കോഴിക്കോട് കടലുണ്ടിയില്‍ ഫുട്ബാള്‍ ടൂര്‍ണമെന്റ് ഫൈനലിന്റെ താല്‍കാലിക ഗ്യാലറി തകര്‍ന്ന് നൂറോളം പേര്‍ക്ക് പരിക്കേറ്റു. ആയിരത്തോളം പേര്‍ ഇരുന്ന ഗ്യാലറിയാണ് നിലംപൊത്തിയത്. പരിക്കേറ്റവരുടെ സംഖ്യ കൂടാനിടയുണ്ടെങ്കിലും ആരുടെയും നില ഗുരുതരമല്ലെന്നാണ് പ്രാഥമിക വിവരം. കോട്ടക്കടവ് ടി.എം.എച്ച് ആശുപത്രി, കല്ലമ്പാറ ശിഫ ആശുപത്രി എന്നിവിടങ്ങളില്‍ പരിക്കേറ്റവരെക്കൊണ്ട് നിറഞ്ഞു. സാരമായി പരിക്കേറ്റ 12 പേരെ കോഴിക്കോട് മെഡിക്കല്‍ കോളജ് ആശുപത്രിയിലേക്ക് മാറ്റി. വെള്ളിയാഴ്ച രാത്രി 9.20 ഓടെയായിരുന്നു സംഭവം. ഇടച്ചിറ പഞ്ചായത്ത് സ്‌റ്റേഡിയത്തില്‍ ടീം കടലുണ്ടി സംഘടിപ്പിച്ച ടൂര്‍ണമെന്റ് ഫൈനല്‍ മത്സരത്തിന്റെ കിക്കോഫിന് തൊട്ടുമുമ്പായാണ് കിഴക്കെ ഗ്യാലറി വീണത്.
ഡയമണ്ട് പരപ്പനങ്ങാടിയും ഉദയ പറമ്പില്‍ പീടികയും തമ്മിലുള്ള മത്സരം കാണാന്‍ അയ്യായിരത്തോളം പേരെങ്കിലും എത്തിയിരുന്നു. സാധാരണ രാത്രി ഒമ്പതിന് തുടങ്ങുന്ന മത്സരം കാണികളുടെ തിരക്കു കാരണം 9.30ന് ആക്കുകയായിരുന്നു. അപകടം നടന്ന ഭാഗത്ത് തടിച്ചുകൂടിയ ജനം മുളകള്‍ കൊണ്ട് പണിത കിഴക്കേ ഗ്യാലറിയിലേക്ക് ആളുകള്‍ കയറുമ്പോള്‍ തന്നെ ഇളക്കം അനുഭവപ്പെട്ടിരുന്നതായി പരിക്കേറ്റ ചിലര്‍ പറഞ്ഞു. ഇതിനിടെ ഗ്യാലറിക്ക് ബലം നല്‍കാന്‍ വിളക്കുകാലിനോട് ചേര്‍ന്ന് കെട്ടിയ കയര്‍ വെളിച്ചം ക്രമീകരിക്കുന്നതിന്റെ ഭാഗമായി അഴിച്ചതാണ് വീഴാന്‍ കാരണമായതെന്ന് മക്കളോടൊപ്പം ഗ്യാലറിയിലുണ്ടായിരുന്ന വ്യക്തി പറഞ്ഞു. ഇദ്ദേഹത്തിന്റെ കൂടെയുള്ള കുട്ടിക്കും പരിക്കുണ്ട്.

സംഭവം അറിഞ്ഞയുടന്‍ സമീപ പ്രദേശങ്ങളിലെ മുഴുവന്‍ ആംബുലന്‍സുകളും എത്തിച്ച് പരിക്കേറ്റവരെ ആശുപത്രികളിലേക്ക് മാറ്റി. ഫറോക്ക്, നല്ലളം, ബേപ്പൂര്‍ പൊലീസും നഗരത്തിലെയും മീഞ്ചന്തയിലെയും അഗ്‌നിരക്ഷാസേന, പൊലീസ് ട്രോമ കെയര്‍ വളണ്ടിയര്‍മാര്‍, ജനപ്രതിനിധികള്‍ എന്നിവര്‍ രക്ഷാപ്രവര്‍ത്തനങ്ങള്‍ക്ക് നേതൃത്വം നല്‍കി.