കോമ സ്റ്റേജില് കഴിയുന്നവരുടെ അടുത്ത ബന്ധുക്കളിലൊരാളെ രക്ഷാകര്ത്താവായി നിയമിക്കാമെന്ന് ഹൈക്കോടതി
രോഗം, പരിക്ക് തുടങ്ങിയ കാരണങ്ങളാല് അബോധാവസ്ഥയിലായ വ്യക്തികളുടെ സ്വത്തു വകകള് കൈകാര്യം ചെയ്യാന് അടുത്ത ബന്ധുക്കളിലൊരാളെ രക്ഷാകര്ത്താവായി നിയമിക്കാനാവുമെന്നു ഹൈക്കോടതി വ്യക്തമാക്കി. ഇതിനായി ഹൈക്കോടതിയെ സമീപിക്കുകയാണ് വേണ്ടതെന്നും ജസ്റ്റീസ് പി.ആര്. രാമചന്ദ്ര മേനോന്, ജസ്റ്റീസ് എന്. അനില് കുമാര് എന്നിവര് ഉള്പ്പെട്ട ഡിവിഷന് ബെഞ്ചിന്റെ വിധിയില് പറയുന്നു.
അബോധാവസ്ഥയില് കഴിയുന്നയാളുടെ ഭാര്യയെയോ മക്കളിലൊരാളെയോ നിയമപരമായ മറ്റ് അനന്തരാവകാശികളിലൊരാളെയോ രക്ഷാകര്ത്താവായി നിയമിക്കാനാവുമെന്നും കോടതി പറഞ്ഞു.
കോമ സ്റ്റേജില് കഴിയുന്ന എറണാകുളം മരട് താമരശേരി വീട്ടില് ടി. ഗോപാലകൃഷ്ണന്റെ ഭാര്യ ശോഭ, മകന് നവനീത് കൃഷ്ണന്, ഇതേ സ്ഥിതിയില് കഴിയുന്ന ഇരുമ്പനം സ്വദേശി ടി.വി. വര്ക്കിയുടെ ഭാര്യ ഷേര്ളി, മക്കളായ വര്ഷ, തുഷാര എന്നിവര് നല്കിയ ഹര്ജികളാണ് ഹൈക്കോടതി പരിഗണിച്ചത്.
ശാരീരികവും മാനസികവുമായ വെല്ലുവിളി നേരിടുന്നവരുടെ സ്വത്തുക്കള് സംരക്ഷിക്കാനും കൈകാര്യം ചെയ്യാനും രക്ഷാകര്ത്താക്കളെ നിയമിക്കാമെന്ന് വിവിധ നിയമങ്ങളില് പറയുന്നുണ്ടെങ്കിലും കോമ സ്റ്റേജിലുള്ളവരുടെ കാര്യത്തില് ഇത്തരം വ്യവസ്ഥകള് പറയുന്നില്ലെന്ന് ഡിവിഷന് ബെഞ്ച് വിലയിരുത്തി.
ഇക്കാര്യത്തില് നിയമനിര്മാണം നടത്തേണ്ടത് പാര്ലമെന്റാണ്. നിയമം വരുന്നതുവരെ നടപ്പാക്കാന് 14 മാര്ഗ നിര്ദേശങ്ങളും ഡിവിഷന് ബെഞ്ച് നല്കി.
മരട് സ്വദേശി ഗോപാലകൃഷ്ണന് കഴിഞ്ഞ ജനുവരിയില് മരിച്ച സാഹചര്യത്തില് ഭാര്യക്കും മകനും സ്വത്ത് കൈകാര്യം ചെയ്യുന്നതിന് മറ്റു നിയമപരമായ നടപടികള് സ്വീകരിക്കാമെന്ന് ഡിവിഷന് ബെഞ്ച് വ്യക്തമാക്കി.
https://www.facebook.com/Malayalivartha
