തുടര്ച്ചയായി രണ്ടു മാസം റേഷന് സാധനങ്ങള് വാങ്ങാത്തവരുടെ കാര്ഡുകള് മരവിപ്പിക്കാനുള്ള നീക്കം സിവില് സപ്ലൈസ് വകുപ്പ് ആരംഭിച്ചു, സപ്ലൈ ഓഫീസറും റേഷനിംഗ് ഇന്സ്പെക്ടറും അടങ്ങുന്ന സംഘം അടുത്ത ദിവസങ്ങളില് വീടുകളില് എത്തി പരിശോധന നടത്തും
തുടര്ച്ചയായി രണ്ടു മാസം റേഷന് സാധനങ്ങള് വാങ്ങാത്തവരുടെ കാര്ഡുകള് മരവിപ്പിക്കാനുള്ള നീക്കം സിവില് സപ്ലൈസ് വകുപ്പ് ആരംഭിച്ചതോടെ റേഷന് കടകളില് തിരക്കേറി തുടങ്ങി. വിദൂര സ്ഥലങ്ങളില് ജോലി ചെയ്യുന്നവരും മറ്റും കാര്ഡുകള് മരവിപ്പിക്കാതിരിക്കാന് റേഷന് കടകളിലെത്തി അനുവദനീയമായ ഉത്പന്നങ്ങള് വാങ്ങിത്തുടങ്ങി. എന്നാല് ഉപഭോക്താവിന് കേരളത്തില് എവിടെയുമുള്ള റേഷന് കടകളില് നിന്നും റേഷന് ഉത്പന്നങ്ങള് വാങ്ങാമെന്നുള്ള പോര്ട്ടബിലിറ്റി സംവിധാനത്തെക്കുറിച്ച് കൂടുതല് പേര്ക്കും അറിവില്ലാത്തതിനാലാണ് കടകളില് തിരക്ക് വര്ധിക്കാനിടയായതെന്നു സിവില്സപ്ലൈസ് വകുപ്പ് അധികൃതര് പറഞ്ഞു.
രണ്ടു മാസം റേഷന് സാധനങ്ങള് വാങ്ങാതിരിക്കുന്നവരുടെ കാര്ഡുകള് ആറു മാസത്തേക്കായിരിക്കും മരവിപ്പിക്കുക. ഈ കാലയളവില് കാര്ഡ് മറ്റാവശ്യങ്ങള്ക്ക് ഉപയോഗിക്കാമെങ്കിലും റേഷന് സാധനങ്ങള് വാങ്ങാനാവില്ല. പിന്നീട് റേഷന് പുനഃസ്ഥാപിച്ചു കിട്ടാന് വീണ്ടും അപേക്ഷ നല്കണം.
നിലവില് മരവിപ്പിക്കല് ഭീഷണി നേരിടുന്ന കാര്ഡുടമകളില് മറ്റു സ്ഥലങ്ങളില് ജോലി ചെയ്യുന്നവരും വിദേശത്ത് ജോലി ചെയ്യുന്നവരുമുണ്ട്. ജില്ലയില് 22,606 റേഷന് കാര്ഡുകള് മരവിപ്പിക്കാനുള്ള നടപടിയാണ് സപ്ലൈ വകുപ്പ് തുടങ്ങിയിരിക്കുന്നത്. നവംബര്, ഡിസംബര് മാസങ്ങളില് തുടര്ച്ചയായി റേഷന് വാങ്ങാത്ത കാര്ഡ് ഉടമകളെ കുറിച്ചുള്ള വിവരങ്ങള് താലൂക്ക് സപ്ലൈ ഓഫീസര്മാരും റേഷനിംഗ് ഇന്സ്പെക്ടര്മാരുമാണ് ശേഖരിക്കുന്നത്. തൊടുപുഴ താലൂക്ക് 6584, ഇടുക്കി 3854, ഉടുമ്പന്ചോല 3944, ദേവികുളം 5732, പീരുമേട് 2492 കാര്ഡുകളാണ് മരവിപ്പിക്കല് ലിസ്റ്റിലുള്ളത്. റേഷന് വാങ്ങാത്ത മുന്ഗണന പട്ടികയിലുള്ള കാര്ഡുകള് മരവിപ്പിക്കാനും ഇത് അര്ഹരായ മറ്റുള്ളവര്ക്ക് നല്കുന്നതിനുമാണ് നടപടി.
