ഇടുക്കി വട്ടവട ഊര്‍ക്കാടിന് സമീപം വീണ്ടും കാട്ടുതീ. പാമ്പാടുംചോല ദേശീയോദ്യാനത്തിന് സമീപവും കാട്ടുതീ പടര്‍ന്നു. എന്നാല്‍ തീ നിയന്ത്രണവിധേയമാക്കിയെന്ന് വനം വകുപ്പ് അറിയിച്ചു. ചോലവനങ്ങളിലേക്ക് തീ പടര്‍ന്നാല്‍ അന്യം നിന്നുപോകുന്ന നിരവധി വന്യജീവികളുടെയും സസ്യസന്പത്തുകളുടെയും ആവാസവ്യവസ്ഥ ഇല്ലാതാകും. അഞ്ചുനാട്ടില്‍ കാട്ടുതീ പടര്‍ന്ന് കോടികളുടെ നഷ്ടമുണ്ടായെന്നാണ് കണക്കാക്കുന്നത്.
മറയൂര്‍, കാന്തല്ലൂര്‍, വട്ടവട മേഖലകളില്‍ വനഭൂമിയും റവന്യൂ ഭൂമിയും കൈവശഭൂമിയും പട്ടയഭൂമിയും തീയില്‍പെട്ട് നശിച്ചു. അതേസമയം, കാട്ടുതീയിലെ നഷ്ടം കണക്കാക്കണം എന്നാവശ്യപ്പെട്ട് ദേവികുളം സബ് കളക്ടര്‍ക്ക് നാട്ടുകാരുടെ കത്ത് നല്‍കിയിട്ടുണ്ട്. വേനലില്‍ കാട് കരിഞ്ഞുണങ്ങുമെന്ന് അറിയാമായിരുന്നിട്ടും അതു തടയുന്നതിനുള്ള മുന്നൊരുക്കങ്ങള്‍ നടത്തുന്നതില്‍ വനംവകുപ്പ് പരാജയപ്പെട്ടതാണ് കാട്ടുതീ വ്യാപകമാകാന്‍ കാരണമെന്നാണ് വിലയിരുത്തല്‍.
അഞ്ചുനാട് മലനിരകളിലെ ഗോത്രവര്‍ഗ കോളനികളുടെ കൃഷിയിടങ്ങളില്‍ മണ്ണ് ഒരുക്കുന്നതിന്റെ ഭാഗമായി തീയിടുന്നതാണ് വനമേഖലയിലേക്കും തീ പടരുന്നതിനു കാരണമെന്ന ആക്ഷേപവും ഉയര്‍ന്നിട്ടുണ്ട്.