പെരിയ കൊലപാതകത്തില്‍ രാഷ്ട്രീയം നോക്കില്ല, ശാസ്ത്രീയമായും പ്രഫഷനലായും അന്വേഷിക്കുമെന്ന് ഡിജിപി. പെരിയ ഇരട്ടക്കൊല അന്വേഷണത്തെക്കുറിച്ചുള്ള ആക്ഷേപങ്ങള്‍ പരിശോധിക്കുമെന്ന് ഡിജിപി ലോക്നാഥ് ബെഹ്റ. കൊലയ്ക്കു പിന്നിലെ രാഷ്ട്രീയം നോക്കിയല്ല പോലീസ് അന്വേഷണം. ശാസ്ത്രീയമായും പ്രഫഷനലായും കേസ് അന്വേഷണം മുന്നോട്ടുപോകുമെന്ന് ഡിജിപി ലോക്നാഥ് ബെഹ്റ തിരുവനന്തപുരത്ത് പറഞ്ഞത്. 

അതേസമയം കേസില്‍ സിബിഐ അന്വേഷണം ആവശ്യപ്പെട്ട് രണ്ടുപേരുടെയും കുടുംബവും കോണ്‍ഗ്രസും ഹൈക്കോടതിയെ സമീപിക്കാനൊരുങ്ങുകയാണ്. കൊല്ലപ്പെട്ടവരുടെ കുടുംബങ്ങള്‍ക്കൊപ്പമാണ് പാര്‍ട്ടിയും നിയമനടപടിക്കൊരുങ്ങുന്നത്. സിപിഎം അയച്ച ക്വട്ടേഷന്‍ സംഘമാണ് കൊല നടത്തിയതെന്നാണ് കുടുംബം കണ്ണീരോടെ വാദമുയര്‍ത്തുന്നത്. ക്രൈംബ്രാഞ്ച് അന്വേഷണം ഏറ്റെടുക്കുന്നതിന്റെ ഭാഗമായി എസ്പി മുഹമ്മദ് റഫീഖും ഡിവൈഎസ്പി പ്രദീപും അന്വേഷണ ഉദ്യോഗസ്ഥരുമായി ചര്‍ച്ച നടത്തി.

അതേസമയം പെരിയയിലെ കോണ്‍ഗ്രസ് ബ്ലോക്ക് കമ്മിറ്റി പ്രസിഡന്റ് രാജന്‍ പെരിയയുടെ വീടിന് ഒരു സംഘം അക്രമികള്‍ തീവെച്ചു. ഫര്‍ണ്ണിച്ചറുകളും മറ്റുപകരണങ്ങളും കത്തി നശിച്ചിട്ടുണ്ട്. ബ്ലോക്ക് പ്രസിഡന്റും കുടുംബവും വീട്ടിലുണ്ടായിരുന്ന സമയത്താണ് അക്രമം നടന്നത്.

അതേസമയം സംഭവത്തില്‍ നിലവിലെ പോലീസ് അന്വേഷണം ശരിയായ ദിശയിലല്ലെന്നും സിബി ഐ അന്വേഷണം വേണമെന്നും കെ പി സി സി പ്രസിഡന്റ് മുല്ലപ്പള്ളി രാമചന്ദ്രന്‍ വാര്‍ത്താസമ്മേളനത്തില്‍ പറഞ്ഞിരുന്നു. പോലീസ് ബാഹ്യ സമ്മര്‍ദ്ദങ്ങള്‍ക്ക് വഴങ്ങുകയാണ്. പരിശീലനം ലഭിച്ച ക്വട്ടേഷന്‍ സംഘങ്ങളാണ് കൊല നടത്തിയത്. കണ്ടെത്തിയ ആയുധങ്ങളെ കുറിച്ച് ഉന്നത പോലീസ് ഉദ്യോഗസ്ഥര്‍ പോലും സംശയം ഉന്നയിച്ചിട്ടുണ്ട്. പാര്‍ട്ടിക്ക് പങ്കില്ലെങ്കില്‍ എന്തിനാണ് സി പി എം നേതാക്കള്‍ പീതാംബരന്റെ വീട്ടില്‍ പോയതെന്നും മുല്ലപ്പള്ളി രാമചന്ദ്രന്ഡ ചോദിച്ചു. ഉദുമ എം എല്‍ എയ്ക്കും മുന്‍ എം എല്‍ എ യ്ക്കും എതിരെ അന്വേഷണം വേണം. അന്വേഷണ ചുമതലയുള്ള ഐ ജി ശ്രീജിത്തും റഫീഖും ആരോപണ വിധേയരാണ്. ഇവരുടെ നേതൃത്വത്തിലുള്ള അന്വേഷണത്തില്‍ കെ പി സി സി ക്കും കൊല്ലപ്പെട്ടവരുടെ കുടുംബത്തിനും വിശ്വാസമില്ല. ടി പി ചന്ദ്രശേഖരന്‍ വധക്കേസില്‍ അന്വേഷണം അട്ടിമറിക്കാന്‍ ശ്രമിച്ചയാളാണ് ശ്രീജിത്ത്.


അതേസമയം കാസര്‍കോട് സി.പി.എം ജില്ലാ നേതൃത്വമാണ് യൂത്ത് കോണ്‍ഗ്രസ് പ്രവര്‍ത്തകരുടെ കൊലക്ക് പിന്നിലെന്ന് കെ.മുരളീധരന്‍ ആരോപിച്ചു. പീതാംബരനെ സംരക്ഷിക്കാന്‍ പാര്‍ട്ടി നീക്കം നടത്തുന്നുണ്ട്. കൊലപാതകത്തിന് പിന്നില്‍ ക്വട്ടേഷന്‍ സംഘമാണ്. കൊലവിളി പ്രസംഗം നടത്തിയ വി.പി.പി മുസ്തഫക്കെതിരെ പൊലീസ് കേസെടുക്കുന്നില്ലെന്നും മുരളീധരന്‍ പറഞ്ഞു.

Chat conversation end Type a message...