തലശേരിയിലെ സ്വകാര്യ ആശുപത്രിയിലെ ചികിത്സക്കിടെ യുവതിയായ വീട്ടമ്മ മരിച്ച സംഭവത്തില്‍ അന്വേഷണം തലശേരി എഎസ്പി അരവിന്ദ് സുകുമാറിന്റെ നേതൃത്വത്തിലുള്ള സംഘം ഏറ്റെടുത്തു. പുന്നോല്‍ കുറിച്ചിയില്‍ കരീക്കുന്ന് റോഡില്‍ പൊന്നമ്പത്ത് മീത്തല്‍ പി.ടി. ബജിത (37) ചികിത്സക്കിടയില്‍ ശനിയാഴ്ച രാത്രിയില്‍ മരണമടഞ്ഞ സംഭവത്തിലാണ് എഎസ്പിയുടെ നേതൃത്വത്തിലുള്ള സംഘം അന്വേഷണം ഊര്‍ജിതമാക്കിയിട്ടുള്ളത്.

ശനിയാഴ്ച വൈകുന്നേരം ആറോടെയാണ് നഗരമധ്യത്തിലെ സ്വകാര്യ ആശുപത്രിയില്‍, പനിയെ തുടര്‍ന്ന് ചികിത്സ തേടി ബജിതയും മകളുംഎത്തിയത്. ഇരുവരേയും ചികിത്സിക്കുന്നതിനിടയില്‍ ബജിതയുടെ നില ഗുരുതരമാകുകയും ബജിതയെ തലശേരി സഹകരണ ആശുപത്രിയില്‍ എത്തിക്കുകയുമായിരുന്നു. എന്നാല്‍, ആശുപത്രിയിലെത്തുന്നതിനു മുമ്പ് ബജിത മരണമടഞ്ഞിരുന്നു. ബജിതയുടെ വായില്‍ നിന്നും നുരയും പതയും വന്നിരുന്നതായി ബന്ധുക്കള്‍ പറഞ്ഞു. സ്വകാര്യ ആശുപത്രിയില്‍ നിന്നും ഒരു ഡോക്ടറും ബജിതയോടൊപ്പം ആംബുലന്‍സില്‍ സഹകരണ ആശുപത്രിയിലെത്തിയിരുന്നു.

എന്നാല്‍ ബജിത മരണപ്പെട്ട വിവരം അറിഞ്ഞതോടെ സ്ഥലം വിട്ട ഡോക്ടര്‍, ചികിത്സ സംബന്ധിച്ച ഒരു രേഖയും സ്വകാര്യ ആശുപത്രിയില്‍ നിന്നും സഹകരണ ആശുപത്രിയിലെത്തിച്ചില്ലെന്നും ആരോപണമുണ്ട്. വിവരമറിഞ്ഞ് ന്യൂ മാഹി പഞ്ചായത്ത് പ്രസിഡന്റ് ചന്ദ്രദാസന്റെ നേതൃത്വത്തില്‍ നാട്ടുകാര്‍ രാത്രിയില്‍ തന്നെ ആശുപത്രിയിലെത്തി. സംഭവത്തില്‍ എ.എന്‍. ഷംസീര്‍ എംഎല്‍എയും ഇടപെട്ടു. ബജിതയെ സഹകരണ ആശുപത്രിയിലെത്തിച്ച ഡോക്ടറെ ബന്ധപ്പെടാന്‍ ശ്രമിച്ചെങ്കിലും സാധിച്ചില്ല. തുടര്‍ന്ന് സ്വകാര്യ ആശുപത്രിയില്‍ സംഘര്‍ഷാവസ്ഥ ഉടലെടുത്തു. സിഐ എം.പി.ആസാദിന്റെ നേതൃത്വത്തില്‍ വന്‍ പോലീസ് സംഘവും സ്ഥലത്തെത്തി.

ഇതിനിടയില്‍ ഡോക്ടര്‍ സ്ഥലത്തെത്തിയെങ്കിലും പരസ്പര വിരുദ്ധമായാണ് പഞ്ചായത്ത് പ്രസിഡന്റ് ഉള്‍പ്പെടെയുള്ളവരോട് സംസാരിച്ചതെന്നും ദൃക്‌സാക്ഷികള്‍ പറഞ്ഞു. പരിയാരം മെഡിക്കല്‍ കോളജില്‍ പോസ്റ്റ്‌മോര്‍ട്ടം നടത്തിയ ശേഷം ഞായറാഴ്ച വൈകുന്നേരം സംസ്‌കരിച്ചു. ഭര്‍ത്താവ്: പി.വി.മോഹന്‍ദാസ് (ജ്വല്ലറി വര്‍ക്‌സ്). മക്കള്‍: ശിവദ (വിദ്യാര്‍ഥി, സേക്രട്ട് ഹാര്‍ട്ട് സ്‌കൂള്‍, തലശേരി), വരദ (വിദ്യാര്‍ഥി അമൃത സ്‌കൂള്‍ പുന്നോല്‍). വള്ള്യായിലെ പി.ടി.ബാലന്‍രാധ ദന്പതികളുടെ മകളാണ്. സഹോദരങ്ങള്‍: ബവിത്ത് (മൊകേരി സര്‍വീസ് സഹകരണ ബേങ്ക്), വരുണ്‍ (അക്കൗണ്ടന്റ് ഷാസി ഓഡിറ്റോറിയം).