കോണ്ഗ്രസ് അങ്കലാപ്പില്... തുഷാര് വെള്ളാപ്പള്ളി രാഹുലിനെതിരെ വന്നതോടെ കളി മാറി; രാഹുലിനെ വയനാട്ടില് തളയ്ക്കാന് തുഷാര് ധാരാളം; സിപിഐ ജയിച്ചില്ലെങ്കിലും വേണ്ടില്ല തുഷാര് ജയിക്കരുത്
വയനാട്ടില് രാഹുല് ഗാന്ധിയ്ക്ക് എതിരായി എന്ഡിഎ സ്ഥാനാര്ത്ഥിയായി തുഷാര് വെള്ളാപ്പള്ളി എത്തിയതോടെ ചിത്രം മാറുകയാണ്. സിപിഎമ്മിനെ സംബന്ധിച്ച് സിപിഐ ജയിച്ചില്ലെങ്കിലും വേണ്ടില്ല രാഹുല് ഗാന്ധി ജയിക്കരുതെന്ന ഉറച്ച നിലപാടിലാണ്. ആ നിലയ്ക്ക് വോട്ട് മറിച്ചാണെങ്കിലും രാഹുലിനെ തോല്പ്പിക്കുകയാണ് ലക്ഷ്യം. വെള്ളാപ്പള്ളി നടേശന്റെ മകനായ തുഷാര് വെള്ളാപ്പള്ളി വന്നതോടെ ഇടതു മുന്നണിയ്ക്കും സ്വീകാര്യനായി. ബാക്കി മണ്ഡലങ്ങളില് ഇടതിനെ എസ്എന്ഡിപി സഹായിച്ചാല് തിരിച്ച് വയനാട്ടില് സഹായിക്കുമെന്നാണ് ഇടതുമുന്നണിയുടെ വാഗ്ദാനം. അതിനാല് തന്നെയാണ് തുഷാറിനെ തൃശൂര് മാറ്റി വയനാട്ടിലെത്തിച്ചത്. തോല്ക്കുന്നെങ്കിലും അതിനൊരന്തസുണ്ട് എന്നാണ് അച്ഛന് വെള്ളാപ്പള്ളി പറയുന്നത്.
ഇത് മുന്നില് കണ്ടാണ് വയനാട്ടില് മത്സരം താനും രാഹുല് ഗാന്ധിയും തമ്മിലാണെന്ന് തുഷാര് വെള്ളാപ്പള്ളി പറഞ്ഞത്. വയനാട്ടില് മത്സരിക്കാനിറങ്ങുന്ന രാഹുല് ഗാന്ധി ഇവിടെ നിന്ന് വിജയിച്ച് പോകില്ലെന്നും ശക്തമായ പോരാട്ടം കാഴ്ച വയ്ക്കുമെന്നും തുഷാര് പറഞ്ഞു. മലയാളി അല്ലാത്തൊരാള് എന്തിന് കേരളത്തില് വന്ന് മത്സരിക്കുന്നു. മത്സരിക്കാന് കേരളത്തില് ഇഷ്ടം പോലെ മലയാളികള് ഇല്ലേയെന്നും തുഷാര് ചോദിച്ചു.
രാഹുല് വയനാട്ടില് നിന്ന് ഒരു കാരണവശാലും വിജയിച്ചു പോകില്ല. അറിയാത്ത ഒരാള്ക്ക് വോട്ട് ചെയ്യുന്നതിനേക്കാള് നല്ലതല്ലേ അറിയുന്നവര്ക്ക് വോട്ട് ചെയ്യുന്നത്. വയനാട്ടില് താനും രാഹുല് ഗാന്ധിയും തമ്മിലാണ് മത്സരമെന്നും തുഷാര് പറഞ്ഞു.
ബി.ജെ.പി ദേശീയ അധ്യക്ഷന് അമിത് ഷായാണ് തുഷാറിന്റെ വയനാട്ടിലെ സ്ഥാനാര്ത്ഥിത്വം പ്രഖ്യാപിച്ചത്. ഊര്ജസ്വലനായ യുവനേതാവാണ് തുഷാറെന്ന് സ്ഥാനാര്ത്ഥിത്വം പ്രഖ്യാപിച്ചുകൊണ്ട് അമിത് ഷാ ട്വീറ്റ് ചെയ്തു. എന്.ഡി.എ കേരളത്തിലെ രാഷ്ട്രീയ ബദലാകുമെന്നും അമിത് ഷാ പറഞ്ഞു.
