അന്തരീക്ഷ താപനില 35 ഡിഗ്രിയ്ക്ക് മേല് ഉയര്ന്നതോടെ പത്തനംതിട്ട ജില്ലയില് ജാഗ്രതാനിര്ദേശം
പത്തനംതിട്ട ജില്ലയില് പകല്താപനില 35 ഡിഗ്രി സെല്ഷ്യസിലും അധികമായതോടെ ജാഗ്രതാനിര്ദേശം നല്കി. സൂര്യാഘാതത്തിനുള്ള സാധ്യത മുന്നില്ക്കണ്ട് മുന്കരുതല് സ്വീകരിക്കാനാണ് നിര്ദേശം. കഴിഞ്ഞ ഒരാഴ്ചയായി പകല് ശരാശരി താപനില 33 ഡിഗ്രി സെല്ഷ്യസാണ്. പുനലൂരില് അനുഭവപ്പെടുന്ന അതേ ചൂട് പകല് സമയങ്ങളില് പത്തനംതിട്ടയില് ഉണ്ടാകുന്നുണ്ട്.
താപനില വര്ധിച്ചതോടെ ജലക്ഷാമവും രൂക്ഷമായി തുടങ്ങി. വരള്ച്ച രൂക്ഷമാകുന്ന ലക്ഷണങ്ങളാണ് കണ്ടുവരുന്നത്. നദികളടക്കം വരണ്ടുണങ്ങിത്തുടങ്ങി. പമ്പ, അച്ചന്കോവില്, മണിമല നദികള് നീര്ച്ചാലുകള് മാത്രമായി ചുരുങ്ങിക്കഴിഞ്ഞു. താപനില ഉയരുന്നതോടെ തീ പടരാനുള്ള സാധ്യത മുന്നില്ക്കണ്ടും മുന്നറിയിപ്പുകള് നല്കുന്നുണ്ട്. അഗ്നിരക്ഷാസേനയുടെ നേതൃത്വത്തില് ഇന്നലെ പ്രധാന ടൗണുകളില് പ്രത്യേക മൈക്ക് അനൗണ്സ്മെന്റ് നടത്തി.
ക്രമാതീതമായി അന്തരീക്ഷ താപം ഉയര്ന്ന സാഹചര്യത്തില് സൂര്യാഘാതം, ശരീര താപ ശോഷണം, സൂര്യാതപത്തിലുള്ള പൊള്ളല് തുടങ്ങിയ ആരോഗ്യപ്രശ്നങ്ങള്ക്കെതിരെ ജാഗ്രത പാലിക്കണമെന്ന് ജില്ലാ മെഡിക്കല് ഓഫീസര് ഡോ.എ.എല്. ഷീജ അറിയിച്ചു. ശരീരം തണുപ്പിക്കുന്നതിനുവേണ്ടി തണുത്ത വെള്ളം കൊണ്ട് ഇടയ്ക്കിടെ തുടയ്ക്കണം. ചൂട് കൂടുതലുള്ള അവസരങ്ങളില് കഴിവതും വീടിനകത്തോ മരത്തണലിലോ വിശ്രമിക്കണം. വെയിലത്ത് ജോലി ചെയ്യേണ്ടിവരുന്ന അവസരങ്ങളില് ജോലിസമയം ക്രമീകരിക്കണം.
ഉച്ചയ്ക്ക് 12 മുതല് മൂന്ന് വരെയുള്ള സമയം വെയിലത്ത് ജോലി ചെയ്യാതിരിക്കുക. വേനല്ക്കാലത്ത് ദാഹം അനുഭവപ്പെട്ടില്ലെങ്കില് പോലും ധാരാളം വെള്ളം കുടിക്കണം. ഓരോ മണിക്കൂറിടവിട്ട് രണ്ട് മുതല് നാല് ഗ്ലാസ് വെള്ളം കുടിക്കണം. ധാരാളം വിയര്പ്പുള്ളവര് ഉപ്പിട്ട കഞ്ഞിവെള്ളവും ഉപ്പിട്ട നാരങ്ങാവെള്ളവും കുടിക്കണം. കട്ടികുറഞ്ഞ വെളുത്തതോ ഇളം നിറത്തിലോ ഉള്ള അയഞ്ഞ വസ്ത്രങ്ങള് ധരിക്കണം.
കുട്ടികള് പ്രായമുള്ളവര്, ഗര്ഭിണികള്, രോഗികള് എന്നിവര്ക്ക് പ്രത്യേക ശ്രദ്ധയും പരിചരണവും നല്കണം. വീടിനകത്ത് ധാരാളം കാറ്റ് കടക്കുന്ന രീതിയില് വാതിലുകളും ജനലുകളും തുറന്നിടണം. മധുരമുള്ളതോ ആല്ക്കഹോള് അടങ്ങിയതോ ആയ പാനീയങ്ങള് ഒഴിവാക്കണം. വെയിലത്ത് പാര്ക്ക് ചെയ്തിരിക്കുന്ന കാറുകളില്, കുട്ടികളെയും നടക്കാന് ബുദ്ധിമുട്ടുള്ളവരെയും ഇരുത്തിയിട്ട് പോകരുത്. കുട്ടികളെ വെയിലത്ത് കളിക്കാന് അനുവദിക്കരുതെന്നും ജില്ലാ മെഡിക്കല് ഓഫീസര് അറിയിച്ചു.
https://www.facebook.com/Malayalivartha
