക്കുലര്‍ ഇറക്കിയിട്ടുള്ളത്.

നായര്‍ സമുദായംഗങ്ങള്‍ എന്‍എസ്എസിന് ഒപ്പമല്ലെന്നും നേതൃത്വം പറഞ്ഞാല്‍ അംഗങ്ങള്‍ കേള്‍ക്കിലെലന്നും സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്‍ വിമര്‍ശിച്ചിരുന്നു, നേതൃത്വം പറഞ്ഞാല്‍ എന്‍എസ്എസ് അംഗങ്ങള്‍ കേള്‍ക്കുമോയെന്ന് അടുത്ത തിരഞ്ഞെടുപ്പ് തെളിയിക്കുമെന്ന് ജനറല്‍ സെക്രട്ടറി ജി സുകുമാരന്‍ നായരും മറുപടി നല്‍കി.

വാക് പോര് മുറുകുന്നതിനിടെയാണ് എന്‍എസ്എസ് അണികളുടെ രാഷ്ട്രീയക്കുറ് ഇന്റലിജന്‍സ് വഴി സര്‍ക്കാര്‍ പരിശോധിക്കുന്നുവെന്ന വിവരം സമുദായ നേതൃത്വത്തിന് ലഭിക്കുന്നത്. ഇതു വരെ ചൊടിപ്പിച്ചു. തുടര്‍ന്നാണ് സംഘടനയിലെ സിപിഎമ്മുകാരില്‍ എത്ര പേര്‍ പാര്‍ട്ടിയോട് കൂടുതല്‍ ആഭിമുഖ്യം പ്രകടിപ്പിക്കുമെന്ന് എന്‍എസ്എസും പരിശോധിക്കുന്നത്. പാര്‍ട്ടി അംഗങ്ങളായ കരയോഗാംഗങ്ങളില്‍ ബഹുഭൂരിപക്ഷവും എന്‍എസ്എസിനൊപ്പം തന്നെ നില്‍ക്കുമെന്നാണ് താലൂക്ക് പ്രസിഡന്റുമാരുടെ കണക്കെടുപ്പില്‍ കണ്ടെത്തിയത്.

കരയോഗാംഗങ്ങളില്‍ ഇടതു പാര്‍ട്ടികളില്‍പെട്ടവര്‍ എത്രയെന്നും അതില്‍ തന്നെ പാര്‍ട്ടി ഭാരവാഹിത്വമുള്ളവര്‍ എത്രയെന്നുമുള്ള വിവരം ശേഖരിക്കുന്നുണ്ട്. ആചാര സംരക്ഷണം പോലുള്ള നിര്‍ണായകഘട്ടത്തില്‍ അവര്‍ ആര്‍ക്കൊപ്പം നില്‍ക്കുമെന്ന ചോദ്യവും ഉന്നയിക്കുന്നു
എന്‍എസ്എസ് നിലപാട് കടുപ്പിച്ചതോടെയാണ് സമുദായ നേതൃത്വവുമായി അകല്‍ച്ചയില്ലെന്നും വേണ്ടി വന്നാല്‍ അങ്ങോട്ടു പോയി ചര്‍ച്ച നടത്തുമെന്നും കോടിയേരി ബുധനാഴ്ച നിലപാട് മയപ്പെടുത്തിയത്. എന്നാല്‍ ഇനി ചര്‍ച്ചയ്ക്കില്ലെന്നും ശബരിമല പ്രശ്‌നത്തില്‍ നിലപാട് തിരുത്തേണ്ടത്. സര്‍ക്കാരാണെന്നും എന്‍എസ്എസ് ജനറല്‍ സെക്രട്ടറിയും വ്യക്തമാക്കി.

അതേസമയം ശബരിമല വിഷയത്തില്‍ സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്റെ ചര്‍ച്ചയ്ക്കുള്ള ക്ഷണം നിരസിച്ച് എന്‍.എസ്.എസ്. രംഗത്തെത്തിയിരുന്നു. വിഷയത്തില്‍ ആരുമായും ചര്‍ച്ചയിക്കില്ലെന്ന് എന്‍.എസ്.എസ് പുറത്തിറക്കിയ പ്രസ്താവനയില്‍ പറയുന്നു. മുഖ്യമന്ത്രിയോടും കോടിയേരിയോടും നേരത്തെ അഭ്യര്‍ഥിച്ചിട്ടും ഫലമുണ്ടായില്ലെന്നും എന്‍.എസ്.എസ്. ജനറല്‍ സെക്രട്ടറി ജി. സുകുമാരന്‍ നായര്‍ പ്രസ്താവനയില്‍ വ്യക്തമാക്കി.

മുഖ്യമന്ത്രിയോടും കോടിയേരിയോടും ആചാരം സംരക്ഷിക്കണമെന്ന് ഫോണിലൂടെ പലതവണ അറിയിച്ചിരുന്നു. അനുകൂല പ്രതികരണമല്ല ഇരുവരില്‍ നിന്നും ഉണ്ടായത്. പിന്നീട് ഇതുസംബന്ധിച്ച ചര്‍ച്ചയ്‌ക്കോ കൂടിക്കാഴ്ചക്കോ എന്‍.എസ്.എസ് ശ്രമിച്ചിട്ടില്ലെന്നും ചര്‍ച്ചയ്ക്കായി ആരെയും നിയോഗിച്ചിട്ടില്ലെന്നും പ്രസ്താവനയില്‍ പറയുന്നു.

പിന്നീട് അതു സംബന്ധിച്ച് ഒരു ചര്‍ച്ചയ്‌ക്കോ കൂടിക്കാഴ്ചയ്‌ക്കോ എന്‍.എസ്.എസ്. ശ്രമിച്ചിട്ടില്ല, അതിന് ആഗ്രഹവുമില്ല, അതിനായി ആരെയും ചുമതലപ്പെടുത്തിയിട്ടുമില്ല. ഇനിയും സുപ്രീംകോടതി മറ്റൊരു വിധി പുറപ്പെടുവിച്ചാല്‍ അത് നടപ്പാക്കും എന്നത് ആരുടെയും ഔദാര്യമല്ല. വിധി അനുകൂലമായാലും പ്രതികൂലമായാലും എന്‍.എസ്.എസ്. വിശ്വാസവിഷയത്തില്‍ എടുത്ത നിലപാടില്‍ ഉറച്ചുതന്നെ നില്ക്കും.

നിലപാട് തിരുത്തേണ്ടത് സര്‍ക്കാരാണെന്നു ജനറല്‍ സെക്രട്ടറി ജി. സുകുമാരന്‍ നായര്‍ വാര്‍ത്താക്കുറിപ്പില്‍ അറിയിച്ചു. കഴിഞ്ഞ ദിവസം എന്‍എസ്എസുമായി ചര്‍ച്ചയ്ക്കു തയ്യാറാണെന്നു സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്‍ പറഞ്ഞിരുന്നു. എന്തായാലും എന്‍എസ്എസിന്റെ നിലപാട് ലോക്‌സഭാ തെരഞ്ഞെടുപ്പില്‍ ബാധിക്കുമെന്നാണ് കരുതുന്നത്.