അതേസമയം വെള്ളാപ്പള്ളി നടേശനും മകന് വേണ്ടി അവസരത്തിനൊത്ത് കാലുമാറി. തെരഞ്ഞെടുപ്പില് മല്സരിക്കുന്ന യോഗം ഭാരവാഹികള് അവരുടെ സമുദായത്തിലെ പദവി രാജിവയ്ക്കണമെന്നാണ് വെള്ളാപ്പള്ളി ആദ്യം കല്പ്പന പുറപ്പെടുവിച്ചത്. ബിഡിജെഎസ് ലേബലില് മല്സരിക്കാന് മണ്ഡലവും കണ്ടു വച്ച് ഉടുപ്പും തയ്പിച്ച് കാത്തിരുന്ന എസ്എന്ഡിപി യോഗം ഭാരവാഹികള് ഇതോടെ മനസു മാറ്റി. മനസില്ലാ മനസോടെ അവര് പിന്മാറുകയും ഇവര് കണ്ണു വച്ചിരുന്ന സീറ്റില് ബിഡിജെഎസ് വേറെ ആളിനെ പ്രഖ്യാപിക്കുകയും ചെയ്തു. അതിന് ശേഷമാണ് തുഷാര് തൃശൂരില് മല്സരിക്കാന് കച്ച കെട്ടിയത്. ഇതോടെ വെള്ളാപ്പള്ളി മുന്പ് പറഞ്ഞത് വിഴുങ്ങി. യോഗം ഭാരവാഹികള്ക്ക് മല്സരിക്കാം. സമുദായത്തിലെ സ്ഥാനം രാജിവയ്ക്കുകയും വേണ്ട. വെള്ളാപ്പള്ളിയുടെ വാക്ക് കേട്ട സീറ്റ് മോഹികള് ഇപ്പോഴാണ് ശരിക്കും ഞെട്ടിയത്. സീറ്റു പോയതിന്റെ കലിപ്പ് പല യോഗം ഭാരവാഹികള്ക്കും ഉണ്ട്. അവര് പുറമേ കാണിക്കുന്നില്ല എന്നു മാത്രം.
ബിഡിജെഎസ് സംസ്ഥാന വൈസ് പ്രസിഡന്റും എസ്എന്ഡിപി യോഗം പത്തനംതിട്ട യൂണിയന് ചെയര്മാനുമായ കെ പത്മകുമാര്, ദേവസ്വം ബോര്ഡ് മുന് അംഗം സുഭാഷ് വാസു എന്നിവര് ബിഡിജെഎസിന്റെ പ്രഥമ സ്ഥാനാര്ഥി പട്ടികയില് ഉണ്ടായിരുന്നു. ഇടുക്കിയിലേക്ക് പത്മകുമാറിനെയാണ് പരിഗണിച്ചത്. ആറ്റിങ്ങലാണ് സുഭാഷ് വാസുവിന് വേണ്ടി കണ്ടു വച്ചിരുന്നത്. ജനറല് സെക്രട്ടറിയുടെ പ്രസ്താവന കേട്ട് ഭയന്നു പോയ ഇരുവരും സ്വമേധയാ മല്സര രംഗത്തു നിന്ന് പിന്മാറി. കഴിഞ്ഞ നിയമസഭാ തെരഞ്ഞെടുപ്പില് സുഭാഷ് വാസു കുട്ടനാട്ടിലും പത്മകുമാര് റാന്നിയിലും മല്സരിച്ചിരുന്നു.
ഇതാദ്യമായല്ല, വെളളാപ്പള്ളി ഈ പണി കാണിക്കുന്നത്. ശബരിമല യുവതി പ്രവേശനത്തിനെതിരേ ബിഡിജെഎസ് ആദ്യം രംഗത്തു വന്നിരുന്നു. അന്നും സിപിഎമ്മിനെ സുഖിപ്പിക്കാന് വേണ്ടി വെള്ളാപ്പള്ളി പ്രസ്താവന നടത്തിയിരുന്നു. യുവതി പ്രവേശന വിരുദ്ധ സമരത്തില് എസ്എന്ഡിപി യോഗം ഭാരവാഹികള് ആരും പങ്കെടുക്കരുതെന്നായിരുന്നു നിര്ദേശം. ഇതോടെ ബിഡിജെഎസിന്റെ നേതാക്കളും പ്രവര്ത്തകരും സമരത്തില് നിന്ന് വിട്ടു നിന്നു. നവോഥാന മതിലിനായി സ്ത്രീകളെ അണിനിരത്തുകയും ചെയ്തു. ഇപ്പോള് എല്ലാം മാറ്റി മറിച്ച് രാഹുല് ഗാന്ധിക്കെതിരെ മോനെ അണിനിരത്തുകയും ചെയ്തു.
https://www.facebook.com/Malayalivartha