റേഷന് കാര്ഡുകളില് ഇപോസ് മെഷീന് സംവിധാനം നിലവില് വന്നതോടെ സംസ്ഥാനത്തെ ഏതു കടയില് നിന്നും താലൂക്കില് അനുവദിക്കപ്പെട്ട റേഷന് അലോട്ടുമെന്റിനനുസരിച്ച് സാധനങ്ങള് ലഭിക്കും. എന്നാല് മറ്റു പല സ്ഥലത്തുമുള്ള കാര്ഡുടമകള് ഈ സംവിധാനത്തിന്റെ പ്രയോജനം ഉപയോഗപ്പെടുത്തുന്നില്ലെന്നാണ് വസ്തുത.
ഉപയോഗപ്പെടുത്തിയിരുന്നെങ്കില് ഇത്രയും കാര്ഡുകള് മരവിപ്പിക്കാനുള്ള ലിസ്റ്റില് ഉള്പ്പെടില്ലായെന്നും ഉദ്യോഗസ്ഥര് ചൂണ്ടിക്കാട്ടുന്നു. ഇപോസ് മെഷീന് ഉപയോഗിച്ചു റേഷന് വിതരണം നടത്തുന്നതിനാല് കാര്ഡ് ഉടമ അല്ലെങ്കില് കാര്ഡിലെ ഏതെങ്കിലും അംഗത്തിന്റെ വിരലടയാളം വേണം. ഇത്തരത്തില് റേഷന് വാങ്ങാന് കഴിയാത്തവരുടെ കാര്ഡുകളും മരവിപ്പിച്ച ലിസ്റ്റില് ഉള്പ്പെടും. ഇതോടൊപ്പം അനര്ഹമായി സന്പാദിച്ച പിങ്ക്, മഞ്ഞ റേഷന് കാര്ഡുകളെക്കുറിച്ചും അന്വേഷിക്കും.
അനര്ഹരായവരെ ഒഴിവാക്കി അര്ഹരായവരെ മുന്ഗണന വിഭാഗത്തില് പെടുത്താനാണ് നടപടി. റേഷന് കാര്ഡിലെ എല്ലാ അംഗങ്ങള്ക്കും കൂടി ഒരു ഏക്കറില് കൂടുതല് സ്ഥലം, 1000 ചതുരശ്ര അടിയില് കൂടുതല് വിസ്തീര്ണമുള്ള വീട്, നാലുചക്ര വാഹനം, മാസവരുമാനം 25,000 രൂപയില് കൂടുതല് എന്നിവ ഉണ്ടെങ്കില് ബിപിഎല് കാര്ഡിന് അര്ഹതയില്ല.
കൂടാതെ കാര്ഡില് ഉള്പ്പെട്ട ആര്ക്കെങ്കിലും സര്ക്കാര്, പൊതുമേഖല, സ്വാശ്രയ സ്ഥാപനങ്ങളില് ജോലിയോ സര്വീസ് പെന്ഷനോ ഉണ്ടെങ്കില് മുന്ഗണന കാര്ഡിന് അര്ഹതയില്ല. സപ്ലൈ ഓഫീസറും റേഷനിംഗ് ഇന്സ്പെക്ടറും അടങ്ങുന്ന സംഘം അടുത്ത ദിവസങ്ങളില് വീടുകളില് എത്തി പരിശോധന നടത്തും.
https://www.facebook.com/Malayalivartha
