ആദിവാസി കുടുംബങ്ങളെ വനത്തില്‍ നിന്നൊഴിപ്പിക്കണമെന്ന സുപ്രീംകോടതി വിധി പത്തനംതിട്ട ജില്ലയില്‍ നടന്നുവരുന്ന പട്ടയവിതരണ നടപടികളെയും ബാധിക്കും. വനമേഖലയോടു ചേര്‍ന്ന പ്രദേശങ്ങള്‍ക്കു പട്ടയവും കൈവശാവകാശ രേഖയും നല്‍കുന്നതിനോടു ഇപ്പോള്‍ തന്നെ വനംവകുപ്പിന് പൂര്‍ണ യോജിപ്പില്ല.

വനം, റവന്യു സംയുക്ത സര്‍വേ നടത്തിയാണ് പട്ടയവിതരണം നടത്തുന്നത്. എന്നാല്‍ വനംവകുപ്പ് ഇതിനോടു പൂര്‍ണമായി സഹകരിക്കാറില്ല. അനുമതി ലഭിച്ചിട്ടുള്ള പ്രദേശങ്ങള്‍ പോലും വനഭൂമിയുടെ ഭാഗമാണെന്ന പേരില്‍ പട്ടയമോ കൈവശാവകാശ രേഖയോ തടഞ്ഞുവച്ച സംഭവങ്ങളുമുണ്ട്.

സമീപകാലത്ത് കോന്നിയില്‍ വിതരണം ചെയ്ത പട്ടയങ്ങള്‍ പോലും പിന്നീടു റദ്ദാക്കി.ഇത്തരം പ്രശ്‌നങ്ങള്‍ നിലനില്‍ക്കെ വനംവകുപ്പ് നിയമങ്ങള്‍ക്കും നടപടികള്‍ക്കും സാധുകരണം നല്‍കുന്നതാണ് സുപ്രീംകോടതി വിധിയെന്ന വ്യാഖ്യാനമുണ്ടായിട്ടുണ്ട്. വന മേഖലയില്‍ ആരെയും പാര്‍പ്പിക്കേണ്ടതില്ലെന്ന നിലപാടിലാണ് ആദിവാസി കുടുംബങ്ങളെ ഒഴിപ്പിക്കാനുള്ള സുപ്രീംകോടതി വിധിയെന്ന് പറയുന്നു.

വനാവകാശ നിയമം ആദിവാസികള്‍ക്കു ബാധകമാണെങ്കിലും ഇതിലെ വ്യവസ്ഥകള്‍ സുപ്രീംകോടതി ഉത്തരവോടെ മരവിച്ചു. 1977 ജനുവരി ഒന്നിനു മുമ്പ് കൈവശാവകാശമുള്ളവര്‍ക്കു പട്ടയവും തുടങ്ങി നിയമവ്യവസ്ഥകളും നിലവിലുണ്ട്. ഇത്തരം നിയമവശങ്ങള്‍ നിലനില്‍ക്കെ കോടതിയുടെ ഇടപെടല്‍ മൂലം വനമേഖലയില്‍ ജില്ലയില്‍ പട്ടയത്തിനും കൈവശാവകാശ രേഖയ്ക്കും കാത്തിരിക്കുന്നവരുടെ പ്രതീക്ഷകള്‍ക്കും മങ്ങലേല്‍ക്കുമോയെന്ന ആശങ്ക ഉയര്‍ന്നു കഴിഞ്ഞു.