പെരിയ ഇരട്ടക്കൊലപാതകം സി.പി.എമ്മിനെയും സര്ക്കാരിനേയും വെട്ടിലാക്കിയിരിക്കുന്നതിന് പിന്നാലെ മുഖ്യമന്ത്രി പിണറായി വിജയനെതിരെ മറ്റൊരു ഇടിവെട്ടുമായി കോണ്ഗ്രസ് എം.എല്.എ വി.ടി ബല്റാം
പെരിയ ഇരട്ടക്കൊലപാതകം സി.പി.എമ്മിനെയും സര്ക്കാരിനേയും വെട്ടിലാക്കിയിരിക്കുന്നതിന് പിന്നാലെ മുഖ്യമന്ത്രി പിണറായി വിജയനെതിരെ മറ്റൊരു ഇടിവെട്ടുമായി കോണ്ഗ്രസ് എം.എല്.എ വി.ടി ബല്റാം. വാടിക്കല് രാമകൃഷ്ണന് എന്ന തയ്യല് തൊഴിലാളിയെ മഴു കൊണ്ട് തലയ്ക്ക് വെട്ടി കൊന്ന കേസിലെ പ്രതിയാണ് മുഖ്യമന്ത്രി പിണറായി വിജയനെന്ന് വി.ടി ആരോപിച്ചു. അങ്ങനെയുള്ള ഒരാള് കേരളത്തിന്റെ മുഖ്യമന്ത്രി കസേരയിലിരിക്കുമ്പോള് പെരിയയിലേത് പോലുള്ള സംഭവങ്ങള് കേരളത്തില് ഉണ്ടാകുമെന്നും വി.ടി മുന്നറിയിപ്പ് നല്കി. കേരള രാഷ്ട്രീയത്തിലെ ആദ്യത്തെ കൊലപാതകമാണ് വാടിക്കല് രാമകൃഷ്ണന് വധം.
കാസര്കോട് സിപിഎമ്മുകാര് വെട്ടിക്കൊന്ന യൂത്ത് കോണ്ഗ്രസ് പ്രവര്ത്തകരുടെ വീട് സന്ദര്ശിക്കാന് ആഗ്രഹിക്കുന്ന മുഖ്യമന്ത്രി എന്ത് കൊണ്ട് ഷുഹൈബിന്റെ വീട്ടിലേക്ക് പോകുന്നില്ലെന്നും വിടി ബലറാം എംഎല്എ ചോദിച്ചു. കഴിഞ്ഞ വര്ഷം മുഖ്യമന്ത്രി പിണറായി വിജയന്റെ ജില്ലയില് വെച്ചാണ് യൂത്ത് കോണ്ഗ്രസ് പ്രവര്ത്തകനായ ഷുഹൈബ് കൊല്ലപ്പെട്ടത്. ആ വീട്ടില് ഇതുവരെ പോകാന് മുഖ്യമന്ത്രി തയ്യാറാകാത്തത് എന്തുകൊണ്ടാണെന്നും വിടി ബല്റാം ചോദിച്ചു. യൂത്ത് കോണ്ഗ്രസ് പാലക്കാട് എസ് പി ഓഫീസിലേക്ക് നടത്തിയ പ്രതിഷേധ പ്രകടനത്തില് സംസാരിക്കുകയായിരുന്നു അദ്ദേഹം. പിണറായി അധികാരത്തിലെത്തിയ ശേഷം കേരള പൊലീസില് വിശ്വാസം നഷ്ടപ്പെട്ടിരിക്കുന്നു. പെരിയ കൊലപാതകത്തില് കൊന്നവരേയും കൊല്ലിച്ചവരേയും ഗൂഢാലോചന നടത്തിയവരേയും പിടികൂടണമെങ്കില് സ്വതന്ത്രമായ അന്വേഷണം വേണം. സിബിഐ പോലൊരു സ്വതന്ത്ര ഏജന്സിക്കേ അതിന് കഴിയൂ എന്നും ബല്റാം ചൂണ്ടിക്കാട്ടി.
സാംസ്കാരിക നായകന്മാര് എന്ന് സ്വയം പ്രഖ്യാപിക്കുന്നവര് സിപിഎമ്മിന് സ്തുതി പാടുകയാണെന്നും ബല്റാം ആരോപിച്ചു. കപട സാംസ്കാരിക നായകന്മാരെ സാംസ്കാരിക കേരളം തിരിച്ചറിഞ്ഞു കഴിഞ്ഞു. കോണ്ഗ്രസ് ഇന്ത്യയിലെ എല്ലാ സംസ്ഥാനങ്ങളും ഭരിച്ചിരുന്നു. പിന്നീട് പ്രതിപക്ഷത്തായി. ഇപ്പോള് പലയിടത്തും അധികാരത്തിലേക്ക് തിരിച്ചുവരുന്നു. രാഷ്ട്രീയത്തില് ഇതൊക്കെ പതിവാണ്. പക്ഷെ, മൂന്ന് പതിറ്റാണ്ടിലധികം അധികാരത്തിലിരുന്ന പാര്ട്ടി ഭരണത്തില് നിന്ന് താഴെ ഇറങ്ങിയതിന് അടുത്ത ദിവസം നാട്ടുകാര് അടിച്ചോടിച്ചിട്ടുണ്ടെങ്കില് അത് ത്രിപുരയിലും ബംഗാളിലും മാത്രമാണെന്നും വിടി ബലറാം പരിഹസിച്ചു.
പെരിയ ഇരട്ടക്കൊലപാതകത്തെ അപലപിച്ച് ഇടത് മുന്നണിയിലേയും മന്ത്രിസഭയിലെയും അംഗങ്ങള് രംഗത്ത് വന്നതും ഷുക്കൂര് വധക്കേസില് പി.ജയരാജനും ടി.വി രാജേഷും കൊലക്കുറ്റം ചെയ്തെന്ന് സി.ബി.ഐ കുറ്റപത്രം സമര്പ്പിച്ചതും സി.പി.എമ്മിന് വലിയ തിരിച്ചടിയായിരിക്കുമ്പോഴാണ് മുഖ്യമന്ത്രി പിണറായി വിജയനെതിരെ ഗുരുതര ആരോപണവുമായി വി.ടി ബല്റാം രംഗത്തെത്തിയത്. മുതിര്ന്ന കോണ്ഗ്രസ് നേതാക്കള് പോലും ഉന്നയിക്കാത്ത ആരോപണമാണ് ബല്റാം ആഞ്ഞടിച്ചത്. അതിനാല് രാഷ്ട്രീയകേരളം വീണ്ടും വാടിക്കല് രാമകൃഷ്ണന്റെ കൊലപാതകം ചര്ച്ചയാക്കുമെന്ന് ഉറപ്പാണ്.
https://www.facebook.com/Malayalivartha
